មន្ទីរបរិស្ថានខេត្តសៀមរាប ចែកកូនឈើចម្រុះជាង ១៦ម៉ឺនដើមជូនពលរដ្ឋ

មន្ទីរបរិស្ថានខេត្តសៀមរាប បានបណ្តុះកូនឈើចម្រុះជាង១៦ម៉ឺនដើម សម្រាប់ទុកចែកជូនប្រជាពលរដ្ឋយកទៅដាំដោយឥតគិតថ្លៃ ស្របតាមការជំរុញការដាំដើមឈើឱ្យបាន១លានដើម ក្នុងមួយឆ្នាំ តាមផែនការគ្រោងទុករបស់រដ្ឋមន្ត្រីក្រសួងបរិស្ថាន។

លោក ស៊ុន គង់ ប្រធានមន្ទីរបរិស្ថានខេត្តសៀមរាប បានឱ្យដឹងថា គិតមកដល់ពេលនេះ កូនឈើចម្រុះដែលត្រូវបានបណ្តុះឡើងមានសរុប១៦៥.០០០ដើម សម្រាប់ចែកជូនដល់ប្រជាពលរដ្ឋ វិស័យឯកជន ដោយមិនគិតថ្លៃសម្រាប់យកទៅដាំនៅក្នុងមូលដ្ឋានរៀងៗខ្លួន។

លោក គង់ វ៉ារ៉ុង ប្រធានការិយាល័យឧទ្យានជាតិព្រះជ័យវរ្ម័ន-នរោត្តម ភ្នំគូលែន ក៏បានបញ្ជាក់ថា ថ្នាលបណ្តុះកូនឈើនៅឧទ្យានជាតិព្រះជ័យវរ្ម័ន-នរោត្តមភ្នំគូលែន អាចបណ្តុះកូនឈើបាន៥ម៉ឺនដើម ក្នុងមួយឆ្នាំ គ្រាដែលថ្នាលទាំងមូល មានលទ្ធភាពបណ្តុះកូនឈើបានរហូតដល់ទៅ៧ម៉ឺនដើម ក្នុងមួយឆ្នាំ។

លោកថ្លែងថា៖ «ការបណ្តុះកូនឈើលើសពីផែនការនេះ ដោយសារការពង្រីកបន្ថែម ខណៈបច្ចុប្បន្នបានចែកកូនឈើជូនប្រជាពលរដ្ឋ ក៏ដូចជាសាលារៀន វត្តអារាម មន្ទីរពេទ្យ និងសហគមន៍បានជាច្រើន»។

ផែនការដាំដើមឈើចំនួន១លានដើម ត្រូវបានរដ្ឋមន្ត្រីក្រសួងបរិស្ថាន ដាក់ចេញឡើង ក្នុងគោលបំណងជំរុញភាពបៃតងរបស់កម្ពុជា តាមរយៈដាំស្តារព្រៃ ដាំនៅតាមគេហដ្ឋាន និងតាមមូលដ្ឋាន ទីសាធារណៈ នៅដើមរដូវវស្សា ឆ្នាំ២០២៤​តទៅ។

យ៉ាងណាមិញ លោក ជួប ប៉ារីស៍ រដ្ឋលេខាធិការក្រសួងបរិស្ថាន ក៏បានមានប្រសាសន៍ថា យុទ្ធនាការដាំដើមឈើនេះ គឺអនុលោមជាមួយនឹងយុទ្ធសាស្ត្រចក្រាវិស័យបរិស្ថានឆ្នាំ២០២៣-២០២៨ របស់ក្រសួងបរិស្ថាន និងគោលដៅយុទ្ធសាស្ត្រ​ទី៥ នៃយុទ្ធសាស្ត្រ បញ្ចកោណដំណាក់កាលទី១ ដែលកំពុងប្រែក្លាយសង្គមកម្ពុជាទៅ ជាប្រទេសអព្យាក្រឹតកាបូន ដែលមានគម្របព្រៃឈើ៦០ភាគរយ នៅឆ្នាំ២០៥០៕