Connect with us

ព័ត៌មានជាតិ

បុណ្យចូលឆ្នាំចិនឆ្នាំនេះ សិស្សានុសិស្សមករៀនស្ទើរតែ ១០០ ភាគរយ

បានផុស

នៅ

នៅក្នុងពិធីបុណ្យចូលប្រពៃណីឆ្នាំចិន-វៀតណាម ឆ្នាំនេះ មានសិស្សានុសិស្សមករៀនយ៉ាងច្រើនលើសលប់រហូតដល់ទៅជិត ១០០ ភាគរយ ខ្ពស់ជាងឆ្នាំមុនៗ។ នេះជាការលើកឡើងរបស់ លោកស្រី ឃួន វិច្ឆិកា អ្នកនាំពាក្យ ក្រសួងអប់រំ យុវជន និងកីឡា មានប្រសាសន៍ នៅរសៀលថ្ងៃទី១២ ខែកុម្ភៈ នេះ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ឃួន វិច្ឆិកា បានបន្តថា ការណ៍ដែលសិស្សមករៀនច្រើនលើសលប់នេះ ដោយសារការខិតខំប្រឹងប្រែងរបស់គណៈគ្រប់គ្រងសាលារៀន និងលោកគ្រូអ្នកគ្រូ ពិសេសមានការចូលរួមពីមាតាបិតាផ្ទាល់។ យោងតាមរបាយការណ៍របស់ មន្ទីរអប់រំ យុវជន និងកីឡារាជ ធានីភ្នំពេញសិស្សមានវត្តមានចំនួន ៩៩,៩៣ ភាគរយ ដែលបញ្ជាក់ពីដំណើរការតាមប្រក្រតីរបស់សាលារៀនគ្រប់កម្រិត នៅគ្រប់ខណ្ឌទាំង១៤ នៃរាជធានីភ្នំពេញ។

លោកស្រីបានបន្ថែមថា ការណ៍ដែលសិស្សមករៀនច្រើនលើសលប់នេះ មកពីសិស្ស អាណាព្យាបាលសិស្ស និងលោកគ្រូអ្នកគ្រូបានយល់ដឹងពីការផ្សព្វផ្សាយរបស់ក្រសួង ក៏ដូចជាមន្ទីរអប់រំរាជធានីភ្នំពេញថា បុណ្យចូលឆ្នាំចិនមិនមែនជាបុណ្យប្រពៃណីរបស់ខ្មែរ និងមិនមាននៅក្នុងប្រតិទិន នៃថ្ងៃឈប់សម្រាកប្រចាំឆ្នាំរបស់រាជរដ្ឋាភិបាលដែរ។

លោកស្រីបានបញ្ជាក់ថា ក្រៅពីចំណុចខាងលើ លទ្ធផលនេះក៏បញ្ជាក់ពីការខិតខំប្រឹងប្រែងរបស់គណៈគ្រប់គ្រងសាលារៀន និងលោកគ្រូអ្នកគ្រូ។ រីឯមាតាបិតាក៏មើលឃើញពីសារៈសំខាន់នៃការសិក្សា ពិសេសការពង្រឹងការគុណភាពអប់រំដែលទាមទារចាំបាច់ការចូលរួមពីគ្រប់ភាគីពាក់ព័ន្ធ។

លោក ហែម ស៊ីណារ៉េត ប្រធាន មន្ទីរអប់រំ យុវជន និងកីឡា រាជធានីភ្នំពេញ បានមានប្រសាសន៍ នៅព្រឹកថ្ងៃទី១២ ខែកុម្ភៈ នេះថា មុនពិធីបុណ្យចូលឆ្នាំចិនមកដល់ មន្ទីរតែងតែរៀបចំកិច្ចប្រជុំជាមួយនាយកសាលានៅរាជធានីភ្នំពេញដើម្បីណែនាំឱ្យសាលានីមួយៗ ប្រជុំផ្សព្វផ្សាយដល់សិស្ស និងគ្រូឱ្យបានយល់ច្បាស់ ពិសេសនៅពេលម៉ោងគោរទង់ជាតិថា បុណ្យចូលឆ្នាំចិននេះមិនមែនជាថ្ងៃឈប់សម្រាករបស់ខ្មែរទេ។ ដូចនេះលោកគ្រូអ្នកគ្រូត្រូវមកបង្រៀន និងសិស្សានុសិស្សត្រូវមករៀនដូចថ្ងៃធម្មតា មិនមានការឈប់សម្រាកឡើយ។

លោកបានបន្ថែមទៀតថា បុណ្យចូលឆ្នាំចិនឆ្នាំនេះ មន្ទីរមិនបានបង្កើតគណៈកម្មការឃ្លាំមើលតាមសាលានៅរាជធានីភ្នំពេញដូចឆ្នាំមុនទេ ដោយឱ្យតាមសាលានានាមានភាពម្ចាស់ការក្នុងការគ្រប់គ្រងការបង្រៀន និងរៀនរៀងៗខ្លួន។ប៉ុន្តែគណៈគ្រប់គ្រងសាលាទាំងអស់ត្រូវរាយការណ៍តាមគ្រុបតេឡេក្រាម ២ដង ក្នុង ១ថ្ងៃ គឺពេលព្រឹក និងពេលរសៀលមកមន្ទីរ ដើម្បីគ្រប់គ្រងវត្តមានគ្រូ និងសិស្ស៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម