ផ្ទះពលរដ្ឋនៅសង្កាត់ចាក់អង្រែក្រោម​​បន្តលិចលង់កាន់តែខ្លាំង

លោក ជា សុខៃ ចៅសង្កាត់ចាក់អង្រែក្រោមបានប្រាប់កម្ពុជាថ្មីថា​ គិតត្រឹមម៉ោង ១១ ​ថ្ងៃទី ២៣ ​ខែតុលា​នេះទឹកជំនន់បង្កឲ្យលិចលង់លំនៅឋាន​របស់ប្រជាពលរដ្ឋ​ក្នុងសង្កាត់​ចាក់អង្រែក្រោម​ ខណ្ឌមានជ័យ ខ្លាំង​ជាងម្សិលមិញទៅទៀត។

​លោកចៅសង្កាត់បានបន្តថា ខណៈនេះលំនៅឋានរបស់ប្រជាពលរដ្ឋចំនួន៤ភូមិបានរងការលិចលង់​ចំណែក៤ភូមិទៀតមិនទាន់លិចលង់ទេ។ ម្យ៉ាងទៀត៤ភូមិដែលលិចលង់ពីម្សិលមិញ​នោះ​ទឹកបានកើនឡើងបន្ថែមទៀតដែលអាជ្ញាធរបានបន្ថែមម៉ាសុីនបូមទឹកខ្នាតធំចំនួន២គ្រឿងទៀតសារុប៦គ្រឿងហើយ។

​លោក ជា សុខៃ បានសម្ដែងការដឹងគុណដល់លោកអភិបាលខណ្ឌមានជ័យដែលបាននាំ​យក​ម៉ាស៊ីនខ្នាតធំដាក់បូមទឹកចេញពីទីតាំងរងការលិចលង់នៅសង្កាត់ចាក់អង្រែក្រោមបានទាន់ពេលបែបនេះ។​

ជំនន់ទឹកភ្លៀងបានលិចលង់លំនៅដ្ឋានប្រជាពលរដ្ឋចំនួន៤ភូមិក្នុងមូលដ្ឋានសង្កាត់ចាក់អង្រែក្រោមកាលពីថ្ងៃទី២១ខែតុលាមកនេះ៕

អត្ថបទ៖ នរា