ព័ត៌មានជាតិ

ប្រមុខរដ្ឋាភិបាលប្រកាសទប់ស្កាត់មិនឲ្យឡើងថ្លៃអគ្គិសនី ទោះបីពិភពលោកជួបវិបត្តិ

បានផុស

៣ years មុន

នៅ

ថ្ងៃសៅរ៍ ២៨ តុលា ២០២៣

ដោយ

សម្តេចធិបតី ហ៊ុន ម៉ាណែត បានប្រកាសនឹងទប់ស្កាត់ការឡើងថ្លៃអគ្គិសនី ដើម្បីកុំឲ្យប៉ះពាល់ដល់សេដ្ឋកិច្ច និងជីវភាពប្រជាពលរដ្ឋ។

ថ្លែងនៅក្នុងកម្មវិធីសំណេះសំណាលជាមួយកម្មករកម្មការិនីរោងចក្រក្នុងរាជធានីភ្នំពេញនៅព្រឹកនេះ សម្តេចធិបតី ហ៊ុន ម៉ាណែត បានអះអាងចំពោះកម្មករកម្មការិនីជាង ១ ម៉ឺននាក់ ក្នុងការធានាមិនឲ្យឡើងថ្លៃអគ្គិសនី ទោះបីពិភពលោកកំពុងជួបវិបត្តិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេច ហ៊ុន ម៉ាណែត លើកឡើងថា ប្រទេសមួយចំនួនបានដំឡើងថ្លៃអគ្គិសនី ប៉ុន្តែកម្ពុជានឹងគ្រប់គ្រងមិនឲ្យឡើងថ្លៃ រួមទាំងខិតខំសម្រួលតម្លៃឲ្យបានសមរម្យថែមទៀត។

បើតាមប្រមុខរដ្ឋាភិបាល កម្ពុជានឹងខិតខំស្វះស្វែងរកប្រភពអគ្គិសនីផ្សេងទៀតរួមទាំងការប្រើប្រាស់ថាមពលសូឡា។ កម្ពុជាមិនអាចពឹងផ្អែកលើការនាំចូលវត្ថុធាតុដើមទាំងស្រុងដូចជាធ្យូងថ្ម និងប្រេងដើម្បីផលិតថាមពលអគ្គិសនី ដោយសារស្ថានភាពវិបត្តិពិភពលោកដូចជាសង្គ្រាមនៅអ៊ុយក្រែន និងសង្រ្គាមរវាងអ៊ីស្រាលអែលប៉ាឡេស្ទីនអាចប៉ះពាល់ដល់ការផ្គត់ផ្គង់។

សម្តេចធិបតី ហ៊ុន ម៉ាណែត បានបញ្ជាក់ថា៖ «ការវាយគ្នានៅរុស្សីអ៊ុយក្រែនធ្វើឲ្យដាច់ខ្យល់នៅខ្មែរ សិង្ហបុរី ថៃ នាំឲ្យមានវិបត្តិស្បៀង និងថាមពល»។

ទាក់ទងការលើកកម្ពស់ជីវភាពដល់កម្មករកម្មការិនី នាយករដ្ឋមន្រ្តីកម្ពុជារូបនេះអះអាងថា រដ្ឋាភិបាលនឹងខិតខំដំឡើងប្រាក់បៀវត្សនិងការឧបត្ថម្ភផ្សេងទៀត ធ្វើយ៉ាងណាឲ្យជីវភាពរបស់កម្មករកម្មការិនីកាន់តែល្អប្រសើរថែមទៀត៕

Related Topics:សម្ដេចធិបតី ហ៊ុន ម៉ាណែត