អគ្គនាយកដ្ឋានអន្តោប្រវេសន៍ ប្រកាសធ្វើតេស្ត រកសារធាតុញៀនលើមន្ត្រីក្រោមឱវាទរបស់ខ្លួន

ដើម្បីចូលរួមរឹតបន្ដឹងចំពោះបញ្ហាគ្រឿងញៀននៅកម្ពុជា អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ បានប្រកាសអនុវត្តការធ្វើតេស្តរកសារធាតុញៀនលើមន្ត្រីក្រោមឱវាទរបស់ខ្លួន នាពេលខាងមុខ។ នេះបើតាមសេចក្ដីជូនដំណឹងរបស់អគ្គនាយកដ្ឋានអន្តោប្រវេសន៍ ចុះថ្ងៃទី២២ ខែធ្នូ ឆ្នាំ២០២៣។

ការអនុវត្តការធ្វើតេស្តរកសារធាតុលើមន្ត្រីនគរបាលអន្តោប្រវេសន៍ នាពេលនេះ គឺដោយអនុវត្តតាមអនុសាសន៍ណែនាំរបស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី៤ ខែកញ្ញា ឆ្នាំ២០២៣ ថ្លែងក្នុងពិធីជួបសំណេះសំណាលជាមួយថ្នាក់ដឹកនាំក្រសួងមហាផ្ទៃ បានណែនាំឱ្យគ្រប់អង្គភាពត្រូវរឹតបន្ដឹងចំពោះបញ្ហាគ្រឿងញៀន និងមន្ត្រីក្រោមឱវាទដែលមានការពាក់ព័ន្ធនឹងបញ្ហានេះ។

ក្នុងន័យនេះ សំដៅអនុវត្តតាមខ្លឹមសារណែនាំ និងមានវិធានការម៉ឺងម៉ាត់ចំពោះមន្ត្រីនគរបាលអន្តោប្រវេសន៍ ដែលមានការពាក់ព័ន្ធនឹងការប្រើប្រាស់គ្រឿងញៀនឱ្យមានប្រសិទ្ធភាពខ្ពស់នោះ អគ្គនាយកដ្ឋានអន្តោប្រវេសន៍ នឹងអនុវត្តការធ្វើតេស្តរកសារធាតុជាតិញៀនលើមន្ត្រីក្រោមឱវាទទាំងអស់នាពេលដ៏ខ្លីខាងមុខនេះ។

កាលពីរសៀលថ្ងៃទី២១ ខែធ្នូ ឆ្នាំ២០២៣ កន្លងទៅនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញបទបញ្ជាយ៉ាងម៉ឺងម៉ាត់ឱ្យរដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងការពារជាតិ ត្រូវបន្សុទ្ធកងកម្លាំងប្រដាប់អាវុធទាំងអស់ កុំឱ្យមានពាក់ព័ន្ធ និងប្រើប្រាស់គ្រឿងញៀន ហើយក្នុងករណីរកឃើញកងកម្លាំងណាមានប្រើប្រាស់ ឬពាក់ព័ន្ធគ្រឿងញៀន ត្រូវតែបណ្តេញចេញពីក្របខណ្ឌភ្លាមៗ។

សម្ដេចធិបតី បន្តថា ចំពោះកងកម្លាំងប្រដាប់អាវុធណា ដែល ជួញដូរគ្រឿងញៀន មិនត្រឹមតែបណ្តេញចេញពីក្របខណ្ឌនោះទេ ថែមទាំងត្រូវប្រឈមចំពោះមុខច្បាប់ជាធរមានផងដែរ។ សម្តេចធិបតី នាយករដ្ឋមន្ត្រី បានសង្កត់ធ្ងន់ថា ក្នុងនាមជាកម្លាំងប្រដាប់អាវុធ ដែលជាមន្ត្រីអនុវត្តច្បាប់ ត្រូវតែធ្វើឱ្យល្អ ស្អាតស្អំ មិនមានការពាក់ព័ន្ធនឹងគ្រឿងញៀនឡើយ៕