រដ្ឋបាលខេត្តកោះកុង នឹងរៀបចំការរត់ប្រណាំង៨គ.ម ដើម្បីអបអរសាទរខួបអន្តរជាតិនារី ៨ មីនា

រដ្ឋបាលខេត្តកោះកុង សហការជាមួយសហភាពសហព័ន្ធយុវជនកម្ពុជាខេត្តកោះកុង នឹងរៀបចំព្រឹត្តិការណ៍រត់ប្រណាំងក្នុងរយៈចម្ងាយ ៨គីឡូម៉ែត្រ ដើម្បីអបអរសាទរខួបលើកទី១១៣ ទិវាអន្តរជាតិនារី ៨មីនា ឆ្នាំ២០២៤ខាងមុខ។ នេះបើតាមការផ្សព្វផ្សាយរបស់រដ្ឋបាលខេត្តកោះកុងនៅលើបណ្តាញសង្គមនៅថ្ងៃទី២៧ ខែកុម្ភៈ នេះ។

ព្រឹត្តិការណ៍រត់ចម្ងាយ ៨គីឡូម៉ែត្រនេះ នឹងរៀបចំនៅថ្ងៃទី៩ ខែមីនា ឆ្នាំ២០២៤ខាងមុខ វេលាម៉ោង ៨ព្រឹកតទៅ នៅរង្វង់មូលវិថីសាយ ភូថង ស្ថិតក្នុងស្រុកបូទុមសាគរ ខេត្តកោះកុង។ ព្រឹត្តិការណ៍រត់នេះ មិនត្រឹមតែជាការអបអរសាទរដល់ទិវាអន្តរជាតិនារី ៨មីនានោះទេ ធ្វើឡើងដើម្បីប្រមូលមូនិធិជួយអភិវឌ្ឍន៍សហគមន៍តំបន់ការពារធម្មជាតិពាមក្រសោបផងដែរ។ ចំពោះការចូលរួម គឺអាចចុះឈ្មោះចូលរួមដោយសេរីទាំងបុរស នឹងស្ត្រី។

នៅក្នុងឱកាសរត់ប្រណាំងនេះ អ្នកចូលរួមដែលទទួលបានជ័យលាភីនឹងមានឱកាសទទួលបានប្រាក់រង្វាន់ចាច្រើន ក្នុងនោះ អ្នករត់ជ័យលាភីលេខ១ នឹងទទួលបានប្រាក់រង្វាន់ ២លានរៀល ជ័យលាភីលេខ២ ទទួលបាន ១លាន ៥សែនរៀល លេខ៣ ទទួលបាន ១លានរៀល រីឯ ជ័យលាភីលេខ៤ និងលេខ៥ គឺទទួលបានម្នាក់៥សែនរៀលថែមទៀតផង៕