អភិបាលខេត្តកំពង់ចាម៖ បច្ចុប្បន្នម្ចាស់ដីកាយថ្មចេញវិញបាន ៧០% ហេីយ

ឯកឧត្ដម​ អ៊ុន ចាន់ដា អភិបាលខេត្តកំពង់ចាម បានបញ្ជាក់ថា ម្ចាស់ដីដែលចាក់ថ្មរំលោភយកទន្លេ ស្ថិតនៅភូមិព្រៃទទឹង ឃុំឫស្សីស្រុក ស្រុកស្រីសន្ធរ បច្ចុប្បន្នអនុវត្តវិធានការរបស់រដ្ឋបាលខេត្ត ដោយកាយយកថ្មចេញពីទន្លេបានលទ្ធផល ៧០% ហើយ ដោយម្ចាស់ដីកំពុងបន្តការយកថ្មចេញឱ្យរួចរាល់ក្នុងរយៈពេល ១០ថ្ងៃទៀត។

​

លោកអភិបាលខេត្ត បានបញ្ជាក់ដូច្នេះ នៅថ្ងៃទី២ ខែមីនា ឆ្នាំ ២០២៤ ខណៈពេលដឹកនាំក្រុមការងារ មន្ត្រីពាក់ព័ន្ធចុះពិនិត្យដោយផ្ទាលនូវសកម្មភាព ការកាយយកថ្មចេញពីទន្លេ ស្ថិតនៅទីតាំងខាងលើ។

លោក អ៊ុន ចាន់ដា បានបញ្ជាក់ទៀតថា ក្រោយអនុវត្តតាមវិធានការរបស់អាជ្ញាធរខេត្ត ម្ចាស់ដីបានប្រើគ្រឿងចក្រដើម្បីកាយថ្មចេញពីទន្លេវិញ រហូតមកដល់ពេលនេះ បើពិនិត្យមើលតាមស្ថានភាពជាក់ស្ដែង ផ្នែកនៅលើផ្ទៃទឹកគឺបានយកចេញអស់ហើយ។ ទន្ទឹមនឹងនេះអ្វីដែលជាការងារបន្ត ពួកគាត់ត្រូវបំពេញទៅតាមការកំណត់របស់រដ្ឋបាលខេត្ត គឺត្រូវយកថ្មឱ្យអស់ទាំងផ្នែកខាងលើ និងផ្នែកខាងក្រោមទឹក។

លោក​អភិបាលខេត្ត បានបន្ថែមថា ចំពោះមុខ ម្ចាស់ដីបានកាយថ្មចេញសម្រេចបាន ៧០% ហើយពួកគាត់កំពុងបន្ត កាយយកថ្មចេញធ្វើយ៉ាងណាឱ្យអស់ពីទន្លេ ដើម្បីចៀសវាងការប៉ះពាល់ នៃការធ្វើដំណើររបស់នាវាចរណ៍ ក៏ដូចជាបងប្អូនប្រជាពលរដ្ឋ ធ្វើដំណើរឆ្លងកាត់ទីនេះ ជាពិសេសគឺអនុវត្តទៅតាមគោលការណ៍ណែនាំរបស់រដ្ឋបាលខេត្ត ដែលបានកំណត់ឱ្យពួកគាត់យកថ្មចេញឱ្យអស់ ធ្វើយ៉ាងណារក្សាស្ថានភាពដើម នៃទន្លេវិញ។

លោក​អភិបាលខេត្ត បានបញ្ជាក់ផងដែរថា ជាមួយនឹងការចុះពិនិត្យដោយផ្ទាល់នេះ លោកបានណែនាំដល់មន្ត្រី នៃមន្ទីរធនធានទឹក សហការការងារជាមួយនឹងក្រុមការងារប្រមូលថ្មចេញ ដោយត្រូវដាក់ពោងកំណត់ព្រំប្រទល់ និងការកំណត់ជម្រៅទឹក និងឈានដល់ការតាមដានអង្កេត និងការចូលរួមសហការពេលក្រុមជំនាញពាក់ព័ន្ធ មានទាំងខាងមន្ត្រីមន្ទីរធនធានទឹក និងមន្ត្រីមន្ទីរសាធារណការ ក៏ដូចជាមន្ទីរបរិស្ថានជាដើម ដើម្បីធ្វើកិច្ចការនេះឱ្យប្រាកដថា ថ្មត្រូវបានយកចេញអស់ពីទឹកទន្លេ។

លោក អ៊ុន ចាន់ដា យកឱកាសនេះ សូមបញ្ជាក់ជូនសាធារណៈជនដែលបានតែងតែគាំទ្រនូវចំណាត់ការរបស់រដ្ឋបាលខេត្តកំពង់ចាម និងបានផ្ដល់នូវយោបល់មករដ្ឋបាលខេត្ត នូវអ្វ្វីដែលបានឃើញនៅទីនេះ គឺអាជ្ញាធរខេត្តបានរួមគ្នាដោះស្រាយធ្វើយ៉ាងណាឱ្យភូមិ ឃុំ ស្រុក ខេត្ត ទទួលបាននូវការរស់នៅប្រកបដោយសុខដុមរមនា ដោយមានការចូលរួមពីភាគីពាក់ព័ន្ធទាំងអស់ ជាផ្នែកមួយដែលនាំមកនូវការអភិវឌ្ឍ និងការរីកចម្រើនដល់ប្រជាពលរដ្ឋ៕​

អត្ថបទ ​និង​រូបភាព​៖ ​ឡេក​ ចាន់ពេជ្រ​