អាជ្ញាធរអគ្គិសនីឱ្យបញ្ឈប់ចេញវិក្កយបត្រថ្លៃភ្លើងជាលុយបាត

អាជ្ញាធរអគ្គិសនីនៅថ្ងៃទី ០១ ខែក្កដា ឆ្នាំ ២០២៥ បានស្នើឱ្យលោកអ្នកឧកញ៉ា អគ្គនាយក​ក្រុមហ៊ុន អិល វ៉ាយ ភី គ្រុប និងអ្នកឧកញ៉ា អគ្គនាយកក្រុមហ៊ុន អានកូ បញ្ឈប់​ការចេញវិក្ក​យបត្រថ្លៃអគ្គិសនី និងសេវាផ្សេងៗ ជាប្រាក់បាត ខណៈរាជរដ្ឋាភិបាលកម្ពុជា បានបញ្ចប់ការ​ទិញអគ្គិសនីពីប្រទេសថៃទាំងស្រុង។

សំណើរបស់អាជ្ញាធរអគ្គិសនីបញ្ជាក់ថា៖ «ពេលនេះ រាជរដ្ឋាភិបាលកម្ពុជា បានបញ្ចប់ការទិញ​អគ្គិសនីទាំងស្រុងពីប្រទេស​ថៃ មកផ្គត់ផ្គង់ឱ្យតំបន់ទាំងអស់នៅតាមបណ្ដោយព្រំដែនកម្ពុជា-ថៃ។ ដូច្នេះ អាជ្ញាធរអគ្គិសនីកម្ពុជាស្នើសុំបញ្ឈប់​ការចេញវិក្ក​យបត្រថ្លៃអគ្គិសនី និងសេវា​ផ្សេងៗ​​ជាប្រាក់បាត នៅតំបន់ផ្គត់ផ្គង់អគ្គិសនីក្រុមហ៊ុន អិល វ៉ាយ ភី នៅខេត្តកោះកុង និងតំបន់​អូរស្មាច់ ស្រុកសំរោង ខេត្តឧត្តរមានជ័យ និងនៅតំបន់ផ្គត់ផ្គង់អគ្គិសនីរបស់ក្រុមហ៊ុន​អានកូ តំបន់ប៉ោយប៉ែត ខេត្តបន្ទាយមានជ័យ»។

លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានថ្លែងថា៖ «ថ្មីៗនេះ មានការលើក​ឡើងដោយ​យោធាថៃថា កម្ពុជានៅទិញភ្លើងតាមច្រកព្រំដែនចូលកម្ពុជា ៦ ច្រក ដែល​​ជា​រឿងមិនពិត កម្ពុជាមានអគ្គិសនីគ្រប់គ្រាន់សម្រាប់ផ្គត់ផ្គង់ទូទាំងប្រទេស មកទល់ម៉ោងនេះ ក៏ដូចជាប្រកាសលើកមុន កម្ពុជាបានប្រើប្រាស់អគ្គិសនីដោយខ្លួនឯង ហើយពុំមានការទិញ​ភ្លើង​ពី​ថៃនោះទេ គិតទាំងការភ្ជាប់តង់ស្យុងខ្ពស់ និងតត់ស្យុងមធ្យម»៕