តើថ្នាក់ដឹកនាំកំពូលៗកម្ពុជា-បារាំងណាខ្លះ ធ្លាប់ផ្លាស់ប្ដូរទស្សនកិច្ចគ្នាទៅវិញទៅមក?

នៅថ្ងៃទី១៨  និងទី១៩ ខែមករា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋម​ន្ត្រីនៃកម្ពុជា នឹងអញ្ជើញបំពេញទស្សនកិច្ចផ្លូវការនៅក្នុងប្រទេសបារាំង តបតាមការអញ្ជើញរបស់ប្រធានាធិបតីបារាំង លោក Emmanuel Macron។

ឆ្លៀតក្នុងឱកាសដែលសម្ដេចធិបតីអញ្ជើញបំពេញទស្សនកិច្ចផ្លូវការនៅក្នុងប្រទេស​​បារាំងនេះ «កម្ពុជាថ្មី» សូមបង្ហាញជូនប្រិយមិត្តអំពីដំណើរផ្លាស់ប្ដូរទស្សនកិច្ចរបស់ថ្នាក់ដឹកនាំកម្ពុជា-បារាំង ចាប់តាំងពីប្រទេសទាំងពីរចាប់ផ្ដើមមានទំនាក់ទំនងជាផ្លូវការជាមួយគ្នាសាជាថ្មីនៅឆ្នាំ១៩៥៣ រហូតមកដល់បច្ចុប្បន្ននេះ។

កាលពីឆ្នាំ១៩៦៦ ប្រធានាធិបតីបារាំង លោក Charles De Gaulle បានធ្វើដំណើរទស្សនកិច្ចផ្លូវការមកកាន់កម្ពុជា។ ក្នុងពេលបំពេញទស្សនកិច្ចផ្លូវការនៅកម្ពុជា នាថ្ងៃទី០១ ខែកញ្ញា ឆ្នាំ១៩៦៦ លោក Charles De Gaulle រួមជាមួយសម្ដេចព្រះបរមរតនកោដ្ឋ នរោត្ដម សីហនុ បានថ្លែងសុន្ទរកថារួមនៅពហុកីឡដ្ឋានអូឡាំពិក ដែលការថ្លែងនោះ ត្រូវបានគេប្រសិទ្ធនាម​ថា សុន្ទរកថានាក្រុងភ្នំពេញ។ ប្រធានាធិបតីបារាំងរូបនេះ ក៏បានអញ្ជើញទៅទស្សនាប្រាសាទនានាក្នុងខេត្តសៀមរាបផងដែរ។ ឈ្មោះរបស់លោក Charles De Gaulle ក៏ត្រូវបានគេយកទៅប្រសិទ្ធិនាមលើមហាវិថីមួយក្នុងខណ្ឌ៧មករា រាជធានីភ្នំពេញ គឺមហាវិថី Charles De Gaulle។

នៅឆ្នាំ១៩៩៣ ប្រធានាធិបតីបារាំង​មួយរូបទៀត គឺលោក François Mitterand បានអញ្ជើញបំពេញទស្សនកិច្ចផ្លូវការនៅកម្ពុជា។ បន្ទាប់មក នៅឆ្នាំ២០១១ នាយក​រដ្ឋមន្ត្រី​បារាំង លោក François Fillion បានបំពេញ​ទស្សនកិច្ច​ផ្លូវការរយៈពេល​២ថ្ងៃ នៅ​កម្ពុជា គឺថ្ងៃ ទី២ និងទី៣ ខែកក្កដា។ ក្នុងពេលនោះ លោក François Fillion បាន​ជួប​សវនាការ​ជាមួយ​សម្ដេចតេជោ ហ៊ុន សែន និង​ចូលគាល់​ព្រះមហាក្សត្រ​ ព្រះបាទ​ សម្តេច ព្រះបរមនាថ នរោត្តម សីហមុនី។  លោក​នាយក​រដ្ឋមន្ត្រី​បារាំង ​ក៏បានទៅ​ចូលរួម​សម្ពោធ​បិទ​គម្រោង​ជួសជុល​ប្រាសាទ​បាពួន នៅ​ខេត្តសៀមរាប ជាមួយ​ព្រះមហាក្សត្រ​ខ្មែរផងដែរ នាពេលនោះ។ លុះនៅខែកុម្ភ: ឆ្នាំ២០១៣  លោកនាយករដ្ឋមន្ត្រីបារាំង ហ្សង់ ម៉ាក អេរ៉ូ ក៏បានអញ្ជើញមកធ្វើទស្សនកិច្ចនៅប្រទេសកម្ពុជា ដើម្បីចូលរួមព្រះរាជពិធីបុណ្យព្រះបរមសព ព្រះករុណា ព្រះបាទ សម្តេច ព្រះនរោត្តម សីហនុ។

