ព័ត៌មានជាតិ

អគ្គលេខាធិការអាស៊ាន ប្តេជ្ញាបន្តជំរុញសុខដុមនីយកម្មវិស័យការងារ និងការបណ្តុះបណ្តាលជំនាញនៅកម្ពុជាឱ្យស្របតាមស្តង់ដារអាស៊ាន

បានផុស

៣ years មុន

នៅ

ថ្ងៃសុក្រ ២៤ វិច្ឆិកា ២០២៣

ដោយ

ភ្នំពេញ ៖ នៅក្នុងឱកាសចូលជួបសម្តែងការគួរសម និងពិភាក្សាការងារជាមួយ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅទីស្តីការក្រសួង នាព្រឹកថ្ងៃទី២៤ ខែវិច្ឆិកា ឆ្នាំ២០២៣នេះ លោកបណ្ឌិត កៅ គីមហួន អគ្គលេខាធិការអាស៊ាន បានថ្លែងបញ្ជាក់ថា អាស៊ានកំពុងបន្តជំរុញគាំទ្រលើសុខដុមនីយកម្ម វិស័យការងារ ការកសាងសមត្ថភាពធនធានមនុស្ស និងការបណ្តុះបណ្តាលជំនាញសម្រាប់ប្រទេសជាសមាជិកអាស៊ាន ជាពិសេស លោកបណ្ឌិត បានសម្តែងការគាំទ្រចំពោះការអនុវត្តកម្មវិធីការបណ្តុះបណ្តាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងងាយរងហានិភ័យ ចំនួន១,៥លាននាក់ ដែលជាផ្នែកមួយដ៏សំខាន់ស្របតាមគោលនយោបាយរបស់អាស៊ានក្នុងការកសាងកម្លាំងពលកម្មជំនាញ នៅក្នុងសេដ្ឋកិច្ចឌីជីថល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សួរ បានថ្លែងការកោតសរសើរចំពោះកិច្ចខិតខំប្រឹងប្រែងរបស់អគ្គលេខាធិការអាស៊ាន ក្នុងការជំរុញ និងសម្របសម្រួលកិច្ចការជាច្រើនក្នុងបណ្តាប្រទេសជាសមាជិកអាស៊ាន ជាពិសេសវិស័យការងារ ពលករទេសន្តរប្រវេសន៍ និងការបណ្តុះបណ្តាលជំនាញជាដើម។

លោករដ្ឋមន្ត្រី បានលើកឡើងថា ការបណ្តុះបណ្តាលជំនាញឱ្យស្របតាមស្តង់ដារទទួលស្គាល់ជារួមមួយ ពិតជាមានសារៈសំខាន់ណាស់សម្រាប់ប្រទេសជាសមាជិកអាស៊ាន ដោយសារប្រទេសនីមួយៗមានវប្បធម៌ ប្រពៃណី សាសនា និងស្ថានភាពសង្គម នយោបាយខុសៗគ្នា។ ដូចនេះ លោក សង្ឃឹមថា អគ្គលេខាធិការអាស៊ាននឹងជួយសម្របសម្រួលធ្វើយ៉ាងណាឱ្យមានតុល្យភាពរវាងប្រទេសដែលត្រូវការកម្លាំងពលកម្មពីក្រៅប្រទេស និងប្រទេសដែលបញ្ជូនកម្លាំងពលកម្មចេញទៅក្រៅប្រទេស ដើម្បីកំណើនសេដ្ឋកិច្ចក្នុងប្រទេសជាសមាជិកអាស៊ាន។

នៅក្នុងកិច្ចពិភាក្សាការងារនេះដែរ លោករដ្ឋមន្ត្រី និងលោកអគ្គលេខាធិការអាស៊ាន ក៏បានបញ្ជាក់រួមគ្នាថា អាស៊ាន និងក្រសួងការងារ និងបណ្តុះបណ្តាលវិជ្ជាជីវៈ នឹងបន្តកិច្ចសហការជាមួយគ្នាក្នុងការអនុវត្តយន្តការនានា ស្របតាមចក្ខុវិស័យនៃឧស្សាហកម្ម ៤.០ និង គោលនយោបាយអាស៊ានក្នុងការផ្លាស់ប្តូរពីឧស្សាហកម្មអតិពលកម្មទៅជាឧស្សាហកម្មផ្អែកលើពលកម្មជំនាញ ត្រឹមឆ្នាំ២០២៥។

សូមបញ្ជាក់ថា ក្នុងនាមកម្ពុជាជាប្រធានអាស៊ាន កាលពីថ្ងៃទី១១ ខែវិច្ឆិកា ឆ្នាំ២០២២កន្លងមក បានចេញសេចក្តីថ្លែងការណ៍ ស្តីពី “ចល័តភាពរបបសន្តិសុខសង្គមសម្រាប់ពលករទេសន្តរប្រវេសន៍ក្នុងអាស៊ាន” “ASEAN Declaration on Portability of Social Security for Migrant Workers in ASEAN” ដែលត្រូវបានអនុម័ត ដោយមេដឹកនាំអាស៊ានក្នុងកិច្ចប្រជុំកំពូលអាស៊ានក្នុងទីក្រុងភ្នំពេញ។ ក្នុងនោះ ក្រសួងការងារ និងបណ្តុះបណ្តាលវិជ្ជាជីវៈ ក្នុងនាមជាអ្នកផ្តួចផ្តើមនៃសេចក្តីថ្លែងការណ៍នេះ នឹងរៀបចំកម្មវិធីបណ្តុះបណ្តាល និងសិក្ខាសាលាចំនួនបីក្នុងអំឡុងពេលចុងឆ្នាំ២០២៣ និងដើមឆ្នាំ២០២៤ ដើម្បីឈានទៅសម្រេចបាននូវការដាក់ចេញជាគោលការណ៍ណែនាំរបស់អាស៊ាន ស្តីពី “ចល័តភាពរបបសន្តិសុខសង្គមសម្រាប់ពលករទេសន្តរប្រវេសន៍ក្នុងអាស៊ាន”៕