ព័ត៌មានជាតិ
ចរាចរប្រាក់រៀលកើនឡើង ១៥ ភាគរយ ក្នុងមួយឆ្នាំ នាអំឡុង២ទសវត្សរ៍ចុងក្រោយ
លោកស្រី ជា សិរី អគ្គទេសាភិបាល ធនាគារជាតិនៃកម្ពុជា បានឱ្យដឹងថា ទំហំចរាចរប្រាក់រៀលបានកើនឡើងជាមធ្យម ១៥ ភាគរយ ក្នុងមួយឆ្នាំ នាអំឡុង ២ ទសវត្សរ៍ចុងក្រោយ ខណៈឥណទាន និងប្រាក់បញ្ញើក្នុងប្រព័ន្ធធនាគារជារៀលក៏បានកើនឡើងលឿន ក្នុងអត្រា ៣៥ និង ៣០ ភាគរយ។
![](https://www.kampucheathmey.com/wp-content/uploads/2024/03/photo_2024-03-20_11-07-34-768x1024.jpg)
លោកស្រី ជា សិរី លើកឡើងក្នុងពិធី សិក្ខាសាលាស្តីពីខួបលើកទី៤៤ នៃការដាក់ឲ្យចរាចរប្រាក់រៀលឡើងវិញនៅថ្ងៃទី ២០ ខែមីនា ឆ្នាំ ២០២៤។
លោកស្រី ជា សិរីបានបញ្ជាក់ថា កិច្ចខិតខំប្រឹងប្រែងរបស់ធនាគារជាតិ បានត្រឹមតែទប់ស្កាត់ដុល្លាររូបនីយកម្មមិនឱ្យកើនឡើងបន្តទៀត ប៉ុន្តែមិនទាន់អាចបន្ថយកម្រិតដុល្លាររូបនីយកម្មបាននៅឡើយនោះទេ។
![](https://www.kampucheathmey.com/wp-content/uploads/2024/03/Screenshot-3-1024x576.png)
លោកស្រីបានបន្តថា មេរៀនប្រវត្តិសាស្ត្របានបង្ហាញថា ការបាត់ទំនុកចិត្តលើប្រាក់រៀលអាចកើតមានឡើងក្នុងរយៈពេលដ៍ខ្លី តែការស្ដារទំនុកចិត្តឡើងវិញគឺជាការលំបាក ហើយទាមទារពេលវេលា និងការចូលរួមយ៉ាងសកម្ម របស់ក្រសួងស្ថាប័នសាធារណៈ ក្រសួង សហគ្រាស ក្រុមហ៊ុនសហគ្រាស ប្រជាជនទូទៅ និងភាគីពាក់ព័ន្ធទាំងអស់។
ម្យ៉ាងទៀត ឆ្លងកាត់ការជួបប្រទះនឹងវិបត្តិសេដ្ឋកិច្ចកន្លងមក បានបង្ហាញថា កម្ពុជាត្រូវការពង្រឹងការប្រើប្រាស់ប្រាក់រៀលដែលអាចរួមចំណែកជួយការពារ និងស្ដារសេដ្ឋកិច្ចពីវិបត្តិដោយហេតុថា ការប្រើប្រាស់ប្រាក់រៀលទូលំទូលាយនឹងជួយឱ្យកម្ពុជាមានអធិបតេយ្យ និងឯករាជ្យក្នុងការអនុវត្តនយោបាយម៉ាក្រូសេដ្ឋកិច្ចជាពិសេសនយោបាយរូបិយវត្ថុ ដែលអាចជួយដល់ការជំរុញការវិនិយោគ និងការប្រើប្រាស់ក្នុងស្រុកតាមរយៈការជួយបន្ថយ ឬបង្កើនអត្រាការប្រាក់នៅលើទីផ្សារ និងការបញ្ចេញសន្ទនាភាពទៅក្នុងសេដ្ឋកិច្ច។
![](https://www.kampucheathmey.com/wp-content/uploads/2024/03/18-20-new-kpt-3-1024x614.jpg)
