ព័ត៌មានជាតិ

អាជ្ញាធរខេត្តកោះកុង ផ្ដើមស្ថាបនាប្រព័ន្ធលូរំដោះទឹកស្អុយ ជាង ៤ រយម៉ែត្រ នៅសង្កាត់ស្មាច់មានជ័យ

បានផុស

៣ years មុន

នៅ

ថ្ងៃពុធ ៦ ធ្នូ ២០២៣

ដោយ

អាជ្ញាធរខេត្តកោះកុង សហការជាមួយអាជ្ញាធរមូលដ្ឋាន ផ្តើមដាក់គ្រឿងចក្រសម្ភារៈស្ថាបនាប្រព័ន្ធលូរំដោះទឹកស្អុយប្រវែង ៤៥០ ម៉ែត្រ សងខាងផ្លូវ ចាប់ពីមុខវត្តទេពនិមិត្ត រហូតដល់កែងផ្លូវច្រមុះជ្រូកភូមិ ៣ សង្កាត់ស្មាច់មានជ័យ ក្រុងខេមរភូមិន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ៥ ខែធ្នូ ឆ្នាំ ២០២៣ លោក វ៉ែន សុខា នាយកទីចាត់ការផែនការ និងវិនិយោគខេត្តកោះកុង និងលោក ប្រាក់ វិចិត្រ អភិបាលក្រុងខេមរភូមិន្ទ បានចុះពិនិត្យទីតាំងផ្លូវដែលរងការខូចខាត ដើម្បីស្ថាបនាជាថ្មីឡើងវិញ ពិសេសការដាក់ប្រព័ន្ធលូរំដោះទឹកស្អុយផងដែរ។

លោក វ៉ែន សុខា លើកឡើងថា គម្រោងកសាងប្រព័ន្ធលូរំដោះទឹកនេះ ជាគម្រោងអនុវត្តដោយរដ្ឋបាលខេត្ត សម្រាប់ចុងឆ្នាំ ២០២៣ ក្នុងគោលដៅធ្វើឱ្យល្អប្រសើរឡើងវិញ នៃចរន្តទឹកហូរទៅតាមប្រឡាយបានត្រឹមត្រូវ ចៀសវាងដក់ជន់លិចផ្លូវ ឬលំនៅឋានប្រជាពលរដ្ឋ។ កន្លងទៅ ប្រជាពលរដ្ឋរស់នៅភូមិ ៣ សង្កាត់ស្មាច់មានជ័យ បានស្នើសុំអាជ្ញាធរក្រុងខេមរភូមិន្ទ ខេត្តកោះកុង ជួយពិនិត្យដោះស្រាយស្ថាបនាកែលម្អផ្លូវបេតុងចាប់ពីមុខវត្តទេពនិមិត្ត រហូតដល់កែងច្រមុះជ្រូកភូមិ ៣ ព្រោះខូចខាតច្រើនកន្លែង ព្រមទាំងមានទឹកដក់ជន់លិចតាមដងផ្លូវទៀតផង ក្រោយភ្លៀងធ្លាក់រួច។

ទន្ទឹមនោះ មិនចំពោះតែផ្លូវ ១ ខ្សែ ខាងលើទេ ផ្លូវផ្សេងៗក្នុងក្រុងខេមរភូមិន្ទ ក៏ខូចខាតដូចគ្នាផងដែរ ដោយសារស្ថានភាពចាស់ទ្រុឌទ្រោមអស់គុណភាពប្រើប្រាស់នាំឱ្យពិបាកធ្វើចរាចរណ៍ និងងាយជួបគ្រោះថ្នាក់ជាញឹកញាប់៕

អត្ថបទ ៖ សិរីវឌ្ឍនៈ