តើគួរធ្វើបែបណា ដើម្បីសន្សំសំចៃថាមពលអគ្គិសនី?

អាកាសធាតុក្តៅ ការប្រើប្រាស់ថាមពលអគ្គិសនីមានការកើនឡើង ជាហេតុបណ្តាលឱ្យអគ្គិសនី មានតម្រូវការច្រើន ដូច្នេះត្រូវប្រើប្រាស់សន្សំសំចៃ ដើម្បីទប់ស្កាត់កង្វះខាតអគ្គិសនីប្រើប្រាស់ និងកាត់បន្ថយការចំណាយ។ តើគួរធ្វើបែបណា ដើម្បីសន្សំសំចៃថាមពលអគ្គិសនី?

ដើម្បីកាត់បន្ថយការចំណាយ និងចូលរួមសន្សំសំចៃការប្រើប្រាស់ថាមពលអគ្គិសនី អង្គការយូនីសេហ្វ បានប្រាប់ពីគន្លឹះមួយដូចខាងក្រោម៖

១.បិទព្រីភ្លើង នៅពេលមិនប្រើប្រាស់

លោកអ្នកអាចសន្សំសំចៃចាមពលអគ្គិសនី និងថវិកានៅពេលអ្នកបិទព្រីភ្លើង នៅពេលមិនប្រើប្រាស់។ ថាមពលខ្មោច (Vampire Power) គឺជាថាមពលអគ្គិសនី ដែលទាញចេញពីព្រីភ្លើងនៅពេលដែលឧបករណ៍បិទ ឬបើកមុខងារ Sleep ប៉ុន្តែនៅតែដោតជាប់នឹងប្រភពថាមពល។ គ្រឿងអេឡិចត្រូនិច និងឧបករណ៍ការិយាល័យជាច្រើនប្រភេទ រួមទាំងកុំព្យូទ័រ ម៉ាស៊ីនព្រីន និងឆ្នាំងសាកទូរស័ព្ទ នៅតែបន្តទាញចរន្តអគ្គិសនី ទោះបីជាវានៅក្នុង Sleep mode ឬមិនប្រើប្រាស់វាក៏ដោយ។

ថាមពលខ្មោច អាចស៊ីថាមពលដល់ទៅ ១៥% នៃថាមពលអគ្គិសនី ដែលប្រើប្រាស់ដោយឧបករណ៍ទាំងនោះ។ សូមដកគ្រឿងអេឡិចត្រូនិច ឬឆ្នាំងសាកចេញពីប្រភពថាមពលនៅពេលមិនប្រើប្រាស់។

២.ប្រើ Laptop ច្រើនជាង Desktop

Laptop ប្រើប្រាស់ថាមពលអគ្គិសនីជាមធ្យមពី ២០ ទៅ ៧០ វ៉ាត់ដើម្បីដំណើរការ ចំណែក Desktop ប្រើថាមពលជាមធ្យមពី ៧០ ទៅ ២០០ វ៉ាត់ ឬលើសពីនេះ។ នេះគឺដោយសារតែ Laptop ប្រើថាមពលថ្ម ហើយ Desktop ត្រូវដោតជាប់នឹងប្រភពថាមពលជានិច្ច។ សូមដកឆ្នាំងសាកចេញពីប្រភពថាមពល នៅពេលដែលថ្ម Laptop ត្រូវបានសាកពេញ។ វាមិនត្រឹមតែជួយកាត់បន្ថយការប្រើប្រាស់ថាមពលប៉ុណ្ណោះទេ ប៉ុន្តែវាក៏ជួយធ្វើឱ្យអាយុកាលថ្ម Laptop របស់អ្នកប្រើប្រាស់បានយូរផងដែរ។

៣.ហាលសម្លៀកបំពាក់ ជាជាងប្រើម៉ាស៊ីនសម្ងួត

ម៉ាស៊ីនសម្ងួតសម្លៀកបំពាក់ ជាទូទៅប្រើប្រាស់ថាមពលអគ្គិសនីក្នុងមួយឆ្នាំ ស្មើនឹងថាមពលទូទឹកកក ម៉ាស៊ីនបោកខោអាវ និងម៉ាស៊ីនលាងចានរួមបញ្ចូលគ្នា។ ការហាល សម្លៀកបំពាក់ជួយកំចាត់ក្លិន សន្សំថវិកា និងថាមពលអគ្គិសនី។

៤.ពិចារណាប្តូរទៅប្រើប្រាស់ថាមពលកកើតឡើងវិញ និងឧបករណ៍សន្សំសំចៃថាមពល

ការប្រើប្រាស់ថាមពលកកើតឡើងវិញ ដូចជាពន្លឺព្រះអាទិត្យ និងផ្លាស់ប្តូរឧបរណ៍ចាស់ៗទៅប្រើឧបរណ៍សន្សំសំចៃថាមពល អាចជួយកាត់បន្ថយបន្ទុក និងតម្រូវការកើនឡើងនៃការ ប្រើប្រាស់ថាមពលអគ្គិសនី។

៥.ប្រើប្រាស់ ឬប្តូរទៅអំពូល LED

អំពូល LED មានរយៈពេលប្រើប្រាស់បានយូរ ស៊ីថាមពលតិច និងសន្សំសំចៃ។ សូមទុកដាក់ អំពូលចាស់ៗឱ្យបានត្រឹមត្រូវ៕