ថៃមិនបានជជែករឿងបើកច្រកចូលប្រាសាទព្រះវិហារជាមួយកម្ពុជាឡើយ

ឆ្លើយតបនឹងសំណួររបស់អ្នកសារព័ត៌មាន បន្ទាប់ពីបញ្ចប់ដំណើរទស្សនកិច្ចផ្លូវការនៅក្នុងប្រទេសថៃ រដ្ឋមន្ត្រីប្រតិភូអមនាយករដ្ឋមន្ត្រី លោក ហ្សង់ ហ្វ្រង់ស្វ័រតាន់ បានឱ្យដឹងថា នាយករដ្ឋមន្ត្រីថៃ មិនបានលើកយកបញ្ហាសុំឱ្យកម្ពុជាបើកច្រកចូលប្រាសាទព្រះវិហារមកជជែកជាមួយនាយករដ្ឋមន្ត្រីកម្ពុជាឡើយ នៅក្នងជំនួបជាមួយសម្ដេចនាយករដ្ឋមន្ត្រីកម្ពុជា។

លោក ហ្សង់ ហ្វ្រង់ស្វ័រតាន់ សង្កត់ធ្ងន់ដូច្នេះ “ ជាការពិតមុនទស្សនកិច្ចរបស់សម្ដេចធិបតី នៅថៃ មានមែនការលើកឡើងតាមរយៈសារព័ត៌មាន ការលើកឡើងពីសំណាក់ព្រឹទ្ធសមាជិក និងអ្នកតំណាងរាស្ត្រថៃមួយចំនួន ដែលចង់ឃើញនាយករដ្ឋមន្ត្រីថៃ ឯកឧត្ដម សេដ្ឋា ថាវីស៊ីន លើកមកពិភាក្សាជាមួយសម្ដេចធិបតី នូវលទ្ធភាពនៃការបើកច្រកព្រំដែនព្រះវិហារឡើងវិញ ប៉ុន្តែនៅថ្ងៃនេះ​ នៅបាងកក ការពិតជាក់ស្ដែង គឺខាងភាគីថៃមិនបានលើកមកពិភាក្សាទេ”។

គួរឱ្យដឹងថា កាលពីចុងខែមករាកន្លងទៅ សារព័ត៌មានរបស់ប្រទេសថៃបានចុះផ្សាយថា គណបក្សភឿថៃ បានជំរុញឱ្យនាយករដ្ឋមន្ត្រីថៃ លោក សេដ្ឋា ថាវីស៊ីន លើកយកបញ្ហាបើកច្រកចូលទស្សនាប្រាសាទព្រះវិហារឡើងវិញ ជជែកជាមួយសម្ដេចធិបតី ហ៊ុន ម៉ាណែត ក្នុងទស្សនកិច្ចផ្លូវការ។

ជាការកត់សម្គាល់ នេះមិនមែនជាលើកទីមួយ ឬទើបតែជាលើកទីពីរឡើយដែលថៃចង់ឱ្យមានការបើកច្រកចូលទស្សនាប្រាសាទព្រះវិហារនេះ ពោលគឺបញ្ហានេះ ស្ទើរតែរាប់ភ្លេចទៅភាគីថៃតែងតែចិញ្ចឹមចិត្តសុំឱ្យកម្ពុជាបើកច្រកចូលប្រាសាទព្រះវិហារតាមស្រុក Kantharalak របស់ខេត្តស៊ីសាកេត ត្រូវបានបិទ ចាប់តាំងពីឆ្នាំ២០០៨មក ក្រោយមានការប៉ះទង្គិចនៅព្រំដែនរវាងកងទ័ពថៃ។

ជាក់ស្ដែងកាលពីឆ្នាំមុន អភិបាលខេត្ត Ubon Ratchathani ក៏បានស្នើកម្ពុជាសុំអនុញ្ញាតឲ្យភ្ញៀវទេសចរចូលប្រាសាទព្រះវិហារ តាមច្រកចូលស៊ីសាកេតផងដែរ ប៉ុន្តែសំណើរនេះ​ មិនទទួលបានការយល់ព្រមពីសំណាក់ភាគីខ្មែរឡើយ៕