រដ្ឋបាលខេត្តកែប រៀបចំកែលម្អរង្វង់មូលត្រីផ្សោតដើម្បីបញ្ចៀសការកកស្ទះនាឱកាសបុណ្យសមុទ្រ

កាលពីរសៀលថ្ងៃទី១២ ខែវិច្ឆិកា ឆ្នាំ២០២៣ រដ្ឋបាលខេត្តកែបបានរៀបចំកែលម្អសោភណ្ឌភាពធ្វើរង្វង់មូលត្រីផ្សោតនៅមុខមន្ទីរទេសចរណ៍ខេត្តកែប ដើម្បីបញ្ជៀសការកកស្ទះចរាចរណ៍ក្នុងការរៀបចំពិធីបុណ្យសមុទ្រនាពេលខាងមុខ ក៏ដូចជាសម្រួលដល់ការធ្វើដំណើរបស់ពលរដ្ឋមករកម្សាន្ត និងភ្ញៀវទេសចរមកកាន់តំបន់ធ្នេរខ្សាច់លេងទឹក។

លោក សោម ពិសិដ្ឋ អភិបាលខេត្តកែប បានដឹកនាំមន្ត្រីជំនាញ និងអាជ្ញាធរចូលរួមពិធីសែនព្រេនសុំផ្លាស់ប្ដូររូបសំណាកព្រះវិស្នុទៅតម្កល់នៅទីតាំងថ្មី ហើយរដ្ឋបាលខេត្តកែបបានកែលម្អស្ថាបនាសោភណ្ឌភាពថ្មីធ្វើជារង្វង់មូលដាក់រូបត្រីផ្សោត ដើម្បីបញ្ជៀសសម្រួលការកកស្ទះនៅមុខមន្ទីរទេសចរណ៍ខេត្ត ក្នុងព្រឹត្តិការណ៍បុណ្យសមុទ្រលើកទី១០ ជុំទី៣ ដែលត្រៀមរៀបចំចាប់ពីថ្ងៃទី១ ធ្នូដល់ថ្ងៃទី៣ ខែធ្នូ ឆ្នាំ២០២៣នាពេលខាងមុខ។

បន្ទាប់ពីសែនព្រេនរួច លោក សោម ពិសិដ្ឋ អភិបាលខេត្តកែប បានពិនិត្យជុំវិញការដ្ឋានពង្រីកធ្វើរង្វង់មូលនេះស្ថាបនាបានប្រមាណជិត៥០% ហើយជាកន្លែងថ្មីមួយទៀតដែលក្រោមគំនិតផ្តួចផ្តើមរបស់លោកអភិបាលខេត្ត បានជំរុញឱ្យរដ្ឋបាលខេត្តមានការកែលម្អស្ថាបនាឡើង ដើម្បីបញ្ជៀសការកករស្ទះដល់ភ្ញៀវទេសចរដែលមកកម្សាន្តក្នុងពិធីបុណ្យសមុទ្រលើកទី១០ ជុំទី៣ នៅខេត្តកែបនាថ្ងៃខាងមុខនេះ។

ជាមួយគ្នានោះដែរ លោក សោម ពិសិដ្ឋ អភិបាលខេត្តកែប ក៏បានជំរុញដល់ក្រុមការងារធ្វើយ៉ាងណាស្ថាបនាកែលម្អសោភណ្ឌភាពឱ្យបានរួចរាល់នៅមុនពេលរៀបចំពិធីបុណ្យសមុទ្រ ដើម្បីជៀសវាងការកកស្ទះចរាចរណ៍ដល់ពលរដ្ឋ និងភ្ញៀវទេសចរណ៍ជាតិ និងភ្ញៀវទេសចរណ៍អន្តរជាតិ ដែលមកលេងកម្សាន្តក្នុងពិធីបុណ្យឆ្លងឆ្នាំសកល់ និងរៀបចំពិធីព្រឹត្តិការណ៍បុណ្យសមុទ្រលើកទី១០ ជុំទី៣ ឆ្នាំ២០២៣នៅក្បែផ្សារក្តាមនៅខេត្តកែបនាពេលខាងមុខ៕

អត្ថបទ៖ សឹង រ៉ាត់