ក្រសួងសុខាភិបាលនឹងបើកវគ្គបណ្តុះបណ្តាលស្តីពីការស្នើសុំលិខិតអនុញ្ញាត នាំចូលនាំចេញតាមប្រព័ន្ធបញ្ជរតែមួយជាតិ

ក្រសួងសុខាភិបាលនឹងបើកវគ្គបណ្តុះបណ្តាលស្តីពីការស្នើសុំលិខិតអនុញ្ញាត នាំចូលនាំចេញតាមប្រព័ន្ធបញ្ជរតែមួយជាតិដល់គ្រឹះស្ថានផលិតឱសថ គ្រឹះស្ថានអាហរ័ណនីហរ័ណឱសថ និងគ្រឹះស្ថានផ្សេងៗទៀតដើម្បីលើកកម្ពស់ និងបង្កើនប្រសិទ្ធភាពក្នុងការនាំចូល នាំចេញឱសថ ឧបករណ៍បរិក្ខារពេទ្យ និងផលិតផលសុខាភិបាលផ្សេងទៀតឱ្យកាន់តែល្អប្រសើរ។

បើតាមលោក ម៉ី សំបូរ រដ្ឋលេខាធិការប្រចាំការក្រសួងសុខាភិបាលបានឱ្យដឹងនៅក្នុងលិខិតមួយចុះកាលពីយប់ថ្ងៃទី០៨មករា បានជម្រាបជូនលោក លោកស្រីប្រធានគ្រឹះស្ថានផលិតឱសថ គ្រឹះស្ថានអាហរ័ណនីហរ័ណឱសថ និងគ្រឹះស្ថានផ្សេងៗទៀតឱ្យបានជ្រាបថា ដើម្បីលើកកម្ពស់ និងបង្កើនប្រសិទ្ធ ភាពក្នុងការនាំចូល នាំចេញឱសថ ឧបករណ៍បរិក្ខារពេទ្យ និងផលិតផលសុខាភិបាលផ្សេងទៀតឱ្យកាន់តែល្អប្រសើរក្រសួងសុខាភិបាលនឹងរៀបចំវគ្គបណ្តុះបណ្តាលស្តីពីការស្នើសុំលិខិតអនុញ្ញាតនាំចូលនាំចេញតាមប្រព័ន្ធបញ្ជរតែ មួយជាតិដល់គ្រឹះស្ថានផលិតឱសថ គ្រឹះស្ថានអាហរ័ណនីហរ័ណឱសថ និងគ្រឹះស្ថានផ្សេងៗទៀតនៅសណ្ឋាគារ ភ្នំពេញ
រាជធានីភ្នំពេញចំនួន ០២ វគ្គ។

លោកបានបន្តថា វគ្គទី១នៅពីថ្ងៃទី១១ ខែមករា ឆ្នាំ២០២៤ វេលាម៉ោង០៩:០០នាទីព្រឹក និងវគ្គទី២នៅ ថ្ងៃទី១២ ខែមករា ឆ្នាំ២០២៤ វេលាម៉ោង ០៩:០០នាទីព្រឹក។

គួរបញ្ជាក់ថាគ្រឹះស្ថានមួយអាចចូលរួមបានយ៉ាងច្រើន ០២រូបនិងចូលរួមបានមួយវគ្គប៉ុណ្ណោះ៕

អត្ថបទ៖ សំអឿន