ឥណ្ឌូណេស៊ី ទិញអង្ករកម្ពុជាជាង ១២ម៉ឺនតោន និងមានគោលដៅបន្តទិញច្រើនថែមទៀត

ឥណ្ឌូណេស៊ី បានឯកភាពទិញអង្ករពីកម្ពុជាក្នុងបរិមាណ ១២ម៉ឺនតោន ក្នុងនោះអង្ករស បរិមាណ ១០ម៉ឺនតោន ដោយប្រើប្រាស់យន្តការ ក្រុមហ៊ុនBulog និងក្រុមហ៊ុន ហ្រ្គីនត្រេដ និងបរិមាណ ២៥ ០០០តោនទៀត ជាប្រភេទ​អង្ករប្រណិត ដោយអនុវត្តរវាងក្រុមហ៊ុន ID Food និងសមាជិកសហព័ន្ធស្រូវអង្ករកម្ពុជា CRF។ ចំពោះតម្លៃ និងលក្ខខណ្ឌ័ផ្សេងទៀតភាគីទាំងពីរ និងបន្ត ពិភាក្សាគ្នាក្នុងពេលឆាប់ៗខាងមុខនេះ។

ការឯកភាពទទួលទិញអង្កររបស់កម្ពុជានេះ ធ្វើឡើងនៅក្នុងកិច្ចប្រជុំទ្វេភាគីរវាង ក្រសួងពាណិជ្ជកម្មកម្ពុជា ថ្នាក់ដឹកនាំសហព័ន្ធស្រូវអង្ករកម្ពុជា ជាមួយលោក Pahala Nugraha Mansury អនុរដ្ឋមន្ត្រីក្រសួងការបរ​ទេសនៃសាធារណៈរដ្ឋឥណ្ឌូណេស៊ី កាលពីថ្ងៃទី ១៦ សីហា ឆ្នាំ ២០២៣ នៅរាជធានីភ្នំពេញ។

នៅក្នុងជំនួបនេះ ភាគីកម្ពុជា ដឹកនាំដោយលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានស្នើឱ្យភាគីឥណ្ឌូណេស៊ី បង្កើតកិច្ចសហប្រតិបត្តិការជំរុញការបញ្ជាទិញ អង្ករពីកម្ពុជាទៅឥណ្ឌូនេស៊ី តាមរយៈយន្តការនៃការធ្វើពាណិជ្ជកម្មអង្ករ ក្រោមរូបភាព រដ្ឋាភិបាល និងរដ្ឋាភិបាល (G2G), ឯកជន និង ឯកជន (B2B)។ លើសពីនេះទៀត លោកលើកទឹកចិត្ត អ្នកវិនិយោគឥណ្ឌូនេស៊ី មកវិនិយោគទុននៅកម្ពុជាក្នុងផលិតកម្មស្រូវ ដោយទាក់ទាញវិនិយោគ និងបង្កើតម៉ាស៊ីន​កិនកែច្នៃអង្ករ ស្របតាមស្តង់ដារសម្រាប់ធ្វើការនាំចេញទៅកាន់ ប្រទេសឥណ្ឌូនេស៊ី និងទីផ្សារអន្តរជាតិ។

ជាការឆ្លើយតប ភាគីឥណ្ឌូណេស៊ី បានយល់ព្រមទិញអង្ករពីកម្ពុជាក្នុងបរិមាណ ១២៥ ០០០តោន ក្នុងនោះអង្ករ សបរិមាណ១០០០០០តោន ដោយប្រើប្រាស់យន្តការ ក្រុមហ៊ុនBulog និងក្រុមហ៊ុន ហ្រ្គីនត្រេដ និងបរិមាណ ២៥ ០០០តោនទៀត ជាប្រភេទអង្ករប្រណិត ដោយអនុវត្តរវាងក្រុមហ៊ុន ID Food និងសមាជិកសហព័ន្ធស្រូវអង្ករកម្ពុជា CRF។

ទន្ទឹមនឹងនេះ ភាគីទាំងពីរបានឯកភាពគ្នាឱ្យមានការរៀបចំឡើងវិញនូវអនុស្សារណនៃការយោគយល់​ស្តីពីការធ្វើ​ពាណិជ្ជកម្មអង្ករ រវាងក្រសួងពាណិជ្ជកម្មកម្ពុជា និងក្រសួងពាណិជ្ជកម្មឥណ្ឌូណេស៊ី ក្នុងបរិមាណអង្កររហូតដល់ ២៥០ ០០០តោន ក្នុងរយៈពេលមួយឆ្នាំ សម្រាប់សុពលភាព៤ឆ្នាំ។

សូមបញ្ជាក់ថា ពាណិជ្ជកម្មរវាងកម្ពុជា និងឥណ្ឌូណេស៊ី សម្រេចបានជាង ៦៧០លានដុល្លារ រយៈពេល ៧ខែ ឆ្នាំ ២០២៣ កើនឡើងជាង ២២ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនតែជាង ៥៤៩​លានដុល្លារ។ ក្នុងរយៈពេល ៧ខែនេះ កម្ពុជា នាំចេញទំនិញទៅឥណ្ឌូណេស៊ី បានប្រមាណ ២៤លានដុល្លារ ខណៈការនាំចូលមកវិញមានជាង ៦៤៦លានដុល្លារអាមេរិក៕