មកស្គាល់ពីព្រះសង្ឃ និងបុគ្គលល្បីៗ ដែលតែងតែចែក​រំលែក​ចំណេះដឹងលើបណ្តាញសង្គម

បណ្តាញទំនាក់ទំនងសង្គម នាពេលបច្ចុប្បន្នកំពុងតែពេញនិយមសម្រាប់មនុស្សទូទៅគ្រប់មជ្ឍដ្ឋាន។ ក្រៅពីជាកន្លែងសម្រាប់ទាក់ទងគ្នាក្នុងវិស័យការងារ ជំនួញ ចែកចាយព័ត៌មាន និងកម្សាន្ត បណ្តាញទំនាក់ទំនងសង្គម ក៏ជាកន្លែងចែករំលែកនូវចំណេះជំនាញ និងការអប់រំជាច្រើន ដើម្បីជាប្រយោជន៍ជូនដល់សង្គមជាតិផងដែរ។ ថ្ងៃនេះ «កម្ពុជាថ្មី» សូមលើកបង្ហាញនូវព្រះសង្ឃ និងបុគ្គលចំនួន ៦ អង្គ/រូប ដែលតែងតែចែករំលែកចំណេះដឹង និងការអប់រំផ្សេងៗនៅលើបណ្តាញសង្គម។

១. ព្រះភិក្ខុវជិរប្បញ្ញោ គូ សុភាព

ព្រះតេជគុណ គូ សុភាព គឺជាសាស្រ្តាចារ្យនៃសកលវិទ្យាល័យ បញ្ញាសាស្រ្ត និងជាអ្នកនិពន្ធសៀវភៅអប់រំផ្លូវចិត្ត គង់នៅវត្តគល់ទទឹង ភូមិកោះក្របី សង្គាត់ព្រែកថ្មី ខណ្ឌច្បារអំពៅ រាជធានីភ្នំពេញ។ ព្រះភិក្ខុវជិរប្បញ្ញោ គូ សុភាព តែងតែបានចែករំលែកការអប់រំជាច្រើននៅលើទំព័រហ្វេសប៊ុករបស់ព្រះអង្គដែលមានឈ្មោះថា «Kou Sopheap» ដូចជា ការផ្សព្វផ្សាយព្រះធម៌អប់រំផ្លូវចិត្ត និងដោះស្រាយវិបត្តិសង្កម ប្រកបដោយខ្លឹមសារខ្លីៗងាយយល់សម្រាប់ជនានុជនគ្រប់កម្រិត។

២.  ព្រះភិក្ខុធម្មសេនា ហាក់ សៀងហៃ

ព្រះតេជគុណ ហាក់ សៀងហៃ គឺជាប្រធានអង្គការពុទ្ធសាសនាដើម្បីការអប់រំនៃកម្ពុជា-BEC។ ព្រះតេជគុណ ក៏មានប្រជាប្រិយភាពនៅលើបណ្ដាញសង្គមហ្វេសប៊ុកផងដែរ ប៉ុន្តែ ភាគច្រើនព្រះអង្គចែករំលែកការបង្ហោះនៅទំព័រហ្វេសប៊ុកដែលមានឈ្មោះថា «ពុទ្ធសាសនាដើម្បីការអប់រំនៃកម្ពុជា-BEC»។ ព្រះតេជគុណ ហាក់ សៀងហៃ តែងលើកកម្ពស់ការអប់រំទាំងផែ្នកពុទ្ធចក្រ និងអា​ណា​ចក្រ ជា​ពិសេស ​​អប់រំក្រមសីលធម៌ សុជីវធម៌ គុណធម៌ ដល់កុមារ យុវជន សិស្សនិស្សិត និងប្រជាពលរដ្ឋទូទៅ​គ្រប់មជ្ឈដ្ឋាន និងការគាំពារសុខុមាលភាពសង្គមតាម​រយៈ​ការងារមនុស្សធម៌ ។

