ព័ត៌មានជាតិ

មន្ត្រីជាន់ខ្ពស់ការងារ ៖ ប្រាក់ឈ្នួលថ្មី ២០៤ ដុល្លារ នឹងចូលរួមលើកកម្ពស់ជីវភាពរស់នៅកម្មករកាន់តែប្រសើរមួយកម្រិតទៀត

បានផុស

៣ years មុន

នៅ

ថ្ងៃអង្គារ ២ មករា ២០២៤

ដោយ

មន្ត្រីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈ លើកឡើងថា ប្រាក់ឈ្នួលថ្មី ២០៤ ដុល្លារ នឹងចូលរួមចំណែកក្នុងការលើកកម្ពស់ជីវភាពរស់នៅរបស់កម្មករ-និយោជិត កាន់តែប្រសើរមួយកម្រិតបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់ពីខែមករា ឆ្នាំ ២០២៤ នេះតទៅ កម្មករ-និយោជិត វិស័យវាយនភ័ណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប នឹងទទួលបានប្រាក់ឈ្នួលអប្បបរមាថ្មីចំនួន ២០៤ ដុល្លារ ក្នុងមួយខែ ខណៈប្រាក់ឈ្នួលឆ្នាំ ២០២៣ ទទួលបានត្រឹមតែ ២០០ ដុល្លារ ប៉ុណ្ណោះ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ០២ មករា នេះថា«ក្នុងនាមក្រសួងការងារ និងរូបខ្ញុំផ្ទាល់ ខ្ញុំសូមអបអរសាទរចំពោះបងប្អូនកម្មករ-និយោជិត ក្នុងវិស័យកាត់ដេរ វាយនភ័ណ្ឌ ផលិតស្បែកជើង និងផលិតផលធ្វើដំណើរ និងកាបូប ដែលទទួលបានប្រាក់ឈ្នួលអប្បបរមាចំនួន ២០៤ ដុល្លារ ចាប់ពីខែមករា ឆ្នាំ ២០២៤ នេះតទៅ ហើយគឺជាប្រាក់ឈ្នួលមួយដែលរដ្ឋាភិបាល ក្រសួងការងារ បានខិតខំប្រឹងប្រែងក្នុងការចរចាកន្លងមក»។

លោក កត្តា អ៊ន សង្ឃឹមថា ប្រាក់ឈ្នួលថ្មីនេះ នឹងចូលរួមចំណែកក្នុងការលើកកម្ពស់ជីវភាពរស់នៅរបស់កម្មករ-និយោជិត បានល្អប្រសើរមួយកម្រិតបន្ថែមទៀត និងសូមអំពាវនាវដល់កម្មករ-និយោជិត បន្តខិតខំប្រឹងប្រែងធ្វើការងារ គោរពច្បាប់ការងារ និងបញ្ជាផ្ទៃក្នុងនៅកន្លែងធ្វើការ ដើម្បីក្លាយជាកម្មករគំរូ និងមានសមត្ថភាពក្នុងការបំពេញការងារជូនរោងចក្រសហគ្រាស។

គួរបញ្ជាក់ថា ប្រាក់ឈ្នួលអប្បបរមាថ្មី ចំនួន ២០៤ ដុល្លារ ត្រូវបានក្រុមប្រឹក្សាជាតិប្រាក់ឈ្នួលអប្បបរមា បានកំណត់ប្រាក់ឈ្នួលអប្បបរមាសម្រាប់ឆ្នាំ ២០២៤ ត្រឹមតែ ២០២ ដុល្លារប៉ុណ្ណោះ កាលពីចុងខែកញ្ញា ឆ្នាំ ២០២៣។ ប៉ុន្តែ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបន្ថែមចំនួន ២ ដុល្លារ បន្ថែមទៀត ទើបប្រាក់ឈ្នួលអប្បបរមាសរុបកើនឡើងដល់ ២០៤ ដុល្លារ៕

អត្ថបទ ៖ សំអឿន