អាជ្ញាធរប្រាប់មូលហេតុពិតករណីបុរសមកពីប្រទេសថៃម្នាក់ស្លាប់

ករណីបុរសជនជាតិខ្មែរអាយុ ៣៨ ឆ្នាំម្នាក់ដែលទើបវិលត្រឡប់មកពីប្រទេសថៃ ហើយបានស្លាប់បាត់បង់ជីវិត នៅល្ងាចថ្ងៃទី ១២ ខែកុម្ភៈ ឆ្នាំ ២០២១ នេះ មិនពាក់ព័ន្ធនឹងជំងឺកូវីដ១៩នោះទេ។

អាជ្ញាធរបន្ទាយមានជ័យ បញ្ជាក់ថា មូលហេតុពិតនៃការស្លាប់របស់បុរសអាយុ ៣៨ ឆ្នាំ ដែលមានទីលំនៅ ភូមិតាមាយ ឃុំគោកឃ្មុំ ស្រុកថ្មគោល ខេត្តបាត់ដំបង នឹងជាអ្នកជំងឺដែលបានវិលត្រឡប់មកពីប្រទេសថៃនោះ គឺស្លាប់ដោយសារជងឺមហារីកថ្លើមដំណាក់កាលចុងក្រោយ។

សេចក្តីប្រកាសព័ត៌មាន របស់រដ្ឋបាលខេត្តបន្ទាយមានជ័យចេញផ្សាយនៅថ្ងៃទី ១៣ ខែកុម្ភៈនេះ បញ្ជាក់ថា បុរសជាអ្នកជំងឺរូបនេះ បានមកដល់ប្រទេសកម្ពុជា តាមច្រកអូរបីជាន់ នៅថ្ងៃទី ១២ ខែកុម្ភៈ ឆ្នាំ ២០២១ នៅម៉ោង ២ រសៀល ដោយមានអាការៈ ហត់ និងពិបាកដកដង្ហើម មានស្បែកលឿងខ្លាំង ហើយបន្ទាប់មកត្រូវបញ្ជូនមកកាន់មន្ទីរពេទ្យ មិត្តភាពកម្ពុជា-ជប៉ុន មង្គលបូរី។

នៅពេលដែលអ្នកជំងឺមកដល់មន្ទីរពេទ្យ គឺមានសភាពធ្ងន់ធ្ងរទៅហើយ ដោយសន្លប់បាត់បង់ស្មារតី ទោះបីជាមានការជួយសង្គ្រោះពីក្រុមគ្រួពេទ្យយ៉ាងណាក៏នៅតែមិនអាចជួយសង្គ្រោះបាន ហើយបានស្លាប់បាត់បង់ជីវិតនៅម៉ោង ៦ ល្ងាចថ្ងៃទី ១២ ដោយសារជំងឺមហារីកថ្លើម ពុំមែនជំងឺកូវីដ១៩នោះទេ៕

សេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យខាងក្រោម៖

អត្ថបទ៖ ឡេង ដេត