នាយករដ្ឋមន្ត្រីកម្ពុជា អះអាងថា រាជរដ្ឋាភិបាល មិនយកអ្នកសារព័ត៌មានធ្វើជាសត្រូវឡើយ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានថ្លែងអះអាងថា រាជរដ្ឋាភិបាល មិនយកអ្នកសារព័ត៌មានធ្វើជាសត្រូវឡើយ។ តែផ្ទុយទៅវិញ រាជរដ្ឋាភិបាល តែងចាត់ទុកអ្នកសារព័ត៌មាន គឺជាដៃគូដ៏សំខាន់របស់រាជរដ្ឋាភិបាល។

ក្នុងពិធីបិទសន្និបាតបូកសរុបការងារប្រចាំឆ្នាំរបស់ក្រសួងព័ត៌មាន នារសៀលថ្ងៃទី២៣ ខែមករា ឆ្នាំ២០២៤នេះ សម្ដេចធិបតី បានវាយតម្លៃខ្ពស់ចំពោះសិទ្ធិសេរីភាពនៃការបំពេញការងារបស់អ្នកសារព័ត៌មាន នាពេលកន្លងទៅ ហើយត្រូវបានរាជរដ្ឋាភិបាលយកចិត្តទុកដាក់ និងលើកទឹកចិត្តដល់អ្នកសារព័ត៌មានទាំងអស់ឱ្យខិតខំបំពេញការងារប្រកបដោយក្រមសីលធម៌វិជ្ជាជីវៈ។

សម្ដេច នាយករដ្ឋមន្ត្រី បានថ្លែងដូច្នេះថា៖ «ភាពជាដៃគូរវាងរាជរដ្ឋាភិបាល និងវិស័យសារព័ត៌មាន ជាមួយអ្នកសារព័ត៌មាន ចាំបាច់ណាស់ត្រូវតែធ្វើ ហើយរាជរដ្ឋាភិបាល មិនយកអ្នកកាសែតធ្វើជាសត្រូវទេ យើងជាដៃគូជាមួយគ្នា»។ សម្ដេចធិបតី គូសបញ្ជាក់ថា ព័ត៌មាន មិនមែនត្រូវការតែប្រជាពលរដ្ឋនោះទេ តែសូម្បីសម្ដេច ជាប្រមុខរាជរដ្ឋាភិបាល ក៏ត្រូវការព័ត៌មានដែរ។

ដូច្នេះ សម្ដេច នាយករដ្ឋមន្ត្រី បានជំរុញដល់អ្នកសារព័ត៌មានទាំងអស់ គប្បីជួយយកអាសារាជរដ្ឋាភិបាល ក្នុងនាមជាដៃគូផ្ដល់ព័ត៌មាននានានៅក្នុងសង្គមឱ្យបានលឿន សុក្រឹត្យ ត្រឹមត្រូវ ប្រកបដោយក្រមសីលធម៌វិជ្ជាជីវៈ ដើម្បីឱ្យរាជរដ្ឋាភិបាល អាចចាត់វិធានការដោះស្រាយបានទាន់ពេលវេលា យ៉ាងហោចណាស់ ក៏បានឆ្លើយតបបំភ្លឺជុំវិញកិច្ចការទាំងនោះ៕