អភិបាលខេត្តកំពត៖ ​មន្រ្តី​មូលដ្ឋាន​បម្រើ​ពលរដ្ឋ​បាន​ល្អ​នឹង​ទទួល​​រង្វាន់

លោក ម៉ៅ ធនិន អភិបាលខេត្តកំពតនៅ​ចំពោះ​ពលរដ្ឋមកពីឃុំចំនួន ១៣ ក្នុងស្រុកទឹកឈូខេត្តកំពត បាន​​ប្រកាស​នឹង​ផ្ដល់រង្វាន់លើកទឹកចិត្តដល់​មន្រ្តី​មូលដ្ឋានណា​​ដែលទទួល​បានការ​វាយតម្លៃ​ពេញចិត្ត​ពី​ពលរដ្ឋ។

នៅ​ក្នុងពិធី​ជួបសំណេះសំណាលជាមួយប្រជាពលរដ្ឋមកពីឃុំចំនួន ១៣ ក្នុងស្រុកទឹកឈូខេត្តកំពត ដែលមាន​ចំនួន​ជាង ២ ម៉ឺននាក់ លោក​អភិបាលខេត្ត​​សន្យា​នឹង​ផ្តល់រង្វាន់ទៅដល់មន្ត្រីអាជ្ញាធរមូលដ្ឋានដូចជា អភិបាលស្រុក មេឃុំ មេប៉ុស្តិ៍ ស្មៀនឃុំ និងមេភូមិដែលបានខិតខំលះបង់កម្លាំងកាយចិត្តបម្រើពលរដ្ឋនៅក្នុងមូលដ្ឋានបានល្អប្រសើរ។

ក្នុង​​ឱកាស​នោះ​លោក​អភិបាល​ខេត្ត​បាន​ណែនាំ​ដល់អាជ្ញាធរមូលដ្ឋាន ធ្វើយ៉ាងណា​ត្រូវ​មើលថែពលរដ្ឋឱ្យទទួលបានភាពសុខសាន្ត ព្រោះអ្នកដែលត្រូវផ្តល់ភាពសុខសាន្តជាអចិន្ត្រៃយ៍គឺអាជ្ញាធរមូលដ្ឋាននេះឯង។

លោកអភិបាលខេត្តក៏​ដាស់តឿន​​កុំឱ្យមាន​ការលាបពណ៌ពលរដ្ឋក្នុងមូលដ្ឋានណាម្នាក់​ជាបក្សនេះ​បក្សនោះ ដែលទាំងប្រជាពលរដ្ឋទាំងអស់សុទ្ធតែមានរូបសម្តេចតេជោ ហ៊ុន សែន ក្នុងបេះដូងហើយបានរស់រានមានជីវិតដោយកំណើតទី ២ គឺក្រោយថ្ងៃរំដោះ ៧ មករា ដែលសម្តេចតេជោបានលះបង់គ្រប់បែបយ៉ាង និងយកមកដោយលំបាកនោះ។ ជាមួយគ្នានេះ លោក​ក៏​អំពាវនាវ​ដល់បងប្អូនប្រជាពលរដ្ឋនៅមូលដ្ឋាន ត្រូវរាយការណ៍អំពីភាពអសកម្មនានារបស់អាជ្ញាធរមូលដ្ឋានឬ មន្ត្រីជំនាញ អ្នកមានអំណាចមួយចំនួន ដែលមិនបានផ្តល់ក្តីសុខជូនពលរដ្ឋ ដោយ​លោក​នឹងចាត់​វិធានការនិតិវិធីទៅតាមផ្លូវច្បាប់តែម្ដង។

អត្ថបទ៖ សឹង រ៉ាត់