ទូតអាមេរិក​ រំពឹងថាកិច្ចសហប្រតិបត្តិការ​ផ្នែកច្បាប់ជាមួយកម្ពុជា នឹងបន្តផ្ដល់លទ្ធផលល្អជាងនេះ

ក្នុងជំនួបពិភាក្សាការងារជាមួយឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា, ឯកអគ្គរដ្ឋទូតអាមេរិកប្រចាំកម្ពុជា លោក​ Patrick Murphy  រំពឹងទុកថា​ក្នុងពេលខាងមុខកិច្ចសហប្រតិបត្តិការ​លើកិច្ចការច្បាប់រវាងភាគីទាំងពីរនឹងបន្តផ្ដល់លទ្ធផលប្រសើរជាងនេះ។

ដេីម្បីឈានទៅពង្រឹង​ និងពង្រីកកិច្ចសហប្រតិបត្តិការឱ្យកាន់តែប្រសេីរឡេីងថែមទៀត ក្នុងជំនួបនាព្រឹកថ្ងៃទី១២ ខែមករានេះ   ​ ឧបនាយករដ្ឋមន្ត្រី​ រដ្ឋមន្ត្រីមហាផ្ទៃ និងឯកអគ្គរដ្ឋទូតអាមេរិក​ ក៏បានពិភាក្សាផ្លាស់ប្ដូរយោបល់ ដោយពិនិត្យលទ្ធភាព​ទៅលើវិធានការនានាសំដៅសម្របសម្រួល និងផ្ដល់ផលប្រយោជន៍ដល់ប្រជាពលរដ្ឋទាំងសងខាង។

ក្រៅពីនេះ លោក​ ស​ សុខា​ ​ និងឯកអគ្គរដ្ឋទូតសហរដ្ឋអាមេរិកប្រចាំកម្ពុជា​ បានវាយតម្លៃខ្ពស់ដូចគ្នា​ ចំពោះលទ្ធផលនៃកិច្ចសហប្រតិបត្តិការរវាងស្ថាប័នអនុវត្តច្បាប់កម្ពុជា និងអាមេរិកក្នុងការផ្លាស់ប្ដូរចែករំលែកព័ត៌មាន​ ការទប់ស្កាត់ និងការបង្ក្រាបបទល្មើសគ្រប់ទម្រង់ រួមទាំងបទល្មើសមិនមែនប្រពៃណី បទល្មើសគ្រឿងញៀន បទល្មើសពាក់ព័ន្ធអនីតិជន និងឧក្រិដ្ឋកម្មឆ្លងដែន។ ​ ​

ក្នុងជំនួបធ្វើឡើងនៅទីស្ដីការក្រសួងមហាផ្ទៃ ​ លោក ស សុខា ​ បានបង្ហាញការគាំទ្រ និងអបអរសាទរចំពោះទំនាក់ទំនងការទូត​ដ៏យូរ​លង់រវាងកម្ពុជា និងអាមេរិក ជាពិសេសទំនាក់ទំនងរវាងប្រជាជន និងប្រជាជនដែលក្នុងរយៈពេលកន្លងមកនេះ បានរួមចំណែកដល់ការអភិវឌ្ឍ រីកចម្រើន និងបម្រើដល់ផលប្រយោជន៍ទៅវិញទៅមកនៃភាគីទាំងពីរ។

រដ្ឋមន្ត្រីមហាផ្ទៃកម្ពុជា ក៏បានថ្លែងអំណរគុណ​ លោក Patrick Murphy ចំពោះកិច្ចខិតខំប្រឹងប្រែងនៅក្នុងអាណត្តិបេសកកម្មការទូត ដែលកន្លងមក លោកតែងតែយកចិត្ដទុកដាក់ជំរុញកិច្ចសហការរវាងព្រះរាជាណាចក្រកម្ពុជា និងសហរដ្ឋអាមេរិក លើវិស័យសំខាន់ៗ ជាអាទិ៍ សេដ្ឋកិច្ច នយោបាយ ពាណិជ្ជកម្ម វប្បធម៌ បរិស្ថាន ទេសចរណ៍ ការពារជាតិ និងសន្តិសុខ។

ជាចុងក្រោយ លោក Patrick Murphy បានថ្លែងអំណរគុណចំពោះ លោក ស សុខា ដែលបានអនុញ្ញាតឱ្យលោក និងសហការីបានចូលជួបសម្ដែងការគួរសម​។​ ឯកអគ្គរដ្ឋទូតសហរដ្ឋអាមេរិក​ ក៏បានអបអរសាទរចំពោះវឌ្ឍនភាព និង​លទ្ធផលប្រកបដោយផ្លែផ្កា ក្នុងរយៈពេលកន្លងមកនេះ៕