ដោយឡែក នៅថ្ងៃទី២៦ ខែតុលា ឆ្នាំ២០១៥ សម្តេចតេជោ ហ៊ុន សែន ក្នុងនាមជានាយករដ្ឋមន្រ្តីនៃកម្ពុជា បានអញ្ជើញទៅបំពេញទស្សនកិច្ចនៅប្រទេសបារាំង។ ក្នុងអំឡុងបំពេញទស្សនកិច្ចនោះ សម្តេចនាយករដ្ឋមន្ត្រី បានជួបពិភាក្សាការងារជាមួយលោកប្រធានាធិបតីបារាំង ហ្រ្វង់ស៊័រ ហូឡង់ និងលោក ឡូរ៉ង់ ហ្វាប៊ីយូស រដ្ឋមន្ត្រីក្រសួងការបរទេស និងអភិវឌ្ឍន៍អន្តរជាតិ។

រីឯ នៅក្នុងឆ្នាំ២០២២ នាថ្ងៃទី១៣ ខែធ្នូ សម្ដេចតេជោ ហ៊ុន សែន ក្នុងឋានៈជានាយករដ្ឋមន្ត្រីកម្ពុជា បានអញ្ជើញបំពេញទស្សនកិច្ចជាផ្លូវការនៅក្នុងប្រទេសបារាំងម្តងទៀត។ ក្នុងពេលនោះ សម្ដេចតេជោ ហ៊ុន​ សែន ត្រូវបានទទួលបដិ​សណ្ឋារកិច្ចកម្រិតខ្ពង់ខ្ពស់បំផុតពីសំណាក់ប្រធានាធិបតីបារាំង លោក Emmanuel Macron ក្រោមរូបភាពស្និទ្ធស្នាលយ៉ាងខ្លាំង។

ចូលដល់ឆ្នាំ២០២៣  ព្រះមហាក្សត្រកម្ពុជា សម្តេច ព្រះបរមនាថ នរោត្តម សីហមុនី ព្រះអង្គបានសព្វព្រះរាជហឫទ័យ យាងបំពេញព្រះរាជទស្សនកិច្ចផ្លូវរដ្ឋ នៅសាធារណរដ្ឋបារាំង ចាប់ថ្ងៃទី១២ ដល់ថ្ងៃទី១៨ ខែវិច្ឆិកា ឆ្នាំ២០២៣ តបតាមការសូមយាងរបស់លោក Emmanuel MACRON ប្រធានាធិបតីនៃសាធារណរដ្ឋបារាំង។

នៅក្នុងឆ្នាំ២០២៤ នេះវិញ សម្ដេចមហាបវរធិបតី ហ៊ុន​ ម៉ាណែត នឹងបំពេញទស្សនកិច្ចផ្លូវការនៅក្នុងប្រទេសបារាំង តបតាមការអញ្ជើញរបស់ប្រធានាធិបតីបារាំង។ នេះ គឺជាទស្សនកិច្ចផ្លូវការលើកទីមួយរបស់សម្ដេចធិបតី ទៅកាន់ប្រទេសក្នុងតំបន់អឺរ៉ុប បន្ទាប់ពីបានចូលកាន់តំណែងជានាយករដ្ឋមន្ត្រីកម្ពុជា៕​

ដោយ៖ ង៉ិល ណារ៉ាត់