បណ្ឌិត ដៀប សុផល៖ អ្នកដែលរំខានដល់ការបោះឆ្នោត គឺប្រឆាំងនឹងលិទ្ធិប្រជាធិបតេយ្យ

សាស្ត្រាចារ្យផ្នែកប្រវត្តិសាស្រ្ត និងវិទ្យាសាស្ត្រនយោបាយ លោកបណ្ឌិត ដៀប សុផល បានអះអាងនៅលើទំព័រហ្វេសប៊ុក ៣ចំណុចពីការបោះឆ្នោត។ ក្នុងនោះ លោកលើកឡើងថា អ្នកដែលធ្វើសកម្មភាពរារាំង ឬ រំខានដល់ដំណើរការបោះឆ្នោត គឺប្រឆាំងនឹងលិទ្ធិប្រជាធិបតេយ្យ។

លោកបណ្ឌិត ដៀប សុផល បានបង្ហោះនៅទំព័រហ្វេសប៊ុកផ្ទាល់ខ្លួនពីចំណុច៣នៃដំណើរការបោះឆ្នោតនៅថ្ងៃទី១១ ខែកក្កដា នេះ ភ្ជាប់ជាមួយនឹងសេចក្តីប្រកាសរបស់ គ.ជ.ប ព្រមានដល់បុគ្គលណាដែលណែនាំឱ្យពលរដ្ឋគូសសន្លឹកឆ្នោតចោល នឹងត្រូវផ្តទ្ទាទោសតាមច្បាប់ ដែលចេញផ្សាយនៅថ្ងៃជាមួយគ្នានេះ។

លោកបណ្ឌិត បានភ្ជាប់ជាមួយនឹងសំណេរ ៣ចំណុច នៃដំណើរការបោះឆ្នោតថា ទី១ ការបោះឆ្នោតជ្រើសរើសស្ថាប័នអំណាច ជាមូលដ្ឋាននៃលទ្ធិប្រជាធិបតេយ្យ។ ទី២ រាល់សកម្មភាពទាំងឡាយណាដែលរារាំង ឬ រំខានដល់ដំណើរការបោះឆ្នោត ជាសកម្មភាពប្រឆាំងនឹងលិទ្ធិប្រជាធិបតេយ្យ។ ទី៣ ការរឹតបន្តឹងដល់សកម្មភាពទាំងឡាយណាដែលរារាំង ឬ រំខានដល់ដំណើរការបោះឆ្នោត ជាការធានាការពារនិរន្តរភាពនៃលទ្ធិប្រជាធិបតេយ្យ។

លោកបណ្ឌិតបានសង្កត់ធ្ងន់ថា នៅពេលណាដែលមានបុគ្គលណាម្នាក់រំលោភច្បាប់ មានន័យថា បុគ្គលនោះបានបាត់​បង់សិទ្ធិសេរីភាពរបស់ខ្លួនហើយ បុគ្គលនោះ ក៏ត្រូវទទួលខុសត្រូវនៅមុខច្បាប់ផងដែរ។

សូមបញ្ជាក់ថា នៅព្រឹកថ្ងៃទី១១ ខែកក្កដា នេះ គណកម្មាធិការជាតិរៀបចំការបោះឆ្នោត (គ.ជ.ប) បានចេញមកព្រមានដល់បុគ្គលណាដែលមានបំណងញុះញង់ប្រជាពលរដ្ឋឱ្យគូសសន្លឹកឆ្នោតចោល ក្នុងដំណើរការបោះឆ្នោតអាណត្តិទី៧ ខាងមុខនេះ ត្រូវផ្តន្ទាទោសតាមច្បាប់។ ក្នុងនោះ នឹងត្រូវផាកពិន័យជាទឹកប្រាក់ចំនួន ៥លានរៀល ទៅ២០លានរៀល តាមមាត្រា ១៤២ថ្មី នៃច្បាប់ស្តីពីវិសោធនកម្មច្បាប់ ស្តីពីការបោះឆ្នោតជ្រើតាំងតំណាងរាស្ត្រ។ ជាមួយគ្នានេះ គ.ជ.ប ក៏បានអំពាវនាវដល់ប្រជាពលរដ្ឋឲ្យចូលរួមបោះឆ្នោតសកលដែលប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗ៕