ក្រុមហ៊ុនកូរ៉េ​មួយ​ ចង់​បង្កើតរោងចក្រកែច្នៃ​សំណល់ប្លាស្ទិក ទៅជាគ្រឿងប្រើប្រាស់ប្រចាំថ្ងៃ

លោក គួច ចំរើន អភិបាលនៃគណ:អភិបាលខេត្តព្រះសីហនុនៅព្រឹកថ្ងៃទី៧ ខែកញ្ញានេះ បានអនុញ្ញាតិ​ឲ្យ​ប្រតិភូក្រុមហ៊ុន​កែច្នៃ​សំរាមសំណល់ប្លាស្ទិក ធ្វើបទបង្ហាញដឹកនាំដោយលោក KIM SANG YOUNG អភិបាលក្រុមហ៊ុន ដេហាន់ ខូភើរ៉េត ប្រទេសកូរ៉ និងកុ្រមការងារ ដោយមានការចូលរួមពីលោកអភិបាលក្រុងព្រះសីហនុ និងលោកប្រធានមន្ទីរពាក់ព័ន្ធនៅសាលាខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក KIM SANG YOUNG អភិបាលក្រុមហ៊ុន ដេហាន់ ខូភើរ៉េត ប្រទេសកូរ៉ បានជម្រាបជូនអភិបាលខេត្តព្រះសីហនុថា ក្រុមហ៊ុនរបស់លោកកំពុងដំណើរការកែច្នៃ​សំណល់ប្លាស្ទឹកនៅកោះចេជូ ប្រទេសកូរ៉េ ហើយក្រុមហ៊ុនមានបំណងមកធ្វើការកែច្នៃ​សំណល់ប្លាស្ទឹកនៅក្នុងខេត្តព្រះសីហនុ ក្នុងគោលបំណងចូលរួមកាត់បន្ថយថង់ប្លាស្ទិក​នៅកម្ពុជា និងកែច្នៃ​សំណល់ប្លាស្ទឹកទៅជាគ្រឿងប្រើប្រាស់ប្រចាំថ្ងៃ។

លោកបានបញ្ជាក់ថា កាលមុនជំងឺកូវីដរាតត្បាត ក្រុមហ៊ុនរបស់លោកបានបង្កើតរោងចក្រនៅខេត្តកំពង់ស្ពឺ ប្រមូលទិញសំណល់ប្លាស្ទឹកក្នុងមួយគីឡូក្រាម ២៥០រៀល រហូតដល់ ៧០០រៀល ក៏ប៉ុន្តែដោយការប្រមូលទិញមិនមានបរិមាណគ្រប់​ក្នុងការផលិត គួបផ្សំនឹងការរាតត្បាតនៃជំងឺកូវីដ ក្រុមហ៊ុនបានបិទរោងចក្រកែច្នៃ​សំណល់ប្លាស្ទឹករហូតមកដល់ថ្ងៃនេះ។ ពេលនេះក្រុមហ៊ុនមានគោលបំណងចង់មកធ្វើការញែកសំរាម​កែច្នៃ​សំណល់ប្លាស្ទឹកនៅខេត្តព្រះសីហនុ ដោយធ្វើការញែកនៅក្នុងទីលានចាក់សំរាម ញែក​យកតែសំណល់ប្លាស្ទឹកមកផលិតជាសម្ភារប្រើប្រាស់ផ្សេងៗបម្រើ​ឲ្យ​តម្រូវការប្រចាំថ្ងៃរបស់បងប្អូនប្រជាពលរដ្ឋ។

លោក គួច ចំរើន អភិបាលខេត្តព្រះសីហនុ​បានស្វាគមន៍និងគាំទ្រយ៉ាងពេញទំហឹង​ និងផ្តល់ដី​ឲ្យ​ក្រុមហ៊ុនសម្រាប់ធ្វើ រោងចក្រនៅទីលានចាក់សំរាមថែមទៀតផង ក៍ប៉ុន្តែមិនប្រគល់ដីជាកម្មសិទ្ធនោះទេ។

ក្នុងឱកាសនេះដែរលោក អភិបាលខេត្តបានធ្វើការណែនាំ​ឲ្យ​ប្រធានមន្ទីរបរិស្ថានខេត្តព្រះសីហនុ នាំប្រតិភូទៅសិក្សានៅទីលានចាក់សំរាមជាក់ស្តែងដោយសារសំរាមនៅកម្ពុជាគឺជាសំរាមចម្រុះ ដែលមិនទាន់ញែកមានដូចជា សំណល់ផ្ទះបាយ សំណល់ប្លាស្ទឹក និងសំណល់ជាច្រើនប្រភេទទៀត ដើម្បីក្រុមហ៊ុនមានមូលដ្ឋានយកទៅសិក្សាក្នុងការបំពាក់ម៉ាស៊ីនញែកសំរាមរើសយកតែសំណល់ប្លាស្ទិក។

លោកអភិបាលខេត្តសង្ឃឹមថា ក្រុមហ៊ុននឹងសិក្សាស៊ីជម្រៅ ដើម្បីឈានទៅបំពាក់ម៉ាស៊ីនញែកបង្កើតជារោងចក្រកែច្នៃ​សំណល់ប្លាស្ទឹកនៅក្នុងខេត្តព្រះសីហនុនៅពេលខាងមុខ។ ៕

អត្ថបទ៖ ស៊ុយ ចាន់ធា