សម្តេចធិបតី ចង្អុលបង្ហាញឱ្យមានការបម្រើសេវាឱ្យបានល្អនៅក្នុងអាកាសយានដ្ឋានអន្តរជាតិសៀមរាប-អង្គរថ្មី

នាយករដ្ឋមន្រ្តីនៃកម្ពុជា សម្តេចធិបតី ហ៊ុន ម៉ាណែត បានចង្អុលបង្ហាញដល់ក្រុមហ៊ុនទទួលខុសត្រូវ និងអាជ្ញាធរពាក់ព័ន្ធឱ្យយកចិត្តទុកដាក់បម្រើសេវាឱ្យបានល្អជូនដល់អ្នកធ្វើដំណើរទាំងជាតិ និងអន្តរជាតិ នៅអាកាសយានដ្ឋានអន្តរជាតិសៀមរាប-អង្គរថ្មី​ ។ ជាមួយគ្នានេះ សម្តេចធិបតី បានលើកឡើងថា ការមានអាកាសយានដ្ឋានបែបអន្តរជាតិ គឺជារឿងមោទនភាព ប៉ុន្តែ អ្វីដែលសំខាន់មួយទៀត គឺធ្វើយ៉ាងម៉េចឱ្យអាកាសយានដ្ឋានអន្តរជាតិនេះ ដំណើរការ និងសម្រេចបានគោលដៅរបស់វា។

នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ “អាកាសយានដ្ឋានអន្តរជាតិសៀមរាប-អង្គរ នាព្រឹកថ្ងៃព្រហស្បតិ៍នេះ សម្តេច នាយករដ្ឋមន្រ្តី ហ៊ុន ម៉ាណែត បានណែនាំឱ្យភាគីពាក់ព័ន្ធទាំងអស់ ធ្វើយ៉ាងណាត្រូវជំរុញឱ្យអាកាសយានដ្ឋានអន្តរជាតិសៀមរាប-អង្គរថ្មីនេះ ជាកម្លាំងចលករលើកស្ទួយជីវភាពរស់នៅរបស់ប្រជាពលរដ្ឋ និងជំរុញសេដ្ឋកិច្ចកម្ពុជា។ សម្តេចធិបតី ហ៊ុន ម៉ាណែត ក៏បានជំរុញឱ្យមានការបម្រើសេវាផ្សេងៗ ក៏ដូ​ចជា ការធ្វើបដិសណ្ឋាកិច្ចឱ្យបានល្អនៅអាកាសយានដ្ឋានអន្តរជាតិសៀមរាប-អង្គរថ្មី​នេះផងដែរ។

អាកាសយានដ្ឋានអន្តរជាតិសៀមរាប-អង្គរថ្មី​ គឺកើតចេញគំនិតផ្តួចផ្តើម និងទស្សនវិស័យវែងឆ្ងាយរបស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា ហើយសមិទ្ធផលថ្មីនេះ កើតចេញពីការឯកភាពគ្នារវាងសម្តេចតេជោ ហ៊ុន សែន និងលោក ស៊ី ជីងពីង ប្រធានាធិបតីចិន ដែលសមិទ្ធផលនេះ គឺជាផ្នែកមួយនៃគំនិតផ្តួចផ្តើមខ្សែក្រវាត់ និងផ្លូវរបស់ចិន។ អាកាសយានដ្ឋានអន្តរជាតិនេះ មានទីតាំងស្ថិតនៅក្នុងឃុំតាយ៉ែក ស្រុកសូទ្រនិគម ខេត្តសៀមរាប ដែលមានចម្ងាយប្រមាណ ៥១គីឡូម៉ែត្រពីក្រុងសៀមរាបនិងប្រហែលជា៤០គីឡូម៉ែត្រពីប្រាសាទអង្គវត្ត ដែលធានាបានថា ការហោះហើរ និងចុះចត មិនមានផលអវិជ្ជមាននៃប្រតិបត្តិការរបស់អាកាសយានដ្ឋានចំពោះប្រាសាទអង្គវត្ត និងសំណង់ស្ថាបត្យកម្មជុំវិញនោះឡើយ។

ដ្បិតថា អាកាសយានដ្ឋានអន្តរជាតិសៀមរាប-អង្គរថ្មី មានទីតាំងឆ្ងាយបន្តិចពីទីក្រុងសៀមរាបនៅពេលនេះ ប៉ុន្តែ សម្តេចប្រមុខរាជរដ្ឋាភិបាលកម្ពុជា ជឿជាក់ថា នៅក្នុងរង្វង់ពី១០ ទៅ២០ឆ្នាំទៀត អាកាសយានដ្ឋានអន្តរជាតិនេះ នឹងស្ថិតនៅចំកណ្តាលនៃទីក្រុងសៀមរាប ខេត្តសៀមរាប។ នេះ គឺដោយសារតែសម្តេចធិបតី ហ៊ុន ម៉ាណែត បង្ហើបឱ្យដឹងថា នាពេលខាងមុខ ទីក្រុងសៀមរាប នឹងត្រូវពង្រីកទៅខាងស្រុកពួក។

អាកាសយានដ្ឋានអន្តរជាតិសៀមរាប-អង្គរ ត្រូវបានសាងសង់ថ្ងៃទី១៥ ខែមីនា ឆ្នាំ២០២០ និងចាប់ផ្តើមដាក់ឱ្យដំណើរការនៅថ្ងៃទី១៦ ខែតុលា ឆ្នាំ២០២៣។ អាកាសយានដ្ឋានអន្តរជាតិនេះ ត្រូវបានសាងសង់ឡើងលើផ្ទៃដីទំហំ ៧០០ហិកតា និងមានដីបម្រុងទុកចំនួន ១ពាន់ហិកតា ដើម្បីកសាងតំបន់សេដ្ឋកិច្ចពិសេស ឬតំបន់ឧស្សាហកម្មរណបឱ្យអាកាសយានដ្ឋានអន្តរជាតិថ្មី ដែលហៅថា ទីក្រុងអាកាសយានដ្ឋាន និងការអភិវឌ្ឍផ្លូវល្បឿនលឿន ដែលតភ្ជាប់ត្រង់ពីទីរួមខេត្តសៀមរាប ទៅកាន់អាកាសយានដ្ឋាន។

អាកាសយានដ្ឋានអន្តរជាតិសៀមរាប-អង្គរ គឺជាប្រភេទអាកាសយានដ្ឋានអន្តរជាតិកម្រិត 4E មានផ្លូវរត់ប្រវែង៣,៦០០ម៉ែត្រ ទទឹង ៤៥ម៉ែត្រ មាន៣៨ចំណតយន្តហោះ និងមានក្រឡាផ្ទៃស្ថានីយអ្នកដំណើរជាង ៨ម៉ឺន ម៉ែត្រក្រឡា អាចទទួលអ្នកដំណើរជាប្រចាំឆ្នាំប្រមាណជា ៧លាននាក់។ អាកាសយានដ្ឋានអន្តរជាតិនេះ សាងសង់ដោយក្រុមហ៊ុនAngkor International Airport Investment(AIAI) ក្នុងទំហំទឹក​ប្រាក់ចំនួន៨៨០លានដុល្លារ ដែលស្ថិតក្រោមកិច្ចព្រមព្រៀងគម្រោងវិនិយោគ BOT រយ:ពេល៥៥ឆ្នាំ ពោល គឺក្រោយពេលគម្រោងប្រតិបត្តិការនេះត្រូវបានបញ្ចប់ នឹងត្រូវប្រគល់ជូនរាជរដ្ឋាភិបាលកម្ពុជាគ្រប់គ្រងវិញ៕