រដ្ឋបាលខេត្តព្រះវិហារ បដិសេធការផ្សាយថា ពលរដ្ឋរត់ទៅពួនក្នុងព្រៃដើម្បីគេចពីការចាប់ខ្លួនពីអាជ្ញាធរខេត្ត

រដ្ឋបាលខេត្តព្រះវិហារ បានបដិសេធចំពោះការផ្សាយថា ពលរដ្ឋរត់ទៅសម្ងំពួនក្នុងព្រៃដើម្បីគេចចេញពីការចាប់ខ្លួនពីសំណាក់អាជ្ញាធរខេត្តព្រះវិហារ។

ការចេញមកបដិសេធនេះធ្វើឡើង បន្ទាប់ពីរដ្ឋបាលខេត្ត បានមើលឃើញថា នាប៉ុន្មានថ្ងៃនេះ មានអង្គការក្រៅរដ្ឋាភិបាលមួយ បានផ្សព្វផ្សាយព័ត៌មានអំពីកិច្ចសម្ភាសន៍ជាមួយក្រុមប្រជាពលរដ្ឋ ដែលអះអាងកំពុងតែរត់ភាសខ្លួនទៅសម្ងំពួនក្នុងព្រៃគេចចេញពីការធ្វើទុក្ខបុកម្នេញ និងការចាប់ខ្លួនពីសំណាក់អាជ្ញាធរខេត្តព្រះវិហារ។

ជុំវិញការផ្សាយបែបនេះ រដ្ឋបាលខេត្តព្រះវិហារ តាមរយៈសេចក្តីប្រកាសព័ត៌មាន នាថ្ងៃទី២២​ ខែមីនា ឆ្នាំ២០២៤ បានបញ្ជាក់ដូច្នេះថា «សូមអំពាវនាវបងប្អូនប្រជាពលរដ្ឋ កុំចាញ់បោកឧបាយកលក្រុមជនមួយក្តាប់តូចដែលជ្រកក្រោមស្លាកអង្គការក្រៅរដ្ឋាភិបាលមួយនេះ ដែលមានគំនិតទុច្ចរិត យកបងប្អូន ដើម្បីកេងចំណេញនយោបាយ។ ប្រសិនជាអង្គការក្រៅរដ្ឋាភិបាលមួយនេះ មានចេតនាសុច្ចរិត សូមសហការផ្តល់ព័ត៌មានអំពីទីតាំងរបស់បងប្អូនប្រជាពលរដ្ឋ ដើម្បីអាជ្ញាធរខេត្តទទួលបងប្អូនប្រជាពលរដ្ឋឱ្យត្រឡប់មកផ្ទះសម្បែងវិញ ប្រកបដោយការទទួលខុសត្រូវ និងមនុស្សធម៌»។

ជាមួយគ្នានេះ រដ្ឋបាលខេត្តព្រះវិហារ ក៏បានលើកទឹកចិត្តឱ្យទំនាក់ទំនងសហការជាមួយអាជ្ញាធរខេត្តដោយផ្ទាល់ តាម រយៈលោក ណុប វុទ្ធី អភិបាលរងខេត្ត តាមទូរស័ព្ទលេខ ០១៧ ៧០១ ០០៧៕