រដ្ឋបាលរាជធានីរៀបចំឱ្យមន្ត្រីលេងល្បែងប្រជាប្រិយ ពិសារអាហារសាមគ្គី រាំលេងកម្សាន្ត និងការចាប់រង្វាន់ក្នុងឱកាសចូលឆ្នាំថ្មី

រដ្ឋបាលរាជធានីភ្នំពេញ ដឹកនាំដោយលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកជំទាវ ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំរោង ឆស័កព.ស ២៥៦៨ គ្រឹស្ត សករាជ ២០២៤នេះបានបង្កើត​នូវ​កម្មវិធី​សប្បាយៗមួយជាមួយមន្ត្រីរាជការដែលបម្រើការងារនៅក្នុងសាលារាជធានីភ្នំពេញ ដោយបានរៀបចំលេងល្បែងប្រជា​ប្រិយខ្មែរ យ៉ាងសប្បាយរីករាយ នៅក្នុងបរិវេណសាលារាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរៀបចំលេងល្បែងប្រជាប្រិយខ្មែរនេះបានធ្វើឡើងចាប់រសៀលថ្ងៃទី១១ មេរហូតដល់ប្រលប់ ដែលដូចជាលាក់កន្សែង ដណ្តើមស្លឹកឈើ រាំដណ្តើមកៅអីជាដើម បន្ទាប់មកមានកម្មវិធីពិធីពិសារអាហារសាមគ្គី រាំលេងកម្សាន្ត ជាមួយនិងការចាប់រង្វាន់ផងដែរ។

ក្នុងឱកាសបុណ្យចូលឆ្នាំថ្មីប្រពៃពីជាតិ ឆ្នាំ២០២៤នេះដែរ កាលពីព្រឹកថ្ងៃដដែល រដ្ឋបាលរាជធានីភ្នំពេញ ក៏បានរៀបចំពិធីសូត្រមន្តរាប់បាត្រព្រះសង្ឃចំនួន៦៨អង្គផងដែរ ក្នុងន័យចូលរួមអបអរសាទរទេវតាឆ្នាំថ្មី ព្រះនាម មហោធរទេវីជាបុត្រីទី៧របស់ កបិលមហាព្រហ្មដែលនឹងចុះមកគ្រប់គ្រងភពផែនដីជំនួសទេវតាឆ្នាំចាស់ នាវេលាម៉ោង២២ និង២៤នាទីថ្ងៃទី១៣មេសាឆ្នាំ២០២៤ ដោយមានការអញ្ជើញចូលរួមជាអធិបតីពីលោក ម៉ប់ សារិន ប្រធានក្រុមប្រឹក្សារាជធានីភ្នំពេញ, លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកជំទាវ។

គួរបញ្ជាក់ផងដែរថា៖ ឆ្នាំ២០២៤នេះ សង្ក្រាន្ដវត្តភ្នំធ្វើឡើងនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ មានរយៈពេល​៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ វេលាម៉ោង ៨:០០ព្រឹក ដល់ម៉ោង ២០:០០ យប់ និងតាមថ្ងៃនីមួយៗ។

ក្នុងពិធីសង្ក្រាន្តនេះ រដ្ឋបាលរាជធានីភ្នំពេញ ក៏នឹងរៀបចំកម្មវិធីបែបប្រពៃណីជាតិ និងកម្សាន្តសប្បាយជាច្រើនដូចជា កម្មវិធីទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងសិល្បៈ របាំប្រពៃណី របាំបុរាណ ល្បែងប្រជាប្រិយជាតិ (ទាញព្រ័ត បោះអង្គញ់ វាយក្អម ចោលឈូង លាក់កន្សែង ចាប់កូនខ្លែង និងដណ្តើមស្លឹកឈើ) ប្រគំតន្ត្រីបុរាណ-សម័យ រាំលេងកម្សាន្ត តាំងបង្ហាញគំនូរបុរាណ និងវត្ថុសិល្បៈវប្បធម៌ផងដែរ៕

អត្ថបទ៖ ស្រីរ័ត្ន