តើការដោះស្រាយវិវាទក្រៅប្រព័ន្ធតុលាការ បើមានភាគគីណាមិនពេញចិត្ត អាចប្តឹងទៅតុលាការបានដែរ ឬទេ?

អាជ្ញាធរជាតិដោះស្រាយវិវាទក្រៅប្រព័ន្ធតុលាការ ជាយុន្ធការមួយដែលមានបេសកកម្មដោះស្រាយក្រៅប្រព័ន្ធតុលាការនូវវិវាទរដ្ឋប្បវេណី វិវាទពាណិជ្ជកម្ម និងវិវាទដ៏ទៃទៀតតាមរយៈការសម្រុះសម្រួលវិវាទផ្សះផ្សា ដោយផ្អែកតាមការព្រមព្រៀងរបស់ភាគីវិវាទ។ ប៉ុន្តែ ក្នុងករណីមានភាគគីណាមួយមិនពេញចិត្តនឹងការសម្របសម្រួល តើអាចមានសិទ្ធិប្តឹងទៅតុលាការបន្តទៀតបានដែរ ឬទេ?

លោក លី ច័ន្ទតុលា ប្រធានគណៈមេធាវីកម្ពុជា នៅក្នុងកិច្ចសម្ភាសជាមួយ«កម្ពុជាថ្មី» បានឱ្យដឹងថា ក្នុងករណីគូវិវាទមិនពេញចិត្តនឹងការសម្របសម្រួលក្នុងការដោះស្រាយវិវាទក្រៅប្រព័ន្ធតុលាការ ហើយចង់ប្តឹងទៅតុលាការវិញ គឺតុលាការអាចទទួលយកពាក្យបណ្តឹងនោះ ប៉ុន្តែ តុលាការនឹងសិក្សាលើមូលហេតុដែលពួកគាត់មិនសុខចិត្តក្នុងកិច្ចព្រមព្រៀងនេះ។ លោកបញ្ជាក់ថា នៅក្នុងព្រះរាជក្រឹត្យស្តីពី​«ការបង្កើត ការរៀបចំ និង​កិច្ច​ដំណើរ​ការ​របស់​អាជ្ញាធរជាតិ​ដោះ​ស្រាយ​វិវាទ​ក្រៅ​ប្រព័ន្ធ​តុលាការ» គឺបានកំណត់យ៉ាងតឹងរឹង ប្រសិនបើគូវិវាទចង់លុបចោលកិច្ចព្រមព្រៀងនោះ លុះត្រាតែកំណត់ហេតុដែលព្រមព្រៀង ធ្វើឡើងដោយការបង្ខិតបង្ខំ មានការបន្លំបោកប្រាស់។ ដូច្នេះ បើមិនមានករណីទាំងអស់នេះទេ ទោះបីជាអាចប្តឹងទៅតុលាការបាន ប៉ុន្តែ តុលាការនៅតែកាត់ក្តីឱ្យចាញ់ដដែល។

សូមបញ្ជាក់ថា ព្រះរាជក្រឹត្យ ស្តីពី ការបង្កើត ការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ជាយុន្ធការបំពេញបន្ថែមឱ្យប្រព័ន្ធដោះស្រាយវិវាទនៅព្រះរាជាណាចក្រកម្ពុជា សំដៅលើកកម្ពស់គុណភាព ប្រសិទ្ធភាព និងភាពឆាប់រហ័សនៃការដោះស្រាយវិវាទ តាមរយៈការសម្រុះសម្រួលផ្សះផ្សាក្រៅប្រព័ន្ធតុលាការ ក្នុងគោលបំណងជួយកាត់បន្ថយការកកស្ទះសំណុំរឿងនៅតាមសាលាជម្រះក្តី បង្ខិតសេវាដោះស្រាយវិវាទឱ្យកាន់តែទៅកៀកនឹងប្រជាពលរដ្ឋនៅមូលដ្ឋាន និងធានាបាននូវភាពសុខដុមរមរា និងយុត្តិធម៌ក្នុងសង្គមជាតិ៕