លោក សៅ សុខា ណែនាំមេកងរាជអាវុធហត្ថថ្មីខេត្តរតនគិរី យកចិត្តទុកដាក់លើភារកិច្ចស្នូលចំនួន៣

នៅព្រឹកថ្ងៃទី២៤ ខែមេសា ឆ្នាំ២០២៤នេះ លោកនាយឧត្តមសេនីយ៍ សៅ សុខា បានអញ្ជើញប្រកាសចូលកាន់តំណែងជាផ្លូវការរបស់មេបញ្ជាការកងរាជអាវុធហត្ថខេត្តរតនគិរី។ ក្នុងពិធីនេះ នាយឧត្តមសេនីយ៍ សៅ សុខា បានណែនាំឱ្យមេបញ្ជាការកងរាជអាវុធហត្ថថ្មីខេត្តរតនគិរី យកចិត្តទុកដាក់លើភារកិច្ចស្នូលចំនួន៣។

តាមអនុក្រឹត្យរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា គឺបានសម្រេចតែងតាំងលោកឧត្តមសេនីយ៍ត្រី សោ សាវឿន អតីតមេបញ្ជាការកងរាជអាវុធហត្ថខេត្តកំពង់ចាម ឱ្យមកកាន់តំណែងជាមេបញ្ជាការកងរាជអាវុធហត្ថខេត្តរតនគិរី ជំនួសលោកឧត្តមសេនីយ៍ត្រី ថាវ យ៉េន ដែលត្រូវទទួលភារកិច្ចថ្មី។

ថ្លែងក្នុងពិធីប្រកាសមុខតំណែង នាព្រឹកថ្ងៃនេះ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស បានលើកឡើងថា ការតែងតាំង​ ដំឡើង ផ្លាស់ប្តូរមុខតំណែង កន្លែងធ្វើការនៅក្នុងជួរកងកម្លាំងប្រដាប់អាវុធ មន្ត្រីរាជការស៊ីវិល ក៏ដូចជាវិស័យឯកជននោះ គឺជាក្រឹត្យក្រមនៃការងារចាត់តាំង រៀបចំធនធានមនុស្ស ដើម្បីភាពរីកចម្រើនការងារ និងក៏ជាឱកាសនៃការផ្លាស់ប្តូរបរិយាកាសទីកន្លែងធ្វើការងារ។

នាយឧត្តមសេនីយ៍ សៅ សុខា បញ្ជាក់ថា សម្រាប់ការតែងតាំង​ផ្លាស់ប្ដូរមុខតំណែងមន្ត្រីកងកម្លាំង គឺយោងតាមកម្មវិធីនយោបាយរបស់រាជរដ្ឋាភិបាលស្តីពីកំណែទម្រង់កងកម្លាំងប្រដាប់អាវុធ និងយុទ្ធសាស្ត្រធ្វើកំណែទម្រង់កងយោធពលខេមរភូមិន្ទ ៥ឆ្នាំ ដែលកងរាជអាវុធហត្ថ បានសម្រួចការធ្វើកំណែទម្រង់របស់ខ្លួន សំដៅឆ្ពោះទៅការប្រមូលផ្តុំ រៀបរយ ទំនើបកម្ម និងប្រសិទ្ធភាព។ ជាក់ស្ដែង ការផ្លាស់ចេញមេបញ្ជាការចាស់ គឺឧត្តមសេនីយ៍ត្រី ថាវ យ៉េន ត្រូវបាននាយឧត្តមសេនីយ៍ សៅ សុខា បញ្ជាក់ថា អនុវត្តតាមក្រឹត្យក្រមការងារចាត់តាំង ដោយពុំមានកំហុសខុសឆ្គង ឬទទួលវិន័យទណ្ឌកម្មណាមួយឡើយ ពោល គឺត្រូវទៅទទួលតួនាទីភារកិច្ចនៅកន្លែងថ្មី។

ក្នុងនាមជាមេបញ្ជាការកងរាជអាវុធហត្ថលើផ្ទៃប្រទេស លោកនាយឧត្តមសេនីយ៍ សៅ សុខា បានវាយតម្លៃខ្ពស់ចំពោះលោកឧត្តមសេនីយ៍ត្រី ថាវ យ៉េន ដែលបានរួមចំណែកក្នុងការដឹកនាំ បញ្ជា គ្រប់គ្រងកងរាជអាវុធហត្ថខេត្តរតនគិរី សម្រេចបានតាមតួនាទីភារកិច្ចរបស់ខ្លួនកន្លងមក។ ចំពោះមេបញ្ជាការថ្មី ដែលត្រូវទទួលបានការតែងតាំងនាថ្ងៃនេះ គឺលោកឧត្តមសេនីយ៍ត្រី សោ សាវឿន ត្រូវបាននាយឧត្តមសេនីយ៍ សៅ សុខា ណែនាំឱ្យយកចិត្តទុកដាក់លើភារកិច្ចស្នូលចំនួន៣ គឺ ការងារគ្រប់គ្រង ការងារកសាងអង្គភាព និងការងារដឹកនាំ គ្រប់គ្រង បញ្ជា៕