បើតាមលោកស្រី ជា សិរី ប្រទេសមួយចំនួនធំបានអនុវត្តក្នុងវិបត្តិហិរញ្ញវត្ថុសកល និងវិបត្តិកូវីដ១៩ ធនាគារកណ្ដាលបានបន្ទាបអត្រាការប្រាក់គោល ដើម្បីបន្ថយអត្រាការប្រាក់នៅលើទីផ្សារ និងចាក់បញ្ចូលសាច់ប្រាក់បន្ថែមដល់សេដ្ឋកិច្ច ក្នុងគោលដៅជំរុញសកម្មភាពសេដ្ឋកិច្ច ហើយការធ្វើដូច្នេះបានទាល់តែធនាគារកណ្ដាលអាចគ្រប់គ្រងការប្រើប្រាស់នយោបាយរូបិយវត្ថុប្រកបដោយប្រសិទ្ធភាព គឺនៅពេលដែលរូបិយវត្ថុជាតិត្រូវបានប្រើប្រាស់យ៉ាងទូលំទូលាយ។
លោកស្រី ជា សិរី បញ្ជាក់ថា ធនាគារជាតិនៃកម្ពុជាបានខិតខំសម្រួលការប្រើប្រាស់ប្រាក់រៀលឱ្យមានភាពងាយស្រួលជាបន្តបន្ទាប់ ក្នុងចំណោមវិធានការនានា ប្រព័ន្ធទូទាត់អេឡិចត្រូកនិក ជាពិសេសប្រព័ន្ធបាគង បានរួមចំណែកយ៉ាងសំខាន់ដល់ការទូទាត់ប្រាក់រៀលឱ្យកាន់តែមានភាពទាន់សម័យ ឆាប់រហ័ស និងចំណាយតិច។
ក្នុងឆ្នាំ ២០២៣ ប្រតិបត្តិការទូទាត់ប្រាក់រៀលតាមប្រព័ន្ធអេឡិចត្រូនិកបានកើនឡើង ៤៤ ភាគរយ ធៀបនឹងឆ្នាំ ២០២២ និងខ្ពស់ជាកំណើននៃប្រតិបត្តិការទូទាត់តាមប្រព័ន្ធអេឡិកត្រូនិក ដែលកើនឡើង ៣,១ ភាគរយ។
ក្រៅពីនេះ ធនាគារជាតិនៃកម្ពុជាក៏បានជំរុញការតភ្ជាប់ប្រព័ន្ធទូទាត់ជាមួយប្រទេសជិតខាង និងក្នុងតំបន់ ដើម្បីឱ្យប្រជាពលរដ្ឋកម្ពុជាដែលមានគណនីប្រាក់រៀល អាចទូទាត់តាមប្រព័ន្ធ QR Code បានងាយស្រួលក្នុងប្រទេសទាំងនោះ ហើយទេសចរបរទេសក៏អាចទូទាត់តាម QR Code តាមហាងទំនិញនានានៅកម្ពុជា ដែលហាងទាំងនោះនឹងទទួលបានការទូទាត់ជាប្រាក់រៀល។
បច្ចុប្បន្ន កម្ពុជាបានតភ្ជាប់ប្រព័ន្ធទូទាត់ជាមួយប្រទេសថៃ វៀតណាម និងឡាវ ព្រមទាំងក្រុមហ៊ុនផ្ដល់សេវាទូទាត់អន្តរជាតិមួយចំនួនជាមួយនឹងផែនការតភ្ជាប់ក្នុងប្រទេសផ្សេងទៀតក្នុងតំបន់រួមមានចិន ឥណ្ឌាជាដើម។
