កិច្ចព្រមព្រៀងផ្តល់ហិរញ្ញប្បទានឥតសំណងបំពេញបន្ថែមទុនវិនិយោគជាមួយសហគមន៍កសិកម្មម្រេចសរីរាង្គ មណ្ឌលគិរី

លោក ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណកម្មាធិការ​ដឹកនាំ​គម្រោង CASDP បានចូលរួមជាអធិបតី ក្នុងពិធីចុះកិច្ចព្រមព្រៀងផ្តល់ហិរញ្ញប្បទានឥតសំណងបំពេញ​បន្ថែមទុន​វិនិយោគជាមួយសហគមន៍កសិកម្មម្រេចសរីរាង្គ មណ្ឌលគិរី ដែលជាសហគមន៍ទី១៩ នៅថ្ងៃទី ០២ តុលា ឆ្នាំ ២០២៣។

សហគមន៍ បានលើកផែនការក្នុងទុនវិនិយោគ សរុបប្រមាណជា ២៧ម៉ឺនដុល្លា ក្នុងនោះ ៦០% ជាទុន​ដែលសហគមន៍​មានស្រាប់ក្នុងដៃ ៤០% ជាទុនផ្តល់ពីគម្រោង និងផ្លូវកៅស៊ូ១ខ្សែក្នុងតម្លៃប្រមាណជា ៨៧ម៉ឺនដុល្លារ។

ក្រសួងកសិកម្ម រុក្ខាប្រមាញ់ និងនេសាទ ជាសេនាធិការរាជរដ្ឋាភិបាលក្នុងការអនុវត្តកម្មវិធីពិពិធកម្មកសិកម្ម (CASDP) ដែលផ្តោតសំខាន់ក្នុងការពង្រឹងសមត្ថភាពសហគមន៍កសិកម្ម ដើម្បីក្លាយទៅជាសហគ្រិនសហគមន៍កសិកម្ម តាមអនុ​សាសន៍​ណែនាំរបស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងស្របតាមគោល​នយោ​បាយ​វិស័យកសិកម្មសម្រាប់រាជរដ្ឋាភិបាលកម្ពុជាអណត្តិទី៧នេះ។

ក្នុងកម្មវិធីនេះ បាននិងកំពុងវាយតម្លៃសម្រិតសម្រាំងជ្រើសយកបណ្តាសហគមន៍កសិកម្ម ដែលមានសមត្ថភាពក្នុង​កម្រិតកំណត់មួយ ( សមត្ថភាពគ្រប់គ្រង ផែនការ គណនេយ្យ ចំណាត់ការដោយមិនមានលាក់កំបាំង។ ដើម្បីចូល​រួមអនុវត្ត ដោយមានគោលននោបាយគាំទ្រ (1) ផ្តល់ហិរញ្ញប្បទានឥតសំណងបំពេញបន្ថែមទុនវិនិយោគ ៤០% (2) ផ្តល់ការកសាងសមត្ថភាពបច្ចេកទេស ពាក់ព័ន្ធផលិតកម្មជាធុរកិច្ច និង (3) ផ្តល់ជូនហេដ្ឋារចនាសម្ព័ន្ធគាំ​ទ្រចាំបាច់​ដល់សហគមន៍មានផ្លូវថ្នល់ និងប្រព័ន្ធស្រោចស្រពជាដើម។

សូមបញ្ជាក់ថា មកដល់ថ្ងៃនេះ មានសហគមន៍កសិកម្មកម្ពុជា ១៩ ដែលបានសម្រេចផ្តល់ហិរញ្ញប្បទានឥតសំណង​បំពេញបន្ថែមទុនវិនិយោគ៕