លោក ប៉ែន សុវិជាតិ៖ កម្ពុជា អាចនឹងបន្តឡើង​ថ្លៃប្រេង ខណៈប្រេងឆៅ​អន្តរជាតិឡើងថ្លៃ

តម្លៃប្រេងឆៅនៅលើទីផ្សារអន្តរជាតិនៅតែបន្តឡើងថ្លៃ បង្កឡើងដោយសង្គ្រាមនៅអ៊ីស្រអែល និងវិបត្តិរួមផ្សំផ្សេងៗទៀត ដែលធ្វើឱ្យប្រេងដែលបានចម្រាញ់ហើយ ក៏ឡើងថ្លៃដូចគ្នា។

ដោយឡែកទីផ្សារប្រេងលក់រាយនៅកម្ពុជា ក៏អាចនឹងបន្តឡើងថ្លៃ ប្រសិនបើប្រេងឆៅនៅលើទីផ្សារអន្តរជាតិឡើងថ្លៃ ជាពិសេសប្រេងនៅប្រទេសដែលកម្ពុជាចូលមានដូចជា ថៃ វៀតណាម និងសិង្ហបុរី។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានលើកឡើងថា ការកើតឡើងចម្បាំងរវាងហាម៉ាស់ និងអ៊ីស្រអែល ដែលជាប្រទេសនាំចេញប្រេង ធ្វើឱ្យមានការប្រុងប្រយ័ត្នខ្ពស់ក្នុងការ​ផលិតប្រេង។ នៅពេលដែល​ទីផ្សារប្រេង​រងការប៉ះទង្គិចដោយសារឥទ្ធិពលអវិជ្ជមានពីសង្គ្រាម ផលិតកម្មត្រូវកាត់បន្ថយ តម្រូវការទីផ្សារកើនឡើង នឹងជំរុញឱ្យប្រេងឆៅអន្តរជាតិហក់ឡើងថ្លៃ ធ្វើឱ្យតម្លៃប្រេងដែលបានចម្រាញ់ហើយ ក៏ឡើងថ្លៃផងដែរ។

អ្នកនាំពាក្យក្រសួងពាណិជ្ជកម្ម បានគូសបញ្ជាក់ថា កម្ពុជា ជាប្រទេសនាំចូលប្រេងសុទ្ធសាធ គឺត្រូវពឹងផ្អែក​តម្លៃលក់នៅលើទីផ្សារអន្តរជាតិ។ «ជារួម បើកាលណាប្រេងនៅប្រទេសសិង្ហបុរីមានតម្លៃកើនឡើង តម្លៃប្រេងលក់​រាយនៅក្នុងប្រទេសកម្ពុជា យើងក៏ឡើងថ្លៃដូចគ្នា»។ នេះជាការបន្ថែមរបស់លោក ប៉ែន សុវិជាតិ។

ជាក់ស្តែងក្រសួងពាណិជ្ជកម្ម បានប្រកាសនៅថ្ងៃទី ២១ តុលា ពីតម្លៃប្រេងលក់រាយនៅកម្ពុជា បន្តកើនឡើង ៥០រៀល ស្មើនឹង ៤៣៥០រៀល ក្នុងមួយលីត្រ និងប្រេងម៉ាស៊ូតរក្សាតម្លៃ ដដែល គឺ ៤៦៥០រៀល។ ដោយតម្លៃនេះ អនុវត្តចាប់​ពីថ្ងៃទី ២១-៣១ ខែ តុលាឆ្នាំ ២០២៣។ ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយ​តបឱ្យទាន់និន្នាការនៃការប្រែ​ប្រួលថ្លៃ​ប្រេងឥន្ធនៈនៅលើសកលលោក។

លោក ប៉ែន សុវិជាតិ បានអះអាងថា តម្លៃប្រេងអាចនឹងបន្តឡើងថ្លៃថែមទៀត ព្រោះប្រេងនៅលើទីផ្សារអន្តរជាតិ​បន្តឡើងជាលំដាប់ ដូច្នេះកម្ពុជាជៀសមិនផុតពីការឡើងថ្លៃនោះទេ។ ទោះយ៉ាងណា លោក បានសង្កត់ធ្ងន់ថា រាជរដ្ឋាភិបាល នឹងធ្វើការអន្តរាគមន៍ប្រសិនបើតម្លៃប្រេងហក់ឡើងដល់ចំណុចខ្ពស់បំផុតមួយ ដោយមិនធ្វើឱ្យបង្កផល​ប៉ះពាល់ដល់ជីវភាពប្រជាពលរដ្ឋនោះទេ។

សូមបញ្ជាក់ថា ប្រេងឥន្ធនៈដែលកម្ពុជាប្រើប្រាស់បច្ចុប្បន្ន​នេះ​ បាននាំចូលពីប្រទេសសិង្ហបុរី ថៃ និងវៀតណាម។ ក្រុមហ៊ុនលក់រាយ​នៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លីមឡុង និងក្រុមហ៊ុនមួយ​ចំនួន​ទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។

បើតាមលោក ប៉ែន សុវិជាតិ បញ្ជាក់ថា ក្រុមហ៊ុនភីធីធី មានបំណងពង្រីកពោងស្តុកប្រេងបន្ថែមទៀត ដែលជាសញ្ញា​ល្អក្នុងការ​គ្រប់គ្រងតម្លៃប្រេងនៅកម្ពុជា៕