មន្ត្រីក្រសួងការងារទទូចកុំឱ្យកម្មកររោងចក្របរិភោគគ្រឿងជាតិផ្អែមច្រើន

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានធ្វើការអំពាវនាវដល់បងប្អូនកម្មករនិយោជិតដែលកំពុងបម្រើការងារនៅតាមរោងចក្រសហគ្រាសទាំងអស់ត្រូវយកចិត្តទុកដាក់ការពារសុខភាពឱ្យបានល្អ និងកុំបរិភោគចំណីអាហារទាំងឡាយណាដែលធ្វើឱ្យប៉ះពាល់ដល់សុខភាពបង្កឱ្យឆ្លងជំងឺនានា។

ការអំពាវនាវរបស់អ្នកនាំពាក្យក្រសួងការងារនេះឆ្លើយតបទៅនឹងបច្ចុប្បន្ននេះមានបងប្អូនកម្មករនិយោជិតមួយចំនួនបានបរិភោគចំណីអាហារមិនបានត្រឹមត្រូវធ្វើឱ្យប៉ះពាល់ដល់សុខភាពពិសេសបរិភោគគ្រឿងកំប៉ុងផ្អែមច្រើនដែលអាចប្រឈមនឹងកើតជំងឺទឹកនោមផ្អែមទៅថ្ងៃអនាគត។

លោក កត្តា អ៊ន រដ្ឋលេខាធិការនិងជាអ្នកនាំពាក្យក្រសួងការងារនិងបណ្តបណ្តាលវិជ្ជាជីវៈបានមានប្រសាសន៍នៅព្រឹកថ្ងៃទី២១តុលានេះថាការបរិភោគចំណីអាហារមានអនាម័យត្រឹមត្រូវនឹងជួយឱ្យបងប្អូនកម្មករនិយោជិតទទួលបាននូវសុខភាពល្អបំពេញការងារបានល្អពិសេសធ្វើឱ្យខ្សែច្រវ៉ាក់ផលិតកម្មនៅតាមរោងចក្រសហគ្រាសនានាមានកំណើនខ្ពស់ឆ្លើយតបទៅតាមរម្រូវការរបស់អតិថិជនជាអ្នកបញ្ជាទិញបានទាន់ពេលវេលា និងជួយទាក់ទាញវិនិយោគិនមកវិនិយោគកាន់តែច្រើនបង្កើតឱកាសការងារជូនដល់ប្រជាពលរដ្ឋកាន់តែច្រើនថែមទៀត។

លោកបានបន្តថាប៉ុន្តែប្រសិនបើបងប្អូកម្មករនិយោជិតបរិភោគចំណីអាហារមិនមានអនាម័យឬចំណីអាហារណាប៉ះពាល់ដល់សុខភាពវាមិបត្រឹមធ្វើឱ្យបងប្អូនត្រូវប្រឈមមុខនឹការឆ្លងជំងឺផ្សេងៗប៉ះពាល់ដល់ការងារបាត់បង់ប្រាក់ចំណូលពិសេស អាចបាត់បង់កម្លាំងពលកម្មនិងធនធានដ៏សំខាន់សម្រាប់ប្រទេសជាតិផងដែរ។

លោកបានអំពាវនាវដល់បងប្អូនកម្មករនិយោជិតយកចិត្តទុកដាក់ថែរក្សាសុខភាព បរិភាគចំណីអាហារមានអនាម័យ និងចូលរួមថែរក្សាបរិស្ថាន ដើម្បីជៀសវាងនូវជំងឺនានា។

គួរបញ្ជាក់ថាបច្ចុប្បន្ននេះមានបងប្អូនកម្មករនិយោជិតមួយចំនួនបានបរិភោគចំណីអាហារមិនបានត្រឹមត្រូវធ្វើឱ្យប៉ះពាល់ដល់សុខភាពដោយមិនដឹងខ្លួនដោយមានអ្នកខ្លះបរិភោគគ្រឿងកំប៉ុងផ្អែមជំនួយកម្លាំងក្នុងថ្ងៃៗពី២ទៅ៤កំប៉ុងជាដើមដែលអ្នកជំនាញសុខភាពព្រួបារម្ភថានៅពេលដែលពួកគាត់បន្តបរិភោគយូរៗទៅនឹងត្រូវប្រឈមមុខនឹងកើតជំងឺទឹកនោមផ្អែមជាជំងឺរ៉ាំរ៉ៃព្យាបាលមិនជាប៉ះពាល់គ្រួសារនិងសង្គមជាតិ៕

អត្ថបទ៖ សំអឿន