បេក្ខជនប្រឡងជាប់មន្ត្រីកសិកម្មឃុំ ២៥០នាក់ នឹងក្លាយជាធនធានមនុស្សដ៏សំខាន់ ក្នុងការបម្រើកសិករនៅមូលដ្ឋាន

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា បេក្ខជនដែលប្រឡងជាប់ជាមន្ត្រីកសិកម្មឃុំ ឆ្នាំ ២០២៣នេះ នឹងក្លាយជាធនធានមនុស្សដ៏សំខាន់ ក្នុងការបម្រើប្រជាកសិករនៅមូលដ្ឋាន។

ការលើកឡើងនេះ ខណៈក្រសួងមុខងារសាធារណៈ ប្រកាសលទ្ធផលសម្រាប់ការប្រឡងប្រជែង ជ្រើសរើសមន្រ្តីកសិកម្មឃុំ ឆ្នាំ ២០២៣ ឲ្យចូលបម្រើការងារក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ២២ ខែធ្នូ ឆ្នាំ ២០២៣នេះ។​ ក្នុងនោះ បេក្ខជនដែលប្រឡងជាប់មានចំនួន ២៥០នាក់ ហើយមានស្ត្រីចំនួន ៩៤នាក់។

នៅរសៀលថ្ងៃទី ២២ ខែធ្នូ ឆ្នាំ ២០២៣នេះ តាមរយៈបណ្ដាញសង្គមតេលេក្រាម សម្ដេចធិបតី ហ៊ុន ម៉ាណែត បានបង្ហោះបញ្ជីរាយនាមបេក្ខជនប្រឡងជាប់ជាស្ថាពរ សម្រាប់ការប្រឡងប្រជែងជ្រើសរើស មន្ត្រីកសិកម្មឃុំ ឆ្នាំ ២០២៣។

សម្ដេចនាយករដ្ឋមន្ត្រី បានលើកឡើងថា នេះគឺជាសមិទ្ធផលនៃចក្ខុវិស័យរបស់រាជរដ្ឋាភិបាល នីតិកាលទី ៧ ដែលបានដាក់ចេញ ដើម្បីលើកកម្ពស់វិស័យកសិកម្ម និងកសាងសហគមន៍កសិកម្មទំនើប ដោយធ្វើការរុញមន្ត្រីកសិកម្មដល់មូលដ្ឋាន ដើម្បីបំពេញសេចក្តីត្រូវការ និងបម្រើដល់ប្រជាកសិករ នៅតាមគោលដៅសក្តានុពល នៃសកម្មភាពកសិកម្ម។

ប្រមុខរាជរដ្ឋាភិបាល បានបន្ថែមថា «ជាលទ្ធផល មន្ត្រីកសិកម្មឃុំចំនួន ២៥០នាក់ បានជាប់ជាស្ថាពរ ដែលនឹងក្លាយជាធនធានមនុស្សដ៏សំខាន់ ក្នុងការបម្រើប្រជាកសិករនៅមូលដ្ឋាន ក៏ដូចជាបម្រើជាតិ និងប្រជាជននៅក្នុងវិស័យកសិកម្ម ក្នុងការជំរុញនូវកំណើនសេដ្ឋកិច្ចមូលដ្ឋាន»។

សូមជម្រាបថា ការប្រឡងប្រជែងជ្រើសរើសមន្រ្តីកសិកម្មឃុំ ឆ្នាំ២០២៣ បានធ្វើឡើងកាលពីថ្ងៃទី ១៧ ខែធ្នូ ឆ្នាំ ២០២៣​កន្លងទៅនេះ នាមណ្ឌលប្រឡង ស្ថិតក្នុងសាកលវិទ្យាល័យភូមិន្ទភ្នំពេញ។ ការប្រឡងប្រជែងនេះ មានបេក្ខជនចូលរួមប្រឡងចំនួនសរុប ៣,៣៨១នាក់ ហើយជ្រើសរើសចំនួន ២៥០នាក់ ក្នុងឆ្នាំ ២០២៣នេះ៕