ព័ត៌មានជាតិ

រដ្ឋមន្រ្តីក្រសួងបរិស្ថានក្រើនរំលឹកឲ្យនិស្សិតត្រូវមានភាពស្អាតពីខាងក្នុង ដើម្បីជាតិនិងខ្លួនឯង

បានផុស

៣ years មុន

នៅ

ថ្ងៃសុក្រ ២៩ ធ្នូ ២០២៣

ដោយ

រដ្ឋមន្ត្រីក្រសួងបរិស្ថាន លោក អ៊ាង សុផល្លែត លើកទឹកចិត្តឲ្យនិស្សិតខ្មែរដែលទទួលបានជយលាភីអាហារូបករណ៍នូវែលហ្សេឡង់ ត្រូវមានភាពស្អាតពីខាងក្នុង ដើម្បីទទួលបានកិត្តិយសសម្រាប់ខ្លួនឯងផង និងជូនជាតិមាតុភូមិផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២៧ ខែធ្នូ និស្សិតជយលាភីអាហារូបករណ៍ Manaaki New Zealand ចំនួន ២៧ នាក់ ទទួលបានការអនុញ្ញាតឲ្យចូលជួបសំណេះសំណាល និងទទួលយកនូវអនុសាសន៍ណែនាំពីរដ្ឋមន្ត្រីក្រសួងបរិស្ថាន។ ក្នុងជំនួបនេះដែរ លោក អ៊ាង សុផល្លែត បានលើកទឹកចិត្តឲ្យនិស្សិតកម្ពុជាដែលជាម្ចាស់ជយលាភីអាហារូបករណ៍ Manaaki New Zealand ទាំង ២៧ រូប គប្បីត្រូវបង្ហាញនូវភាពស្អាតរបស់ខ្លួនទៅកាន់អន្តរជាតិ ដើម្បីជាកិត្តិយសសម្រាប់ខ្លួនឯងផង និងជាតិមាតុភូមិផង។

ភាពស្អាតពីខាងក្នុងនេះ លោករដ្ឋមន្ត្រីចង់សំដៅដល់ភាពស្អាតស្អំ ស្មោះត្រង់ និងអំពើល្អ សុច្ចរិតភាព ដែលជាដើមទុនសំខាន់បំផុតក្នុងជីវិតរបស់យើងម្នាក់ៗ ទោះជាប្រកបកិច្ចការងារអ្វីក៏ទទួលបានជ័យជម្នះដែរ។ ជាក់ស្ដែងភាពស្អាតនេះ គឺមានក្នុងយុទ្ធសាស្ត្រចក្រាវិស័យបរិស្ថាន២០២៣-២០២៨ របស់ក្រសួងបរិស្ថាន ដែលយុទ្ធសាស្ត្រនេះហើយ ជំរុញឲ្យមានការគាំទ្រយ៉ាងផុលផុសពីប្រជាពលរដ្ឋ និងសិស្សានុសិស្សសរុបរួមជិត ៤លាននាក់ហើយមកទល់ថ្ងៃនេះ។

ទន្ទឹមនេះ លោក អ៊ាង សុផល្លែត ក៏បានលើកយកបទពិសោធន៍ផ្ទាល់មកបង្ហាញដល់និស្សិតទាំងអស់ ក្នុងន័យលើកទឹកចិត្តឲ្យបញ្ញវន្តគ្រប់រូបមានគោលដៅ និងមានផែនការក្នុងការសិក្សា ដើម្បីទទួលបានចំណេះដឹងនិងចំណេះធ្វើ បទពិសោធន៍ពីបរទេស មកចែករំលែក និងបម្រើជាប្រយោជន៍ជូនជាតិមាតុភូមិវិញ បន្ទាប់ពីបញ្ចប់ការសិក្សាដោយជោគជ័យនាពេលខាងមុខនេះ៕