ស៊ីម៉ាក់ គ្រោងបញ្ជូនមន្ត្រី ៥ រូប ទៅជប៉ុន សិក្សាការរៀបចំ គ្រប់គ្រង សារមន្ទីរតេជោសន្តិភាព

មជ្ឈមណ្ឌលសកម្មភាពមីនកម្ពុជា ហៅកាត់ ស៊ីម៉ាក់ នឹងបញ្ជួនមន្ត្រីចំនួន ៥រូប ទៅហ្វឹកហ្វឺននៅប្រទេសជប៉ុនដើម្បីពង្រឹងសមត្ថភាពលើការរៀបចំ និងគ្រប់គ្រងសារមន្ទីរតេជោសន្តិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង រតនា ប្រតិភូរាជរដ្ឋាភិបាល ទទួលបន្ទុកជា អគ្គនាយកស៊ីម៉ាក់ បានឱ្យដឹងនៅក្នុងជំនួបពិភាក្សាជាមួយក្រុមការងារនៅសារមន្ទីរ “តេជោសន្តិភាព” ស្រុកបាគង ខេត្តសៀមរាប នៅព្រឹកថ្ងៃទី១៦ ខែវិច្ឆិកានេះថា ការត្រៀមចាត់បញ្ជូនមន្ត្រីចំនួន ៥រូប សម្រាប់ទៅវគ្គហ្វឹកហ្វឺនទី១ នៅជប៉ុនដើម្បីពង្រឹងសមត្ថភាពលើការរៀបចំ និងគ្រប់គ្រងសារមន្ទីរតេជោសន្តិភាព។

សារមន្ទីរតេជោសន្តិភាព ដែលមាន​ទីតាំ​ងស្ថិតនៅ ឃុំត្រពាំងធំ​ ស្រុកបាគង​ ខេត្តសៀមរាប ​នៅក្បែរផ្លូវទៅព្រលានយន្តហោះថ្មី និងផ្លូវជាតិ៦A នឹងដំណើរការសាងសង់ចាប់ពី ខែវិច្ឆិកា​ ឆ្នាំ២០២៣ និងបញ្ចប់នៅពាក់កណ្តាលឆ្នាំ២០២៥ ខាងមុខនេះ។ សារមន្ទីរនេះសាងសង់នៅលើផ្ទៃដី ១២ហិតតា ជាជំនួយហិរញ្ញប្បទានឥតសំណងរបស់រដ្ឋាភិបាលជប៉ុន។

លោក ហេង រតនា បានបន្តថា គម្រោងការកសាងសារមន្ទីរ “តេជោសន្តិភាព” ពិតជាមានសារៈសំខាន់ណាស់ ដើម្បីបន្តអប់រំផ្សព្វផ្សាយពីគុណតម្លៃ នៃសន្តិភាព ព្រោះសារមន្ទីរតេជោសន្តិភាព នឹងត្រូវរៀបចំតាំងបង្ហាញពិព័ណ៌រូបភាព ខ្លឹមសារឯកសារ វត្ថុតាង និងសាក្សីអមជាមួយតឹកតាងប្រវត្តិសាស្រ្តឈឺចាប់ខ្លោចផ្សា និងការបំផ្លិចបំផ្លាញនានាដោយសារសង្គ្រាម សម្រាប់បម្រើការអប់រំផ្សព្វផ្សាយដែលអាចចូលរួមជំរុញនូវការផ្លាស់ប្តូរផ្នត់គំនិត ឥរិយាបថ និងពង្រឹងស្មារតីយុវជនជំនាន់ក្រោយៗឱ្យស្គាល់ពីតម្លៃដ៏មហាសាល នៃសន្តិភាព និងអាចជាចលនាគាំទ្រយ៉ាងពេញទំហឹងចំពោះទស្សនវិស័យ “អរគុណសន្តិភាព” ដ៏ប្រពៃរបស់ សម្តេចអគ្គមហាសេនាបតីតេជោ។

