ព័ត៌មានជាតិ

គ្រួសារកសិករនៅឃុំព្រែកកុយនិយាយពីស្ថានភាពជីវិតអ្នកចម្ការដាំដុះដំណាំចិញ្ចឹមជីវិត

បានផុស

៦ ខែ មុន

នៅ

ថ្ងៃសៅរ៍ ២៧ មករា ២០២៤

ដោយ

គ្រួសារកសិកររស់នៅភូមិព្រែកកុយ ស្រុកកងមាស ខេត្តកំពង់ចាម លោក ស្បោង សុកាន់ មានដាំដំណាំជាច្រើនមុខមានដូចជា ត្រឡាច សណ្ដែកួរ ននោង ត្រសក់ ស្វាយ ចេក ល្ហុងជាដើម។

រស់នៅពឹងអាស្រ័យលើរបរកសិកម្ម កសិកររូបនេះបានប្រាប់ពីស្ថានភាពនៃការដាំដុះដំណាំ ការប្រើប្រាស់ជីលើផលដំំណាំ រួមទាំងការប្រមូលយកទៅលក់លើទីផ្សារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស្បោង សុកាន់ បានប្រាប់ថា ការដាំដំណាំសព្វថ្ងៃជួបការលំបាកខ្លះដែរ។ លោកបានលើកឡើងពីផ្លូវចូលចំការរបស់លោកពេលខ្លះទឹកឡើង ត្រូវចែវទូកមកមើលដំណាំដោយខ្លាចលិចលង់ខូចបង់។

ទាក់ទងផលដំណាំដាំដុះ ពេលខ្លះមានឈ្មួញមកទទួលទិញដល់ទីកន្លែង។ ពេលខ្លះក៏ត្រូវយកទៅលក់នៅផ្សារដោយខ្លួនឯង។

ដាំដុះដំណាំរាល់ថ្ងៃ លោក ស្បោង សុកាន់ប្រាប់ថាជៀសមិនផុតពីការប្រើប្រាស់ថ្នាំគីមីខ្លះ ដើម្បីឲ្យផលដំណាំលូតលាស់បានល្អ ការពារសត្វល្អិតកុំឲ្យស៊ីដំណាំ។ តែការប្រើជីគីមីត្រូវមានកំណត់។ ដូចបន្លែត្រូវត្រាំទឹកនិងផ្អាកបាញ់ថ្នាំ១អាទិត្យមុនយកទៅលក់ ធ្វើបែបនេះដើម្បីរក្សាសុខភាពពលរដ្ឋដែលទិញយកទៅបរិភោគ។

បញ្ហាប្រភពទឹកក៏ជារឿងប្រឈម បើតាមគ្រួសារកសិកររូបនេះ សព្វថ្ងៃនេះពឹងផ្អែកលើទឹកព្រែកទើបអាចបូមចូលក្នុងអណ្ដូងយកមកប្រើលើផលដំណាំ។

បើនិយាយពីតម្លៃវិញ ឡើងចុះមិនស្ថិតស្ថេរទេ។ នេះបើតាម លោក ស្បោង សុកាន់។

ឥឡូវតម្លៃបន្លែឡើងថ្លៃបន្តិចធ្វើឱ្យលោកមានសន្ទុះទឹកចិត្តបានខ្លះ។ កាលពីមុនតម្លៃបន្លែ ១ គីឡូ តែ ៥០០ រៀលទេ ឥឡូវនេះឡើងថ្លៃបន្តិចគឺមួយគីឡូ ២០០០ រៀល។

«មុខរបរយើងតែប៉ុណ្ណឹង ទោះបីទីផ្សារឡើងចុះក៏យើងនៅតែដាំបន្តដែរ»។ នេះបើតាមលោក ស្បោង សុកាន់។

អ្នកស្រី សាក់ គឹមសល់ ជាប្រពន្ធបានបន្ទរថា អ្នកស្រីសប្បាយចិត្តរបរកសិកម្មនេះ បើទោះបីបានផលឬមិនបានផលក្តី យ៉ាងហោចណាស់ក៏អាចជួយការសិក្សាដល់កូនក្នុងបន្ទុក ៣ នាក់របស់អ្នកស្រីផងដែរ។

ជាមួយគ្នានេះ គ្រួសារលោក ស្បោង សុកាន់ ក៏អំពាវនាវដល់រដ្ឋអំណាចភូមិឃុំជួយលើកទឹកចិត្តកសិករ និងផ្ដល់ជាយោបល់ក្នុងការប្រកបរបរកសិកម្មឲ្យល្អប្រសើរ៕

អត្ថបទ៖ រុងរឿង

Related Topics:ខេត្តកំពង់ចាម