អ្នកលក់ចាបក្បែរលោកតាដំបងក្រញូងថ្ងូរលក់​មិន​បាច់ រកលុយបង់ថ្លៃឆ័ត្រមិនបាន

បច្ចុប្បន្ន បរិវេណជុំវិញរូបសំណាកលោកតាដំបងក្រញូងត្រូវបានជួសជុល និងកែលម្អដើម្បីឲ្យមានសោភ័ណភាព និងសណ្ដាប់ធ្នាប់ល្អ ទាំងការចតយានយន្តក៏ដូចជាការលក់សំណែនផ្សេងៗ សម្រាប់ប្រជាពលរដ្ឋដែលចង់ទៅបែរបន់ឬប៉ងប្រាថ្នាអ្វីមួយនៅចំពោះមុខរូបសំណាកលោកតាដំបងក្រញូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកស្ត្រីម្នាក់ដែលរស់នៅភូមិអូរចារ សង្កាត់អូចារក្រុងបាត់ដំបង បាន​ប្រកបមុខរបរលក់សត្វចាបនៅខាងមុខលោក​តាដំបងក្រញូង អស់រយៈពេលជាង ២០ ឆ្នាំមក។ ពីមុន​ធ្លាប់​លក់នៅលើខឿនខាងមុខព្រះភ័ក្រ្តផ្ទាល់ ងាយស្រួលដល់ប្រជាពលរដ្ឋដែលឡើងមកអុជធូបបែរបន់ និងមានបំណងប្រាថ្នាដោះលែងសត្វបានឃើញលក់ផ្ទាល់អាចរកបានប្រាក់ចំណូលសមរម្យ ដើម្បីទប់ទល់និងជីវភាពប្រចាំថ្ងៃ។

យ៉ាងណាមិញ បើ​ស្ត្រីរូបនេះនៅរយៈពេលប៉ុន្មានខែចុងក្រោយនេះ បន្ទាប់ពីមានការជួសជុលនិងកែលម្អបរិវេណជុំវិញរូបសំណាក់លោកតាដំបងក្រញូងរួចមក គឺមានអ្នកដេញថ្លៃក្នុងការគ្រប់គ្រងនិង​យកប្រាក់ឈ្នួលថ្លៃលក់ទំនិញគ្រប់យ៉ាងនៅ​ជុំវិញរូបសំណាក ដូចជាលក់ផ្លែឈើ ដូងខ្ចី ចេកទុំសត្វចាប និងរូបថតរូបសំណាងលោកតា​ជាដើម ដោយអ្នកដេញថ្លៃនោះប្រមូលលុយមួយសប្តាហ៍​ឬ​មួយខែទៅតាមមុខរបរនីមួយៗ។

បើ​តាមការរៀបរាប់ពីអ្នកលក់សត្វចាបរូបនេះ គាត់ត្រូវបានគេប្រមូលក្នុងមួយសប្តាហ៍ម្ដងក្នុងតម្លៃ ៣ មុឺនរៀល។ ចំពោះ​ផលវិបាកគឺគេមិនអនុញ្ញាតឲ្យគាត់យកសត្វចាបទៅលក់នៅចំពោះមុខលោកតាឡើយ ដោយឲ្យលក់នៅក្រោមឆ័ត្រក្បែរជ្រុង​សាលាម្ខាងថ្នល់ ហេតុដូច្នេះហើយទើបធ្វើឲ្យអ្នកដែលមកបែរបន់មិនអាចមើលឃើញការលក់ចាបរបស់គាត់ឡើយគឺមានថ្ងៃខ្លះសឹងតែលក់ចាបមួយគូមិនបានផង ហើយក៏ពិបាកនឹងរកលុយសម្រាប់បង់ថ្លៃឆ័ត្រនេះដែរគឺនិយាយឲ្យចំលក់ដាច់ខ្លះតែក្នុងថ្ងៃសីលតែប៉ុណ្ណោះ។

ស្រ្តី​រូបនេះ​បាន​បន្ត​ថា ដំបូងឡើយអ្នកដេញថ្លៃបានមកហាមគាត់មិនឲ្យលក់សត្វចាបដោយគេលើឡើងថា ចង់លុបបំបាត់ការជួញដូរសត្វព្រៃ ប៉ុន្តែគាត់បានតបវិញថាការលក់សត្វចាបនេះជាជំនឿរបស់ប្រជាពលរដ្ឋខ្មែរតាំងពីយូរលង់ណាស់មកហើយ ដែលមិនអាចលុបបំបាត់បានទេ ព្រោះពលរដ្ឋខ្លះត្រូវមករកទិញចាបដើម្បីព្រលែងឲ្យមានសេរីភាពដើម្បីដោះទុក្ខ​សោក​ចង្រៃចេញពីខ្លួនរបស់គេផង ដូច្នេះហើយទើបគេព្រមឲ្យលក់ឡើងវិញ។ ប៉ុន្តែទីតាំងដែលឲ្យលក់គឺនៅម្ខាងថ្នល់នៃជ្រុង​របងសាលាក្រោយឆ័ត្រដែលពិបាកក្នុងការលក់ដូរ ព្រោះគេមើលមិនឃើញហើយគាត់ក៏ទទូចសុំឱ្យមានការលើកលែង​ឬបញ្ចុះតម្លៃបន្ថែមទៀតដោយសារការលក់មិនដាច់៕

អត្ថបទ៖ សោ និយមរ័ត្ន