ព័ត៌មានជាតិ

អភិបាលរាជធានី អំពាវនាវឲ្យប្រជាពលរដ្ឋ កុំជឿលើជនអគតិមួយចំនួន ជុំវិញការចាក់វ៉ាក់សាំងកូវីដ-១៩

បានផុស

៣ years មុន

នៅ

ថ្ងៃអង្គារ ១៦ កុម្ភៈ ២០២១

ដោយ

អភិបាលនៃគណៈអភិបាលរាជធានីភ្នំពេញលោក ឃួង ស្រេង បានធ្វើការអំពាវនាវឲ្យបងប្អូនប្រជាពលរដ្ឋទាំងអស់ កុំជឿលើការឃោសនាពីជនអគតិមួយចំនួន ជុំវិញការចាក់វ៉ាក់សាំងកូវីដ-១៩ (Sinopharm Beijing Institute of Biological Products) ខណៈដែលប្រមុខប្រមុខរាជរដ្ឋាភិបាលបានខិតខំប្រឹងប្រែងកៀរគររហូតទទួលបានចាក់វ៉ាក់សាំងកូវីដ-១៩ និងស្របពេល ដែលប្រទេសអ្នកផ្តល់ជំនួយប្រឈមនិងជំងឺនេះដែរនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសម្ភាសជាមួយអ្នកកាសែតកាលពីល្ងាចថ្ងៃទី១៥កុម្ភៈនេះ លោក ឃួង ស្រេង បានមានប្រសាសន៍លើកឡើងថា កាលពីថ្ងៃទី១០កុម្ភៈកន្លងមកនេះ រូបលោកផ្ទាល់ លោក ហ៊ុន ម៉ាណែត លោក ហ៊ុន ម៉ានិត កូនប្រុសរបស់សម្ដេចអគ្គមហាសេនាបតីតេជោ ហ៊ុន សែន និងឥស្សរជនមួយចំនួនទៀត បានចាក់វ៉ាក់សាំងការពារជំងឺកូវីដ-១៩នេះ នៅមន្ទីរពេទ្យកាល់ម៉ែត ខណៈដែលឥស្សរជនមួយចំនួនទៀតបានចាក់នៅមន្ទីរពេទ្យផ្សេងទៀត ក្រោមការរៀបចំរបស់ក្រសួងសុខាភិបាល។

លោកបញ្ជាក់ថា សម្រាប់រូបលោក គិតមកដល់ពេលនេះ ការចាក់វ៉ាក់សាំងកូវីដ-១៩ មានរយៈពេល៥ថ្ងៃហើយ ប៉ុន្តែវ៉ាក់សាំងកូវីដ-១៩មិនបានធ្វើឲ្យលោកមានបញ្ហាអ្វីនោះទេ ពោលគឺគ្រាន់តែធ្វើឲ្យលោកស្អិតភ្នែកប្រមាណ១ម៉ោងក្រោយ ការចាក់វ៉ាក់សាំងនេះប៉ុណ្ណោះ បន្ទាប់ពីនោះសុខភាពរបស់លោកនៅល្អប្រសើរដដែល លោកអាចហាត់ប្រាណបានដូចសព្វមួយដង មិនមានអ្វីដែលធ្វើឲ្យប៉ះពាល់ដល់សុខភាពនោះទេ។ ដូច្នេះ លោកសូមធ្វើការអំពាវនាវឲ្យបងប្អូនប្រជាពលរដ្ឋទាំងអស់ កុំជឿលើការឃោសនារបស់ជនអគតិ ដែលចង់បំផ្លាញ អាយុជីវិតប្រជាពលរដ្ឋនិងប្រទេសជាតិរបស់យើង។ ជនអគតិទាំងនេះគ្មានបំណងល្អជាមួយយើងទេ ពួកគេមានតែគំនិតចង់បំភ្លេចបំផ្លាញ ភាពសុខសាន្តរបស់កម្ពុជាតែប៉ុណ្ណោះ។

លោកបានបន្តទៀតថា សម្ដេចតេជោ ហ៊ុន សែន គ្មានហេតុផលណាមួយ ដែលត្រូវបំភ្លេចបំផ្លាញអាយុជីវិតប្រជាពលរដ្ឋនោះទេ។ សម្ដេចមិនត្រឹមតែ បានរំដោះប្រទេសជាតិចេញពីការកាប់សម្លាប់នៃរបបប៉ុលពតប៉ុណ្ណោះទេ តែសម្ដេចបានកសាងប្រទេសដ៏លំបាកមួយនេះ ក្លាយជាប្រទេសមានការអភិវឌ្ឍរីកចម្រើនថែមទៀត។ សម្ដេចបានគិតគូរពី សុខទុក្ខប្រជាពលរដ្ឋ តើមានហេតុផលណាមួយ ដែលសម្ដេចចង់បំភ្លេចបំផ្លាញអាយុជីវិតប្រជាពលរដ្ឋនោះ។ លោកក៏បានបញ្ជាក់ទៀតថា យោងតាមអនុសាសន៍របស់សម្ដេចតេជោ ហ៊ុន សែន ប្រទេសកម្ពុជាក្រោយពីទទួលបានវ៉ាក់សាំងកូវីដ-១៩និងក្រោយពីបានចាក់វ៉ាក់សាំងនេះ ដល់ប្រជាពលរដ្ឋអស់ នៅក្នុងព្រះរាជាណាចក្រកម្ពុជាហើយនោះ សេដ្ឋកិច្ចកម្ពុជានឹងកម្រើកឡើងវិញហើយ តាមរយៈការចូលមកវិនិយោគពីសំណាក់អ្នកវិនិយោគទុនបរទេសនៅក្នុងព្រះរាជាណាចក្រកម្ពុជា៕

អត្ថបទ៖ ស្រីរ័ត្ន

សូមចុចអាន៖ Update បន្ថែម ចំនួនអ្នកចាក់វ៉ាក់សាំងរួច គិតមកដល់ថ្ងៃ ១៥ កុម្ភៈនេះ

Related Topics:វ៉ាក់សាំងកូវីដ-១៩