នាយកវិទ្យាស្ថានកំពង់ស្ពឺ៖ សក្តានុពលជំនាញវិជ្ជាជីវៈ​ងាយ​រក​​ប្រាក់ចំណូល ប្រកួត​ប្រជែងទីផ្សារ​សកល

លោក កែម ជាក់នី នាយកវិទ្យាស្ថានពហុបច្ចេកទេសខេត្តកំពង់ស្ពឺបានលើកឡើងថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់គ្រួសារក្រីក្រ និងគ្រួសារងាយរងហានិភ័យចំនួន ១ លាន ៥ សែននាក់ ជាកម្មវិធីអាទិភាពបំផុតនៃរាជរដ្ឋាភិបាលក្នុងការកសាងធនធានមនុស្ស ដែលជាគន្លឹះជំរុញដល់សេដ្ឋកិច្ចជាតិឱ្យកាន់តែរីកចម្រើន។

លោក កែម ជាក់នី ជឿជាក់ថា តាមរយៈការបណ្តុះបណ្តាលជំនាញដល់យុវជនជាយុទ្ធសាស្រ្តគន្លឹះអភិវឌ្ឍសេដ្ឋកិច្ចជាតិ ដែលធ្វើឱ្យមានការ​រីកចម្រើនគ្រប់វិស័យនិងឆាប់រហ័ស។ ជំនាញទាំងនោះអាចប្រកួត​ប្រជែងក្នុងទីផ្សារសកល បង្កើនលទ្ធភាព​ការងារ និងសក្តានុពលរកប្រាក់ចំណូលនៅទូទាំងឧស្សាហកម្មផ្សេងៗទៀត។

លោកបន្ថែមថា «ការដាក់ចេញវគ្គបណ្តុះបណ្តាលមូលធនមនុស្ស ជាយុទ្ធសាស្រ្តសំខាន់បំផុតសម្រាប់ប្រទេសកម្ពុជា ព្រោះ​យកទៅអភិវឌ្ឍសេដ្ឋកិច្ចជាតិបានឆាប់រហ័ស និងប្រសើរជាងអ្វីៗទាំងអស់។ កាលណាមនុស្សចេះដឹង មានជំនាញ នោះប្រទេសរបស់យើងអ្វីៗក៏អាចអភិវឌ្ឍបានដែរ»។

លោកបន្ថែមទៀតថា ស្របតាមយុទ្ធសាស្រ្តបណ្តុះបណ្តាលជំនាញដល់យុវជនរបស់ថ្នាក់ដឹកនាំរាជរដ្ឋាភិបាល លោកជឿជាក់ថា កម្ពុជានឹងបានសម្រេចគោលដៅអភិវឌ្ឍសេដ្ឋកិច្ចយ៉ាងពិតប្រាកដ។

កាលពីថ្ងៃទី២ ខែវិច្ឆិកា ឆ្នាំ២០២៣ សម្តេចធិបតីនាយករដ្ឋមន្ត្រី បានមានអនុសាសន៍ លើកទឹកចិត្តដល់យុវជនក្នុងការសិក្សា និងបញ្ចប់ការសិក្សាប្រកបដោយគុណភាព និងជំនាញវិជ្ជាជីវៈច្បាស់លាស់ ដើម្បីអាចបម្រើដល់សេចក្តីត្រូវការនៃទីផ្សារការងារ។ នេះជាការយកចិត្តទុកដាក់ខ្ពស់ និងជាកិច្ចការអាទិភាពបំផុតនៃរាជរដ្ឋាភិបាលក្នុងការកសាងនូវធនធានមនុស្សសម្រាប់ជំរុញដល់សេដ្ឋកិច្ចជាតិ៕