កម្មករខ្មែរ​ម្នាក់​រក​ចំណូល​បានជាង​​ ៧ ពាន់ដុល្លារ ក្នុងមួយឆ្នាំពី​ការងារនៅ​រោងចក្រ​ស៊ីម៉ងត៍

តំណាងក្រុមហ៊ុនផលិតស៊ីម៉ងត៍ (ខនស៍ សុីមេន) ដ៏ធំមួយនៅខេត្តបាត់ដំបង លោក ហេង សុីនសុីផាត បានឲ្យអ្នកសារព័ត៌មាន​ដឹងថា ក្រោយពីក្រុមហ៊ុនទទួលបានច្បាប់វិនិយោគពីរាជរដ្ឋាភិបាលកម្ពុជាចាប់ដំណើរការផលិត (ស៊ីម៉ងត៍) នៅ​ខែ​តុលាឆ្នាំ២០១៦ រហូតដល់ពេលនេះដំណើរការបាន ៥ ឆ្នាំ និងបានទាញកម្លាំងកម្មករខ្មែរបានជាង ៣០០ នាក់។

កម្មករខ្មែរប្រមាណជាង ៣០០ នាក់នាពេលបច្ចុប្បន្ននេះបានទទួលការបណ្តុះបណ្តាល​ជំនាញពីមន្រ្តីជំនាញជនជាតិចិនរហូតដល់ពួកគេមានសមត្ថភាព ដែលមានតំណែងចាប់ពីកម្មករធម្មតារហូតដល់បុគ្គលិកថ្នាក់កណ្តាល​ និងបានទទួលប្រាក់ក់ខែជាមធ្យមក្នុងម្នាក់ៗ ៧ ពាន់ដុល្លាក្នុងមួយឆ្នាំ និងទទួលបានការស្នាក់នៅ និងអាហារ ៣ ពេល និង​បន្ថែមអាហារពេលយប់មួយពេលទៀតសម្រាប់អ្នកធ្វើការវេនយប់ ដើម្បីលើកកម្ពស់សុខភាពរបស់ពួកគេ។

អគ្គនាយករងក្រុមហ៊ុនបន្តថា ក្រុមហ៊ុនបានផ្តល់ការងារដល់កម្មករខ្មែរគិតចាប់ពីកម្មកររហូតដល់បុគ្គលិកថ្នាក់កណ្តាលជាង ៣០០ នាក់ ដែល​បាន​ធ្វើឲ្យជីវភាពគ្រួសាររបស់ពួកគេបានល្អប្រសើរជាបន្តបន្ទាប់។

ក្រុមហ៊ុនចូលរួមវិនិយោគបង្កើតដោយសហគ្រាស Anhui Conch​ ប្រទេសចិន ដែល​ដាក់ទុនវិនិយោគ ៦០ ភាគរយ និងភាគីកម្ពុជាគឺ​សហគ្រាស ប៉ាស៊ីហ្វិក ដឹកនាំឧកញ្ញ៉ា កុង ទ្រីវ ដាក់ទុនវិនិយោគ ៤០ ភាគរយ លើផ្ទៃដីជាង ៣០០ ហិកតា ស្ថិត​នៅភូមិដូនមាយ ឃុំស្តៅ ស្រុក រតនមណ្ឌល ខេត្តបាត់ដំបង។ បច្ចុប្បន្ន ក្រុមហ៊ុនអាចមានសមត្ថភាពផលិតស៊ីម៉ងត៍បានមួយថ្ងៃ ៥ ពាន់តោន។

ប្រភពខាងលើបន្តថា ក្រុមហ៊ុនមានគម្រោងបង្កើតខ្សែផលិតកម្មចំនួនពីរខ្សែទៀត ដោយមួយខ្សែមានសមត្ថភាពផលិតស៊ីម៉ងត៍ ៥ ពាន់តោនក្នុងមួយថ្ងៃ និងមួយឆ្នាំជិត ២ លានតោន។ បច្ចុប្បន្ននេះ ក្រុមហ៊ុនបានចែកចាយស៊ីម៉ងត៍លើទីផ្សារ ទាំង ២៥ ខេត្ត.ក្រុងក្នុងប្រទេសកម្ពុជា។ ក្រៅពីនេះ ក៏បាននាំ​ចេញ​ទៅប្រទេសថៃលើខេត្តមួយចំនួនផងដែរដូចជាខេត្ត ត្រាត ចាន់បូរី រ៉ាក់យ៉ង និងខេត្តស្រះកែវជាដើម។

លោក​អគ្គនាយករងក្រុមហ៊ុនបាន​បន្ថែម​ថា ក្រុមហ៊ុននឹងជួយផ្តល់ការងារដល់កម្មករខ្មែរកាន់តែច្រើន ដើម្បីជួយលើក កម្ពស់សេដ្ឋកិច្ចគ្រួសាររបស់ពួកគេកាន់តែប្រសើរឡើង តាមរយះការងារនៅជិតផ្ទះរបស់ពួកគេបំផុត៕

អត្ថបទ៖ សៅ សារិទ្ធ