ឱកាសក្លាយជាមន្ត្រីកសិកម្មឃុំចំនួន ២៥០នាក់  

ក្រសួងមុខងារសាធារណៈ​ បានជូនដំណឹងអំពីការប្រឡងប្រជែងជ្រើសរើស មន្ត្រីកសិកម្មឃុំ ឲ្យចូលបម្រើការងារក្នុងក្របខណ្ឌ ក្រសួងកសិកម្ម រុក្ខាប្រមាញ់ និងនេសាទ។ ការជ្រើសរើសនេះ គឺយោងតាមចំណាររបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាថ្ងៃទី ២៩ ខែកញ្ញា ឆ្នាំ ២០២៣ លើលិខិតរបស់ក្រសួងមុខងារសាធារណៈ អំពីរបាយការណ៍ ស្ដីពី លទ្ធផលនៃកិច្ចប្រជុំពាក់ព័ន្ធនឹងការជ្រើសរើស មន្ត្រីកសិកម្មឃុំចំនួន ២៥០នាក់ ក្នុងឆ្នាំ ២០២៣។

សេចក្ដីជូនដំណឹងរបស់ក្រសួងមុខងារសាធារណៈ នៅថ្ងៃទី ៣១ ខែតុលា ឆ្នាំ​ ២០២៣ បានឲ្យដឹងថា គណៈកម្មការរៀបចំការប្រឡងប្រជែងជ្រើសរើស មន្ត្រីកសិកម្មឃុំ សម្រេចបើកឲ្យមានការប្រឡងប្រជែង​​ជ្រើសរើស មន្ត្រីកសិកម្មឃុំចំនួន ២៥០នាក់ សម្រាប់ប្រភេទក្របខណ្ឌក្រសួងកសិកម្ម រុក្ខាប្រមាញ់ និងនេសាទ ដែលមានជំនាញ/ឯកទេសកសិកម្ម ចាប់ពីវិញ្ញាបនបត្រ បរិញ្ញាបត្ររង ឬសញ្ញាបត្រសមមូល ឲ្យចូលបម្រើការងារនៅតាមឃុំ ស្រុក ខេត្ត ក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ សម្រាប់ឆ្នាំ ២០២៣៕