ធនាគារហត្ថាបដិសេធការចុះផ្សាយថា មន្ត្រីធនាគារបង្ខំឱ្យអតិថិជនលក់ទ្រព្យសម្បត្តិ​ដើម្បីសងធនាគារ

ធនាគារហត្ថា បានចេញសេចក្តីបំភ្លឺចំពោះការចុះផ្សាយថា មន្ត្រីធនាគារហត្ថា បានបង្ខំឱ្យអតិថិជនម្នាក់ ដែលបច្ចុប្បន្ន​កំពុងរស់នៅក្នុងភូមិពោធិ៍អណ្តែត សង្កាត់ព្រែកស្ដី ក្រុងសំពៅពូន ខេត្តកណ្តាល លក់ទ្រព្យសម្បត្តិ ដើម្បីយកលុយ​ទៅសងធនាគារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីបំភ្លឺ មានខ្លឹមសារដូច្នេះថា«នាពេលថ្មីៗកន្លងមកនេះ ធនាគារហត្ថា បានសង្កេតឃើញថា មានបណ្តាញ​ទំនាក់ទំនងសង្គមមួយចំនួនបានផ្សាយព័ត៌មានប្រាសចាកពីការពិត ក្នុងន័យញុះញង់ ចោទប្រកាន់ និងបង្ហូចកេរ្តិ៍ឈ្មោះ ធនាគារហត្ថា ដោយបានចុះផ្សាយថា៖ មន្ត្រីធនាគារហត្ថា បានបង្ខំឱ្យអតិថិជនម្នាក់ ដែលបច្ចុប្បន្នកំពុងរស់​នៅក្នុងភូមិ​ពោធិ៍អណ្តែត សង្កាត់ព្រែកស្ដី ក្រុងសំពៅពូន ខេត្តកណ្តាល លក់ទ្រព្យសម្បត្តិ ដើម្បីយកលុយទៅសងធនាគារ។

ករណីនេះធនាគារហត្ថា បានធ្វើការបំភ្លឺ និងបញ្ជាក់ថា ពុំមានករណីដូចការចោទប្រកាន់ និងបង្កាច់ បង្អួច ខាងលើ​នោះឡើយ។ កន្លងមកមន្រ្តីធនាគារហត្ថា តែងតែប្រកាន់យ៉ាងខ្ជាប់ខ្ជួននូវដំណោះ ស្រាយប្រកប​ដោយភាពទន់ភ្លន់ មានក្រមសីលធម៌វិជ្ជាជីវៈខ្ពស់ និងមានការយោគយល់អធ្យាស្រ័យ យ៉ាងច្រើន​ជាមួយអតិថិជន​របស់ខ្លួន។

ធនាគារហត្ថា ប្រកាន់ខ្ជាប់ជានិច្ចវិជ្ជាជីវៈក្នុងការធ្វើអាជីវកម្ម និងជាគ្រឹះស្ថានដែលបម្រើសេវាហិរញ្ញវត្ថុ​ប្រកបដោយ​ភាពកក់ក្ដៅ តម្លាភាព និងសុក្រឹតភាព ដើម្បីការរីកចម្រើនរបស់សាធារណជនទូទៅ។ ធនាគារហត្ថា បាននិងកំពុង​អនុវត្តយ៉ាងពេលលេញនូវយន្តការ ច្បាប់តាមផ្លូវតុលាការ ស្របតាមច្បាប់ និងបទប្បញ្ញត្តិជាធរមាន ក្នុងករណីមាន​ការលក់ទ្រព្យសម្បត្តិសង បំណុល ចំពោះអតិថិជនណាដែលមានលទ្ធភាពសង តែពុំមានឆន្ទៈសង។

នៅក្នុងខ្លឹមសារដដែលនេះ ធនាគារហត្ថា ក៏បានអរគុណដល់អតិថិជន និងសាធារណជនទាំងអស់ ដែលតែងតែគាំទ្រ និងបន្តការគាំទ្រសេវាកម្មរបស់ ធនាគារហត្ថា កន្លងមកផងដែរ៕