មន្ត្រីជាន់ខ្ពស់ ប.ស.ស. ជំរុញផ្តល់សេវាឱ្យលឿនរហ័ស ស្របតាមកំណែទម្រង់ថ្មី

មន្ត្រីជាន់ខ្ពស់ ប.ស.ស. បានជំរុញឱ្យថ្នាក់ដឹកនិងមន្ត្រី ប.ស.ស. នៅទូទាំងប្រទេស ត្រូវពង្រឹងការផ្តល់សេវាជូនដល់សមាជិករបស់ខ្លួន ឱ្យកាន់តែមានភាពរហ័សទាន់ពេលវេលា ឆ្លើយយតបទៅនឹងតម្រូវការនាពេលបច្ចុប្បន្ន និងទៅអនាគត ស្របតាមកំណែទម្រង់ថ្មីរបស់រាជរដ្ឋាភិបាល និងការកើនឡើងជាបន្ដបន្ទាប់របស់សមាជិក ប.ស.ស. ។

នៅក្នុងប្រជុំពិភាក្សាពិនិត្យវឌ្ឍនភាពការងារ និងបញ្ហាប្រឈមជាមួយថ្នាក់ដឹកនាំ ១១ នាយកដ្ឋាន និង ១ អង្គភាព និងសាខា ប.ស.ស. ទូទាំងប្រទេស នៅថ្ងៃទី២៩ ខែមករា នេះ លោក ម៉េង ហុង អគ្គនាយក ប.ស.ស. ស្តីទី នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ក្នុងរយៈពេលប៉ុន្មានខែកន្លងមកនេះ ការអនុវត្តការងាររបស់ ប.ស.ស. មានភាពមមាញឹកជាខ្លាំង ពិសេសគោលនយោបាយអាទិភាពថ្មីៗ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានដាក់ចេញជាបន្ដបន្ទាប់ និងបានផ្ដល់ផលប្រយោជន៍ជាច្រើនជូនប្រជាពលរដ្ឋ ជាហេតុនាំឱ្យការចុះឈ្មោះជា សមាជិក ប.ស.ស. មានការកើនឡើងយ៉ាងច្រើន។

លោកអគ្គនាយកស្តីទី បានបន្ដថា ទន្ទឹមនឹងការកើនឡើងរបស់ សហគ្រាស គ្រឹះស្ថាន និងចំនួនសមាជិក ប.ស.ស. នាពេលនេះ ដើម្បីបំពេញតម្រូវការក្នុងការផ្ដល់សេវាជូនសមាជិកឱ្យបានទាន់ពេលវេលា តម្រូវឱ្យថ្នាក់ដឹកនាំអង្គភាព និងបុគ្គលិក ប.ស.ស. ទាំងអស់មានការយោគយល់ នឹងភាពអំណត់ខ្ពស់ក្នុងការបំពេញការងារ ជាពិសេសខិតខំយកចិត្តទុកដាក់ផ្តល់សេវាសាធារណៈមួយនេះ ឱ្យកាន់តែប្រសើរឡើងបន្ថែមទៀត ប្រកបដោយប្រសិទ្ធភាព តម្លាភាព និងទាន់ពេលវេលា ស្របទៅតាមអនុសាសន៍ណែនាំរបស់ថ្នាក់ដឹកនាំ៕

អត្ថបទ៖ សំអឿន