៣. ព្រះធម្មវិជ្ជា ជួន កក្កដា

ព្រះធម្មវិជ្ជា ជួន កក្កដា ជាព្រះរាជាគណ:ថ្នាក់កិត្តិយស ជាព្រះវិន័យធរ និងជា​នាយកពុទ្ធិកបឋមសិក្សាវត្តប្រាសាទនាងខ្មៅ ខេត្តតាកែវ។ នៅលើទំព័រហ្វេសប៊ុកដែលមានឈ្មោះថា​ «Choun Kakada (ជួន កក្កដា)» គឺតែងតែបង្ហាញពីសកម្មភាពដែលព្រះអង្គបានសម្តែងព្រះធម៌ទេសនា​ តាមកម្មវិធីបុណ្យ ការផ្តល់ឱវាទដល់ភិក្ខុសាមណេរក្នុងវត្ត និងបានបង្ហោះវីដេអូអប់រំខ្លីៗជាច្រើនផ្សេងទៀត។

៤. វេជ្ជបណ្ឌិត គួច ម៉េងលី

លោកវេជ្ជបណ្ឌិត ជាស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន។ វេជ្ជបណ្ឌិត ដែលមានសញ្ជាតិខ្មែរ-អាមេរិករូបនេះ បានចូលរួមយ៉ាងសកម្មក្នុងកិច្ចការងារមនុស្ស​ធម៌ ការអភិវឌ្ឍសហគមន៍ តាមរយៈការខិតខំប្រឹងប្រែងរបស់លោកក្នុងវិស័យអប់រំ វិស័យសុខាភិបាល និងការបម្រើសេវាសង្គម។ ជាមួយគ្នានោះ លោកតែងតែបានផ្តល់នូវដំបូន្មានល្អៗ តាមរយ:បណ្តាញសង្គមរបស់លោកដែលមានឈ្មោះថា «Mengly j. Quach, MD, MPH»។

៥. លោកគ្រូ ឃីម សុខហេង

លោកគ្រូ ឃីម សុខហេង ជាសហគ្រិន អ្នកវិនិយោគ និងជាស្ថានិកវិទ្យាស្ថានសិក្សា ដើម្បីជោគជ័យ(LSI)។ លោក គឺជាអ្នកដឹកនាំច្រើនទម្រង់ និងដឹកនាំឲ្យមានការផ្លាស់ប្តូរ ជាអ្នកឯកទេសអភិវឌ្ឍ និងជំរុញមនុស្សឲ្យមានការផ្លាស់ប្តូរ ហើយក៏ជាវាគ្មិនជំរុញទឹកចិត្តដ៏ល្បីល្បាញមួយរូបផងដែរ។ លោកគ្រូ ឃីម សុខហេង ត្រូវបានគេស្គាល់តាមបណ្តាញសង្គមនានា ​ជាពិសេស នៅលើទំព័រហ្វេសប៊ុករបស់លោកផ្ទាល់ដែលមានឈ្មោះថា «Khim Sok Heng» ដែលតែងតែបង្ហោះវីដេអូ ជំរុញទឹកចិត្តដល់និស្សិត បុគ្គលិក និងមនុស្សជាច្រើនផ្សេងទៀត។

៦. លោក នឹម ឈុន្នី

អគ្គនាយក/ស្ថាបនិក វិបស្សា-VPASSA លោក នឹម ឈុន្នី ជាគ្រូបណ្តុះបណ្តាល និងអ្នកអប់រំផ្លូវចិត្ត ដែលជំរុញលើកទឹកចិត្តតាមបណ្តាក្រុមហ៊ុនល្បីៗ។ លោកក៏ជាបុគ្កលមួយរូបដែលមានភាពល្បីល្បាញនៅលើបណ្តាញសង្គមផងដែរ។ តាមរយ:ទំព័រហេ្វសប៊ុករបស់លោកដែលមានឈ្មោះថា «Noem Chhunny នឹម ឈុន្នី» គឺបានចែករំលែកនូវចំណេះដឹងជាច្រើន ជាពិសេសជំនាញ នៃការដឹកនាំ និងការគ្រប់គ្រងផ្លូវចិត្តជាដើម៕