ព័ត៌មានជាតិ

លោក នេត្រ ភក្ត្រា ៖ ការរួមគ្នាគ្រប់គ្រងសណ្ដាប់ធ្នាប់ នៃការផ្សាយពាណិជ្ជកម្មគ្រឿងស្រវឹង គឺដើម្បីជួយដល់សង្គម ក្រុមហ៊ុន និងប្រជាជន

បានផុស

២ សប្តាហ៍ មុន

នៅ

ថ្ងៃអង្គារ ៥ មីនា ២០២៤

ដោយ

លោក នេត្រ ភក្ត្រា រដ្ឋមន្ត្រីក្រសួងព័ត៌មាន គូសបញ្ជាក់ថា ការរួមគ្នាគ្រប់គ្រងសណ្ដាប់ធ្នាប់ នៃការផ្សព្វផ្សាយពាណិជ្ជកម្មគ្រឿងស្រវឹង គឺដើម្បីជួយទៅដល់សង្គម ក្រុមហ៊ុន និងប្រជាជនកម្ពុជា ដែលជាអ្នកប្រើប្រាស់ផលិតផល ជាពិសេសកាត់បន្ថយគ្រោះថ្នាក់ និងបង្កើននូវសុខដុមនីយកម្មក្នុងសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការគូសបញ្ជាក់នេះ ក្នុងឱកាស លោក នេត្រ ភក្ត្រា បានជួបប្រជុំជាមួយតំណាងក្រុមហ៊ុនផលិត និងលក់ផលិតផលគ្រឿងស្រវឹង និងក្រុមហ៊ុនផ្សព្វផ្សាយពាណិជ្ជកម្ម នៅទីស្ដីការក្រសួងព័ត៌មាន កាលពីរសៀលថ្ងៃទី ៤ ខែមីនា ឆ្នាំ ២០២៤ ម្សិលមិញ។

នាឱកាសនោះ លោក នេត្រ ភក្ត្រា បានមានប្រសាសន៍ថា ភាពជាដៃគូរវាង រដ្ឋ និងឯកជន ក្នុងការគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង គឺជាភាពចាំបាច់ ដើម្បីគ្រប់ភាគីចូលរួមគ្រប់គ្រងសណ្ដាប់ធ្នាប់ នៃការផ្សាយពាណិជ្ជកម្មផលិតផលគ្រឿងស្រវឹង។

នៅចំពោះមុខតំណាងក្រុមហ៊ុនស្រាបៀ និងក្រុមហ៊ុនផ្សព្វផ្សាយពាណិជ្ជកម្ម លោករដ្ឋមន្ត្រីក្រសួងព័ត៌មាន បានគូសបញ្ជាក់ថា «ការរួមគ្នាគ្រប់គ្រងសណ្ដាប់ធ្នាប់ នៃការផ្សព្វផ្សាយពាណិជ្ជកម្មគ្រឿងស្រវឹង គឺ ដើម្បីជួយទៅដល់សង្គម ជួយទៅដល់ក្រុមហ៊ុន ជួយទៅដល់ប្រជាជនកម្ពុជា ដែលជាអ្នកប្រើប្រាស់ផលិតផល,កាត់បន្ថយគ្រោះថ្នាក់ និងបង្កើននូវសុខដុមនីយកម្មក្នុងសង្គម»។ បន្ថែមនោះ លោក ក៏ស្នើអនុវត្តនូវលិខិតបទដ្ឋាន និងច្បាប់ពាក់ព័ន្ធ ដែលមានជាធរមានឲ្យបានល្អផងដែរ។

ទន្ទឹមនោះដែរ លោក នេត្រ ភក្ត្រា ក៏បានបន្ថែមទៀតថា កន្លងទៅនេះ ដើម្បីគ្រប់គ្រងសណ្ដាប់ធ្នាប់ក្នុងការផ្សព្វផ្សាយពាណិជ្ជកម្មផលិតផលគ្រឿងស្រវឹង ក្រសួងព័ត៌មាន បានពង្រឹងឡើងវិញលើវិធានការ នៃការគ្រប់គ្រងការផ្សាយពាណិជ្ជកម្មគ្រឿងស្រវឹង ដើម្បីកុំឲ្យលេចចេញរូបភាពហួសហេតុដែលប៉ះពាល់ដល់តម្លៃ និងសីលធម៌សង្គម ដោយបានណែនាំ ៖ ១-សូមបញ្ឈប់ការប្រើប្រាស់រូបភាព នៃការហៅមនុស្សឡើងលើឆាកតន្ត្រី និងសង្វៀនប្រដាល់ ដើម្បីពិសាស្រាបៀ ហើយផ្សព្វផ្សាយ, ២-ពិធីករ ពិធីការិនី ដែលជាមនុស្សមានឥទ្ធិពលលើបណ្ដាញផ្សព្វផ្សាយ កុំប្រើប្រាស់រូបភាពគាស់កំប៉ុងស្រាបៀពិសា និងផ្សាយផ្ទាល់លើកញ្ចក់ទូរទស្សន៍ និងបណ្ដាញទំនាក់ទំនងសង្គម, ៣-ការផ្សព្វផ្សាយពីពាណិជ្ជកម្មស្រាបៀ ចាំបាច់ត្រូវភ្ជាប់នឹងសារអប់រំសុខភាព «ពិសាគ្រឿងស្រវឹង សូមកុំបើកបរ, ពិសាគ្រឿងស្រវឹងដោយការទទួលខុសត្រូវ» ដើម្បីធ្វើតុល្យភាព នៃស្រាបៀ ការផ្សាយពាណិជ្ជកម្ម និងសារអប់រំ។

ជាមួយនោះ បើតាមការបញ្ជាក់របស់ លោក នេត្រ ភក្ត្រា គឺ ក្រុមការងារបច្ចេកទេសចម្រុះរវាងស្ថាប័នរដ្ឋ និងឯកជន នឹងត្រូវបង្កើតឡើង ដើម្បីមានភាពងាយស្រួលក្នុងការពិភាក្សា និងដាក់ចុះនូវដំណោះស្រាយនានា សំដៅលើការគ្រប់គ្រងបច្ចេកទេសក្នុងការផលិតស្ពតពាណិជ្ជកម្ម និងការផ្សព្វផ្សាយពាណិជ្ជកម្មនានា ដែលគោរពបាននូវក្រមសីលធម៌ និងអនុលោមតាមច្បាប់។ ក្នុងនោះ តំណាងក្រុមហ៊ុនផលិត និងលក់ផលិតផលគ្រឿងស្រវឹង និងក្រុមហ៊ុនផ្សព្វផ្សាយពាណិជ្ជកម្ម ដែលបានចូលរួមប្រជុំ ក៏បានបង្ហាញនូវការគាំទ្រចំពោះវិធានការ និងការសម្រេចនានា ដែលបានផ្ដួចផ្ដើម និងដាក់ចុះអនុវត្ត ដើម្បីចូលរួមគ្រប់គ្រងសណ្ដាប់ធ្នាប់ នៃការផ្សព្វផ្សាយពាណិជ្ជកម្មផលិតផលគ្រឿងស្រវឹងដែរ៕

អត្ថបទ ៖ ពិសី