លោកអគ្គនាយក បានបញ្ជាក់ថា ជាក់ស្តែងប្រទេសក្នុងតំបន់អាស៊ីមានចំនួន១៨ សុទ្ធតែមានសារមន្ទីរសន្តិភាព ក្នុងនោះប្រទេសជប៉ុនមានចំនួន ៨៥កន្លែង កូរ៉េខាងត្បូងមានចំនួន ២០កន្លែង និងចិនមានចំនួន ១៤កន្លែង ហើយការអប់រំផ្សព្វផ្សាយពីតម្លៃសន្តិភាពដល់ស្រទាប់យុវជន សិស្ស-និសិ្សត បាន និងបន្តជំរុញយ៉ាងខ្លាំងក្លានៅជប៉ុនដោយក្នុងមួយឆ្នាំៗតាមសារមន្ទីរសន្តិភាពនីមួយៗទទួលបានដំណើរទស្សនកិច្ចពីសាលាបឋម ឬសាលាមធ្យមសិក្សាប្រមាណជាង ២ ពាន់សាលារៀន និងមានអ្នកចូលទស្សនាជាទូទៅមានចំនួនជាង ១ លាននាក់។

លោកអគ្គនាយកស៊ីម៉ាក់ បានបន្តទៀតថា មរតករឿងរ៉ាវប្រវត្តិសាស្ត្រសង្គ្រាម​ និងសន្តិភាព នៃព្រះរាជាណាចក្រដ៏កំសត់នេះ​នឹងត្រូវបានរៀបចំចងក្រង និងដាក់តាំងបង្ហាញនៅសារមន្ទីរតេជោសន្តិភាពនេះ​ សម្រាប់សាធារណជនជាតិ និងអន្តរជាតិ ​ជាពិសេសសម្រាប់យុវជនកម្ពុជាជំនាន់ក្រោយៗទៀតបានសិក្សាឈ្វេងយល់ពីគុណតំលៃដ៏មហាសាល នៃសន្តិភាព និងស្អប់ខ្ពើមសង្គ្រាម។ ក្រៅពីនេះសារមន្ទីរនេះនឹងក្លាយជាមរតកជាតិមួយបង្ហាញឱ្យពិភពលោកនូវការតស៊ូរបស់សម្ដេចតេជោ ក្នុងការបញ្ចប់សង្គ្រាមនៅកម្ពុជា និងក្លាយជាឃ្លាំងចំណេះដឹង និងព័ត៌មានចងចាំពីទុក្ខសោកវេទនារបស់ប្រជាជនកម្ពុជាឆ្លងកាត់សង្គ្រាម និងសំណល់យុទ្ធភណ្ឌសង្គ្រាម និងស្វែងយល់ព្រមទាំងតំកល់តំលៃសន្តិភាពជាមរតកដ៏មហាសាល។

គួរបញ្ជាក់ថា គម្រោងសាងសង់អគារផ្សព្វផ្សាយអប់រំយល់ដឹងពីសង្គ្រាម (សារមន្ទីរសន្តិភាព) និងអគារហ្វឹកហ្វឺនត្រូវបានចុះហត្ថលេខាកាលពីថ្ងៃទី១២ ខែវិចិ្ឆកា ឆ្នាំ២០២២ កន្លងទៅ ក្រោមអធិបតីភាព សម្តេចតេជោ ហ៊ុន សែន និង លោកនាយករដ្ឋមន្ត្រីជប៉ុន ដែលមានទឹកប្រាក់ចំនួន ២ ៤៥១ លានយ៉េន ស្មើប្រមាណ ១ ៧១៧ លានដុល្លារ ជាជំនួយឥតសំណងរបស់រាជរដ្ឋាភិបាលជប៉ុន ក្នុងឱកាសដែលលោកនាយករដ្ឋមន្ត្រីជប៉ុនអញ្ជើញមកចូលរួមកិច្ចប្រជុំកំពូលអាស៊ាននិងកិច្ចប្រជុំពាក់ព័ន្ធននានៅកម្ពុជា៕

អត្ថបទ៖ សំអឿន