ផ្លូវ​ត្រង់ចំណុចផ្ទុះទុយោបូមខ្សាច់នៅចាក់អង្រែជួសជុលរួចរាល់​ដូចដើម

លោក ជា សុខៃ ចៅសង្កាត់ចាក់អង្រែក្រោមបានប្រាប់ឱ្យដឹងនៅព្រឹកថ្ងៃទី ១៣ ខែមករា ២០២៣នេះថា កំណាត់ផ្លូវជាតិលេខ២ ស្ថិតក្នុងភូមិព្រែកតាឡុងដែលរងការខូចខាតដោយសារផ្ទុះទុយោបូមខ្សាច់ពីក្រោមកាលពីព្រឹកថ្ងៃទី ១២ ខែមករា ម្សិលមិញ ត្រូវបានមន្ទីរសាធារណការរាជធានីភ្នំពេញជួសជុលបានល្អស្អាតដូចដើមវិញហើយ។

លោកចៅសង្កាត់បានបន្តថា នៅព្រឹកថ្ងៃទី ១៣ ខែមករានេះកំណាត់ផ្លូវដែលរងការខូចខាតត្រូវបានជួសជុលរួចរាល់ហើយអ្មកធ្វើដំណើរបានឆ្លងកាត់ដូចធម្មតាវិញហើយដោយការជួសជុលគឺធ្វើឡើងតាំងពីព្រឹករហូតដល់យប់កណ្តាល​អធ្រាតលុះព្រឹកឡើងថ្ងៃទី ១៣ បានដំណើការឆ្លងកាត់ដូចដើមវិញ។

ពាក់ពន្ធ័ទៅនឹងទុយោបូមខ្សាច់ក្រោមផ្លូវជាតិលេខ២ដែលផ្ទុះទុយោម្សិលមិញនេះត្រូវបានផ្នែកជំនាញជីកកកាយយកចេញរួចចាក់គ្រឹះថ្មឡើងវិញដោយពុំមានទុយោក្រោមផ្លូវទៀតឡើយ។

កាលពីវេលាម៉ោង ៦ ព្រឹកថ្ងៃទី ១២ ខែមករាម្សិលមិញនេះ កំណាត់ផ្លូវជាតិលេខ២ត្រង់ចំណុចភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញបានរងការខូចខាតដោយសារផ្ទុះទុយោបូមខ្សាច់ពីក្រោមផ្លូវដែលមានប្រវ៉ែង១៤ម៉ែត្រនិងទទឹង២២ម៉ែត្រ។ ហើយភ្លាមៗនោះអាជ្ញាធរបានចុះពិនិត្យ និងរៀបចំសម្រួលចរាចរណ៍ព្រមទាំងដាក់គ្រឿងចក្រជួស​ជុលភ្លាមៗរហូតដល់យប់ទើបជួសជុលរួចជាស្ថាពរ៕

អត្ថបទ៖ នរា