ឯកអគ្គរាជទូតកម្ពុជា វាយតម្លៃខ្ពស់ចំពោះសម្ព័ន្ធមិត្តភាពជប៉ុន-កម្ពុជា

ឯកអគ្គរាជទូតកម្ពុជាប្រចាំប្រទេសជប៉ុន បានអរគុណ និងវាយតម្លៃខ្ពស់ចំពោះសម្ព័ន្ធមិត្តភាពសភាជប៉ុន-កម្ពុជា ដែលជានិច្ចជាកាលតែងតែចូលរួមសហការ និងគាំទ្រដល់ព្រឹត្តិការណ៍នានាដែលរៀបចំឡើងដោយរាជរដ្ឋាភិបាលកម្ពុជា ក៏ដូចជាស្ថានទូតកម្ពុជាប្រចាំប្រទេសជប៉ុន។

លោក ទុយ រី ឯកអគ្គរាជទូតកម្ពុជាប្រចាំប្រទេសជប៉ុន វាយតម្លៃបែបនេះ នៅក្នុងឱកាសទទួលទានអាហារសាមគ្គីជាមួយសមាជិកសភាជប៉ុន ក្រោមវត្តមានរបស់លោក IMAMURA Masahiro សមាជិកសភា និងជាប្រធានសម្ព័ន្ធមិត្តភាពសភាជប៉ុន-កម្ពុជា កាលពីល្ងាចថ្ងៃទី១៥ ខែមិថុនា ឆ្នាំ២០២៣។ ការរៀបចំពិធីទទួលទានអាហារសាមគ្គីជាមួយសមាជិកសភាជប៉ុននេះ ដើម្បីរឹតចំណងមិត្តភាព និងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលជប៉ុនឱ្យកាន់តែល្អប្រសើរឡើងថែមទៀត។

ឆ្លៀតក្នុងឱកាសនោះ លោក ទុយ រី បានវាយតម្លៃខ្ពស់អំពីកិច្ចសហប្រតិបត្តិការទ្វេភាគីកម្ពុជា-ជប៉ុន និងសមិទ្ធផលសំខាន់ធំៗកន្លងមករវាងប្រទេសទាំងពីរ។ លោកឯកអគ្គរាជទូតកម្ពុជា បានបង្ហាញការកត់សម្គាល់ខ្ពស់ដែលថ្នាក់ដឹកនាំជាន់ខ្ពស់នៃប្រទេសទាំងពីរ ដោយបានចាត់ទុកឆ្នាំ២០២២ ជាឆ្នាំពិសេសបំផុត ពុំធ្លាប់មាននៅក្នុងប្រវត្តិសាស្ត្រ នៃទំនាក់ទំនងទ្វេភាគី ដោយមានជំនួបទ្វេភាគីចំនួន ៤លើក រវាងសម្តេចតេជោ ហ៊ុន សែន និងនាយករដ្ឋមន្ត្រីជប៉ុន។

ទន្ទឹមនេះ លោក ទុយ រី បានកត់សម្គាល់ជាវិជ្ជមានអំពីទស្សនកិច្ចផ្លូវការ និងការចូលរួមកិច្ចប្រជុំអាស៊ាន-ជប៉ុន របស់លោករដ្ឋមន្ត្រីការបរទេសជប៉ុន នៅរាជធានីភ្នំពេញ កាលពីខែសីហា ឆ្នាំ២០២២ និងទស្សនកិច្ចផ្លូវការរបស់ លោក ប្រាក់ សុខុន រដ្ឋមន្ត្រីការបរទេសកម្ពុជាទៅកាន់ប្រទេសជប៉ុន កាលពីខែមករា ឆ្នាំ២០២៣កន្លងទៅ ស្របពេលខួបលើកទី៧០ នៃទំនាក់ទំនងការទូតរវាងកម្ពុជា និងជប៉ុន នៅឆ្នាំ២០២៣នេះ។

ក្នុងនាមរាជរដ្ឋាភិបាលកម្ពុជា លោក ទុយ រី ឯកអគ្គរាជទូតកម្ពុជាប្រចាំនៅជប៉ុន បានថ្លែងអំណរគុណចំពោះរដ្ឋាភិបាល និងប្រជាជនជប៉ុន ដែលបានចូលរួមចំណែកយ៉ាងសំខាន់ដល់ដំណើរការសន្តិភាព និងផ្តល់ការគាំទ្រជាជំនួយសប្បុរសធម៌ដល់ការអភិវឌ្ឍសេដ្ឋកិច្ច-សង្គមកម្ពុជា រួមទាំងជំនួយសម្រាប់ការឆ្លើយតបទៅនឹងជំងឺរាតត្បាតសកលកូវីដ-១៩។

លើសពីនេះ លោកបានវាយតម្លៃខ្ពស់ចំពោះការបន្តគាំទ្ររបស់ជប៉ុនក្នុងការអភិវឌ្ឍកំពង់ផែស្វយ័តក្រុងព្រះសីហនុ និងការសម្រេចគោលដៅកម្ពុជាគ្មានគ្រាប់មីននៅត្រឹមឆ្នាំ២០២៥៕

អត្ថបទ៖ ធឿន វ៉ាន់សុង