នាយករដ្ឋមន្ត្រី បញ្ជាក់ជាថ្មីថា ឆ្នាំ ២០២៤នេះ​ ជាឆ្នាំពង្រឹងក្រសួង-ស្ថាប័ន និងកែសម្រួលរចនាសម្ព័ន្ធផ្ទៃក្នុង

ជាថ្មីម្ដងទៀត សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ឆ្នាំ ២០២៤នេះ ជាឆ្នាំដែលត្រូវពង្រឹងក្រសួង-ស្ថាប័នទាំងអស់ ពិសេសទៅលើការកែសម្រួលរចនាសម្ព័ន្ធផ្ទៃក្នុង។

នៅក្នុងពិធីបិទសន្និបាតក្រសួងអធិការកិច្ច នាព្រឹកថ្ងៃទី ១៣ ខែកុម្ភៈនេះ សម្ដេចនាយករដ្ឋមន្ត្រី​ បានមានប្រសាសន៍ថា​ ការពង្រឹងក្រសួង-ស្ថាប័ន ក៏ដូចជាការកែសម្រួលរចនាសម្ព័ន្ធផ្ទៃក្នុង គឺដើម្បីកុំឲ្យមានភាពចន្លោះប្រហោង ឬកន្លែងខ្លះមានចំនួនលើសលប់។

ប្រមុខរាជរដ្ឋាភិបាល បានថ្លែងថា «ហើយផ្ទៃក្នុងដូចគ្នា ជួនកាលយើងពិនិត្យមើលឡើងវិញ​ វាយតម្លៃឡើងវិញ ជាពិសេសឆ្នាំ ២០២៤នេះ ដែលខ្ញុំថា យកជាឆ្នាំពង្រឹងស្ថាប័នទាំងមូល…គ្រប់ក្រសួង-ស្ថាប័ន ឲ្យកែសម្រួលរចនាសម្ព័ន្ធផ្ទៃក្នុង អញ្ចឹងត្រូវមើលរចនាសម្ព័ន្ធ តួនាទី ភារកិច្ច និងយន្តការរបស់រដ្ឋាភិបាល ក្នុងក្របខណ្ឌអន្តរក្រសួង អន្តរស្ថាប័នផង បើមិនអញ្ចឹងទេយើងនៅតែ បានន័យថា កន្លែងខ្លះគរច្រើនពេក កន្លែងខ្លះចន្លោះប្រហោង»។

សម្ដេចធិបតី ហ៊ុន ម៉ាណែត បានលើកឡើងថា ប្រសិនបើមិនមានការពង្រឹងក្រសួង-ស្ថាប័ន និងកែសម្រួលរចនាសម្ព័ន្ធផ្ទៃក្នុងទេនោះ នឹងមិនទទួលបានប្រសិទ្ធភាពការងារល្អនោះទេ។ «ហើយបើអញ្ចឹងប្រសិទ្ធភាពអត់មាន កន្លែងជាន់ក៏ជាន់ច្រើន កន្លែងខ្លះអត់សូវមាន…អត់ដឹងអ្នកណាទទួលខុសត្រូវ»។ នេះជាការលើកឡើងបន្ថែមរបស់សម្ដេចធិបតី ហ៊ុន ម៉ាណែត៕