ធនាគារជាតិនៃកម្ពុជាបានជំរុញការប្រើប្រាស់ប្រាក់រៀលនៅក្នុងប្រព័ន្ធធនាគារតាមរយៈការដាក់ចេញបទបញ្ញត្តិដែលមានលក្ខណៈអំណោយផលដល់ការប្រើប្រាស់ប្រាក់រៀលរួមមាន៖ ការយកកម្រៃសេវាលើប្រតិបត្តិការជាប្រាក់រៀលទាបជាងរូបិយបណ្ណបរទេស, ការតម្រូវឱ្យគ្រឹះស្ថានធនាគារ និងហិរញ្ញវត្ថុ មានឥទានជាប្រាក់រៀលយ៉ាងតិច ១០ ភាគរយ នៃឥណទានសរុប និងវិធានការមួយចំនួនទៀត ដូចជាការបញ្ចេញសន្ទនាភាពជាប្រាក់រៀលតាមរយៈប្រតិបត្តិការផ្ដល់សន្ទនាភាពដែលមានការធានា និងការសម្រួលដល់ការគ្រប់គ្រងសន្ទនាភាពជាប្រាក់រៀលក្នុងប្រព័ន្ធធនាគារ ដែលទាំងអស់នេះនឹងជួយកាត់បន្ថយថ្លៃដើម និងសម្រួលដល់ប្រតិបត្តិការប្រាក់រៀលដល់គ្រឹះស្ថានធនាគារ និងហិរញ្ញវត្ថុ។
យោងតាមរបាយការណ៍វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០២៣ និងទស្សនវិស័យឆ្នាំ ២០២៤ បង្ហាញថា នៅក្នុងឆ្នាំ ២០២៣ ធនាគារជាតិនៃកម្ពុជា បានធ្វើអន្តរាគមន៍ទិញប្រាក់រៀលនៅលើទីផ្សារប្តូរប្រាក់ប្រមាណ ៥៧៣ប៊ីលានរៀល (១៣៩,១លានដុល្លារអាមេរិក) និងប្រើប្រាស់ឧបករណ៍នយោបាយរូបិយវត្ថុផ្សេងៗ ដើម្បីស្រូបយកប្រាក់រៀលលើសប្រមាណ ១៥,២ទ្រីលានរៀល (៣,៧ប៊ីលានដុល្លារអាមេរិក) ពីក្នុងសេដ្ឋកិច្ច និងរក្សាការផ្គត់ផ្គង់រូបិយវត្ថុក្នុងកម្រិតសមស្រប៕
-
សេដ្ឋកិច្ច៥ ថ្ងៃ ago
ការវិនិយោគរបស់ក្រុមហ៊ុនជប៉ុន កំពុងជួយរុញឱ្យកំណើនសេដ្ឋកិច្ចកម្ពុជាកាន់តែងើបឡើងបន្ថែមទៀត
-
KPT+៦ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ៣ ថ្ងៃ ago
អ្នកនាំពាក្យទទូចដល់អ្នកប្រើបណ្តាញសង្គមបញ្ឈប់ចែកចាយជាបន្ទាន់ និងលុបចេញរាល់មាតិកាដែលពាក់ព័ន្ធឃាតកម្មឃោរឃៅ
-
ព័ត៌មានជាតិ៥ ថ្ងៃ ago
ក.ប.ប រកឃើញថាឈ្មួញនាំចូលផ្លែទុរេនពីប្រទេសជិតខាង និងមានជ្រលក់ថ្នាំ ហើយលក់បន្លំថាជាទុរេនក្នុងស្រុក
-
ព័ត៌មានជាតិ១ សប្តាហ៍ ago
ព្រះភិក្ខុ អុឹង ប៊ុនហ៊ូវ ប្រគេនដី២០០ហិកតាក្នុងខេត្តកំពង់ឆ្នាំង ដើម្បីសង់ពុទ្ធិកសាកលវិទ្យាល័យព្រះសីហនុរាជ
-
ព័ត៌មានជាតិ២ ថ្ងៃ ago
លោក ជួន ណារិន្ទ បញ្ជាឱ្យហៅគ្រូមន្តអាគមយកកាំភ្លើងពោះខ្លួនឯងមកសួរនាំ ទោះសាមីខ្លួនសុំទោសជាសាធារណៈ
-
ព័ត៌មានជាតិ៧ ថ្ងៃ ago
តើឧកញ៉ាមានសិទ្ធិកាន់កាប់ និងប្រើប្រាស់កាំភ្លើង ដែរឬទេ?
-
ព័ត៌មានជាតិ៤ ថ្ងៃ ago
បុរសម្នាក់ ត្រូវសត្វថ្លែនខាំបណ្តាលឱ្យស្លាប់ ក្រោយបញ្ជូនទៅសង្គ្រោះនៅមណ្ឌលសុខភាព