ក្រសួងការងារប្រកាសបើកប្រាក់ឧបត្ថម្ភដល់កម្មករព្យួរការងាររោងចក្រចំនួន ២២

ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ធនាគារ វីង (ខេមបូឌា) ម.ក នឹងផ្ញើសារអំពីការបើកប្រាក់​ឧបត្ថម្ភរបស់រាជរដ្ឋាភិបាលទៅលេខទូរសព្ទ ដែលកម្មករបានផ្ដល់មកឱ្យក្រសួងតាមរយៈរដ្ឋបាលរោងចក្រ នាពេល​កន្លងមក។

បើតាមក្រសួងការងារ ប្រាក់ឧបត្ថម្ភនេះ សំដៅដល់កម្មករនិយោជិត ដែលបានព្យួរកិច្ចសន្យា ការងារក្នុងខែមិថុនា ខែកក្កដា និងខែសីហា ឆ្នាំ២០២៣ ចំពោះរោងចក្រ ចំនួន ២២នៃវិស័យវាយនភណ្ឌ កាត់ដេរ ផលិត ស្បែកជើង និងផលិតផលិតផលធ្វើដំណើរនិងកាបូប (ដូចមានភ្ជាប់នៅក្នុងឧបសម្ព័ន្ធ) ស្របតាមស្មារតីនៃសេចក្ដីណែនាំ​លេខ០២០/២៣ ក.ប/ ស.ណ.ន.ខ.ល ចុះថ្ងៃទី១៥ ខែមីនា ឆ្នាំ២០២៣ ស្ដីពីការព្យួរកិច្ចសន្យាការងារ។

​យោងតាមការជូនដំណឹងរបស់ក្រសួងការងារ ប្រាក់ឧបត្ថម្ភនេះ នឹងត្រូវបើកផ្ដល់ជាប្រាក់រៀល និងអាស្រ័យ​លើចំនួនថ្ងៃនៃការព្យួរកិច្ចសន្យាការងារ ក្នុងនោះចំនួន៖ – ៨១ ០០០រៀល (២០ដុល្លារអាម៉េរិក) សម្រាប់ការ​ព្យួរកិច្ចសន្យាការងាររយៈពេល ៧ថ្ងៃ ដល់ ១៤ថ្ងៃ ១៦២ ០០០រៀល (៤០ដុល្លារអាម៉េរិក) សម្រាប់ការ​ព្យួរកិច្ចសន្យាការងាររយៈពេល ១៥ថ្ងៃ ដល់ ១ខែ។

ក្រសួងសូមរំឮកថា ធនាគារ វីង (ខេមបូឌា) ម.ក នឹងបង្វិលប្រាក់ឧបត្ថម្ភនេះជូនរាជរដ្ឋាភិបាលវិញ ប្រសិនជាបងប្អូន ខកខាន មិនបានទៅបើកប្រាក់ឧបត្ថម្ភនេះ ក្នុងរយៈពេល ២១ថ្ងៃ បន្ទាប់ពីទទួលបានសារតាមទូរសព្ទពីធនាគារ វីង (ខេមបូឌា) ម.ក។ ដើម្បីបើកប្រាក់ឧបត្ថម្ភនេះ កម្មករកម្មការិនី ត្រូវយកអត្តសញ្ញាណប័ណ្ណសញ្ញាតិខ្មែរ និងទូរសព្ទ​ដែលទទួលបានសារនោះ ទៅកាន់ភ្នាក់ងារវីងដែលនៅជិតបំផុត ដោយមិនតម្រូវឱ្យបង់​ថ្លៃសេវាទៅ​ភ្នាក់ងារវីង​ឡើយ​ពេលបើកប្រាក់ឧបត្ថម្ភនេះ។

ក្រសួងការងារ បានសង្កត់ធ្ងន់ថា ក្នុងករណីកម្មករនិយោជិត ដែលបម្រើការងារនៅរោងចក្រទាំង២២ នេះ មិនបានទទួលសារទូរសព្ទពីធនាគារវីង (ខេមបូឌា) ម.ក នោះសូមបងប្អូនទំនាក់ទំនងសួរព័ត៌មានបន្ថែម ឬធ្វើបច្ចុប្បន្នភាពលេខទូរសព្ទរបស់ខ្លួនទៅរដ្ឋបាលរោងចក របស់ខ្លួន។ ក្រសួងនឹងបន្តជូនដំណឹងដល់​កម្មករនិយោជិតរោងចក្រដទៃផ្សេងទៀត ដែលទទួលបានការអនុញ្ញាតព្យួរកិច្ចសន្យាការងារ​អំពីការបើកផ្តល់​ប្រាក់ឧបត្ថម្ភនេះ។

សូមបញ្ជាក់ថា នេះជាជុំទី៦ហើយ ដែលរាជរដ្ឋាភិបាល ធ្វើការបើកផ្ដល់ប្រាក់ឧបត្ថម្ភជូនកម្មករនិយោជិតក្នុងវិស័យ​កាត់ដេរ ដែលត្រូវបានព្យួរ កិច្ចសន្យាការងារ៕