អ្នកនាំពាក្យអះអាងថា វិនិយោគិនចិន និងក្រុមហ៊ុនអាមេរិក​នៅចិន នឹងចូលមកវិនិយោគនៅកម្ពុជាឆាប់ៗនេះ

ក្រោយចូលឆ្នាំចិន អាចនឹងមានវិនិយោគិនចិន និងក្រុមហ៊ុនអាមេរិកនៅចិន ចូលមកបណ្តាក់ទុនវិនិយោគនៅកម្ពុជា ជាបន្តបន្ទាប់។ នេះបើតាមការលើកឡើងរបស់លោក ហេង សុខគង់ អ្នកនាំពាក្យក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍។

ថ្លែងប្រាប់កម្ពុជាថ្មី លោក ហេង សុខគង់ បានឱ្យដឹងថា មានកត្តាសំខាន់មួយចំនួនដែលទាក់ទាញវិនិយោគិនចិន និងក្រុមហ៊ុនអាមេរិកនៅចិនឱ្យចូលមកវិនិយោគនៅកម្ពុជា។ លោកបានថ្លែងបន្តថា «ថ្មីៗនេះ ខ្ញុំទើបបានជួប​ប្រធានសភាពាណិជ្ជកម្មអាមេរិកប្រចាំនៅចិនភាគខាងត្បូង បានលើកឡើងថា វិនិយោគិនអាមេរិក នៅចិនមួយ​ចំនួនកំពុងស្វែងរកទីតាំងវិនិយោគនៅអាស៊ីអាគ្នេយ៍ ដែលក្នុងនោះកម្ពុជា គឺជាជម្រើសមួយដ៏ល្អ សម្រាប់​បណ្តាក្រុមហ៊ុនអាមេរិកនៅប្រទេសចិន នឹងជ្រើសរើសចូលមកវិនិយោគនៅឆ្នាំ ២០២៤-២០២៥»។

មន្រ្តីជាន់ខ្ពស់ក្រសួងឧស្សាហកម្ម បានគូសបញ្ជាក់ទៀតថា ក្រោមការដឹកនាំរបស់រាជរដ្ឋាភិបាលថ្មី មានសម្តេច ហ៊ុន ម៉ាណែត ជានាយករដ្ឋមន្រ្តី បានបង្កើតយន្តការជាចរន្តដើរទៅមុខលឿន ដោយមានកិច្ចសហការទាំងមន្រ្តីចាស់ និងថ្មី បង្កើនផលិតភាពការងារប្រកបដោយគុណាធិបតេយ្យ និងតម្លាភាព។ កត្តានេះ នឹងធ្វើឱ្យកម្ពុជា ទាក់ទាញបាន​វិនិយោគិនបន្ថែមទៀត តាមរយៈការចុះបញ្ជីតាមប្រព័ន្ធអនឡាញ នឹងជួយសម្រួលដល់ធុរកិច្ច។

លើសពីនេះទៀត កត្តាគោលនយោបាយ សុខសន្តិភាពរបស់រាជរដ្ឋាភិបាល ចាប់តាំងពីយុទ្ធសាស្ត្រចតុកោណ រហូតដល់បញ្ចកោណដំណាក់កាលទី១នេះ ជាយុទ្ធសាស្រ្តដែលមានការទាក់ទាញវិនិយោគិន បួករួមទាំង​ច្បាប់វិនិយោគថ្មីរបស់កម្ពុជា ដែលមានការទាក់ទាញខ្លាំង។

ទាក់ទិននឹងទីតាំងភូមិសាស្រ្ត កម្ពុជា ស្ថិតនៅចំកណ្តាលអាស៊ាន។ ដូច្នេះហើយ កម្ពុជា បានដើរតួនាទីសំខាន់ ក្នុងការប្រែក្លាយខ្លួនទៅជាមជ្ឈមណ្ឌលភស្តុភារកម្ម សម្រាប់អាស៊ានទាំងមូល។ លើសពីនេះទៀត គម្រោង​ព្រែកជីកហ្វូណន គឺមានសារសំខាន់ក្នុងការជំរុញលើកកម្ពស់ ការតភ្ជាប់វិស័យភស្តុភារកម្មរវាងកម្ពុជា និងអន្តរជាតិផងដែរ។

ជាមួយគ្នានេះ កត្តាហេដ្ឋារចនាសម្ព័ន្ធ ទាំងផ្លូវទឹក ផ្លូវគោក ផ្លូវដែក និងផ្លូងអាកាស បានរៀបចំល្អប្រសើរ ជាពិសេស​ការរៀបចំប្រព័ន្ធទឹកភ្លើង មានភាពល្អ និងតម្លៃសមរម្យ។ ដោយឡែកកម្លាំងពលកម្មជំនាញ ដែលរដ្ឋាភិបាល បានរៀប​ចំបណ្តុះបណ្តាល ១លាន ៥សែននាក់ ក៏ជាកត្តាសំខាន់ទាក់ទាញវិនិយោគបរទេសផងដែរ។ នេះជាការ​បន្ថែម​របស់លោក ហេង សុខគង់។

អ្នកនាំពាក្យរូបនេះ មានសុទិដ្ឋិនិយមថា វិនិយោគិនបរទេស អាចនឹងមកបណ្តាក់ទុនលើវិស័យអទិភាព ដូចជា វិស័យកម្មន្តសាល វិស័យឧស្សាហកម្មវាយនភណ្ឌ មិនមែនកាត់ដេរ និងឧស្សាហកម្មបច្ចេកវិទ្យា ជាដើម។ ក្រៅពីនេះ ក៏អាចមានការបណ្តាក់ទុនលើផ្នែកភស្តុភារកម្ម​ ទេសចរណ៍ ឧស្សាហកម្មយានយន្ត និងរថយន្តអគ្គិសនី ផងដែរ៕